Malaaqee 2
1ai imaamo, ab meray faislay par dhyaan do!” 2rabb-ul-afwaaj farmaata hai, “meree suno, pooray dil say meray naam ka ehatiraam karo, varna main tum par laanat bhejoonga, main tumhaaree barkaton ko laanton men tabdeel kar doonga. balki main yah kar bhee chuka hoon, kyoonki tum nay pooray dil say meray naam ka ehatiraam naheen kiya. 3tumhaaray chaal-chalan kay sabab say main tumhaaree aulaad ko daantoonga. main tumhaaree eed kee qurbaaniyon ka gobar tumhaaray munh par phaink doonga, aur tumhen us kay samet baahar phainka jaaega.”
4rabb-ul-afwaaj farmaata hai, “tab tum jaan logay ki main nay tum par yah faisla kiya hai taaki mera laavee kay qabeelay kay saath ahd qaaim rahay. 5kyoonki main nay ahd baandh kar laaviyon say zindagee aur salaamatee ka vaada kiya tha, aur main nay vaaday ko poora bhee kiya. us vaqt laavee mera khauf maantay balki meray naam say dahshat khaatay thay. 6vah qaabil-ay-etimaad taaleem detay thay, aur un kee zabaan par jhoot naheen hota tha. vah salaamatee say aur seedhee raah par meray saath chaltay thay, aur bahut say log un kay baais gunaah say door ho gaay.
7imaamon ka farz hai ki vah saheeh taaleem mahfooz rakhen, aur logon ko un say hidaayat haasil karnee chaahiay. kyoonki imaam rabb-ul-afwaaj ka paighambar hai. 8lekin tum saheeh raah say hat gaay ho. tumhaaree taaleem bahuton kay liyay thokar ka baais ban gaee hai.” rabb-ul-afwaaj farmaata hai, “tum nay laaviyon kay saath meray ahd ko khaak men mila diya hai. 9is liyay main nay tumhen tamaam qaum kay saamnay zaleel kar diya hai, sab tumhen haqeer jaantay hain. kyoonki tum meree raahon par naheen rahetay balki taaleem detay vaqt jaanibdaaree dikhaatay ho.”
naajaaiz shaadiyaan aur talaaq par malaamat
10kya ham sab ka ek hee baap naheen? ek hee khuda nay hamen khalaq kiya hai. to phir ham ek doosray say bevafaaee karkay apnay baapdaada kay ahd kee behuramtee kyoon kar rahay hain?
11yahoodaah bevafa ho gaya hai. israaeel aur yarooshalam men makrooh harkaten sarzad huee hain, kyoonki yahoodaah kay aadmiyon nay rabb kay ghar kee behuramtee kee hai, us maqdis kee jo rabb ko piyaara hai. kis tarah? unhon nay deegar aqvaam kee butparast aurton say shaadee kee hai [a] lafzee tarjuma : yahoodaah nay ajnabee maaboodon kee betiyon say shaadee kee hai. . 12lekin jis nay bhee aisa kiya hai usay rabb jad say yaaqoob kay khaimon say nikaal phainkega, khwaah vah rabb-ul-afwaaj ko kitnee qurbaaniyaan pesh kyoon na karay.
13tum say ek aur khata bhee sarzad hotee hai. beshak rabb kee qurbaangaah ko apnay aansooon say tar karo, beshak rotay aur karaahatay raho ki rabb na hamaaree qurbaaniyon par tavajjuh deta, na unhen khushee say hamaaray haath say qabool karta hai. lekin yah karnay say koee farq naheen padega. 14tum poochhtay ho, “kyoon?” is liyay ki shaadee kartay vaqt rabb khud gavaah hota hai. aur ab too apnee beevee say bevafa ho gaya hai, go vah teree jeevansaathee hai jis say too nay shaadee ka ahd baandha tha. 15kya rabb nay shauhar aur beevee ko ek naheen banaaya, ek jism jis men rooh hai? aur yah ek jism kya chaahata hai? allaah kee taraf say aulaad. chunaanchay apnee rooh men khabardaar raho! apnee beevee say bevafa na ho ja! 16kyoonki rabb-ul-afwaaj jo israaeel ka khuda hai farmaata hai, “main talaaq say nafrat karta hoon aur us say mutanaffir hoon jo zulm say mulabbas hota hai. chunaanchay apnee rooh men khabardaar rah kar is tarah ka bevafa ravayya ikhtiyaar na karo!”
rabb logon kee adaalat karegaa
17tumhaaree baaton ko sun sun kar rabb thak gaya hai. tum poochhtay ho, “ham nay usay kis tarah thaka diya hai?” is men ki tum daava kartay ho, “badee karnay vaala rabb kee nazar men theek hai, vah aisay logon ko pasand karta hai.” tum yah bhee kahetay ho, “allaah kahaan hai? vah insaaf kyoon naheen karta?”