Malaaqee 1

¹zail men israaeel kay liyay rabb ka vah kalaam hai jo us nay malaaqee par naazil kiya.

²rabb farmaata hai, “tum mujhay piyaaray ho.” lekin tum kahetay ho, “kis tarah? teree ham say muhabbat kahaan zaahir huee hai?”

suno rabb ka javaab! “kya esau aur yaaqoob sagay bhaaee naheen thay? to bhee sirf yaaqoob mujhay piyaara thaa ³jabki esau say main mutanaffir raha. us kay pahaadee ilaaqay adom ko main nay veeraan-o-sunsaan kar diya, us kee mauroosee zameen ko registaan kay geeddon kay havaalay kar diya hai.” ⁴adomee kahetay hain, “go ham chikna-choor ho gaay hain to bhee khandaraat kee jagah naay ghar bana lengay.” lekin rabb-ul-afwaaj farmaata hai, “beshak taameer ka kaam kartay jaao, lekin main sab kuchh dubaara dha doonga. un ka mulk ‘bedeenee ka mulk’ aur un kee qaum ‘vah qaum jis par rabb kee abdee laanat hai’ kahelaaegee. ⁵tum israaeelee apnee aankhon say yah dekhogay. tab tum kahogay, ‘rabb apnee azmat israaeel kee sarhaddon say baahar bhee zaahir karta hai’.”

imaamon par ilzaam

⁶rabb-ul-afwaaj farmaata hai, “ai imaamo, beta apnay baap ka aur naukar apnay maalik ka ehatiraam karta hai. lekin mera ehatiraam kaun karta hai, go main tumhaara baap hoon? mera khauf kaun maanta hai, go main tumhaara maalik hoon? haqeeqat yah hai ki tum meray naam ko haqeer jaantay ho. lekin tum etiraaz kartay ho, ‘ham kis tarah teray naam ko haqeer jaantay hain?’ ⁷is men ki tum meree qurbaangaah par naapaak khuraak rakh detay ho. tum poochhtay ho, ‘ham nay tujhay kis baat men naapaak kiya hai?’ is men ki tum rabb kee mez ko qaabil-ay-tahqeer qaraar detay ho. ⁸kyoonki go andhay jaanvaron ko qurbaan karna sakht mana hai, to bhee tum yah baat nazar’andaaz karkay aisay jaanvaron ko qurbaan kartay ho. langday ya beemaar jaanvar chadhaana bhee mamnoo hai, to bhee tum kahetay ho, ‘koee baat naheen’ aur aisay hee jaanvaron ko pesh kartay ho.” rabb-ul-afwaaj farmaata hai, “agar vaaqaee is kee koee baat naheen to apnay mulk kay gavarnar ko aisay jaanvaron ko pesh karo. kya vah tum say khush hoga? kya vah tumhen qabool karega? hargiz naheen! ⁹chunaanchay ab allaah say iltimaas karo ki ham par meharbaanee kar.” rabb-ul-afwaaj farmaata hai, “khud soch lo, kya hamaaray haathon say aisee qurbaaniyaan milnay par allaah hamen qabool karega? ¹⁰kaash tum men say koee meray ghar kay darvaazon ko band karay taaki meree qurbaangaah par befaaida aag na laga sako! main tum say khush naheen, aur tumhaaray haathon say qurbaaniyaan mujhay bilkul pasand naheen.” yah rabb-ul-afwaaj ka farmaan hai.

¹¹rabb-ul-afwaaj farmaata hai, “pooree duniya men mashriq say maghrib tak mera naam azeem hai. har jagah meray naam ko bakhoor aur paak qurbaaniyaan pesh kee jaatee hain. kyoonki deegar aqvaam men mera naam azeem hai. ¹²lekin tum apnee harkaton say meray naam kee behuramtee kartay ho. tum kahetay ho, ‘rabb kee mez ko naapaak kiya ja sakta hai, us kee qurbaaniyon ko haqeer jaana ja sakta hai.’ ¹³tum shikaayat kartay ho, ‘haay, yah khidmat kitnee takleefdih hai!’ aur qurbaanee kee aag ko hiqaarat kee nazron say dekhtay huay tez kartay ho. har qism ka jaanvar pesh kiya jaata hai, khwaah vah zakhmee, langda ya beemaar kyoon na ho.” rabb-ul-afwaaj farmaata hai, “kya main tumhaaray haathon say aisee qurbaaniyaan qabool kar sakta hoon? hargiz naheen! ¹⁴us dhokebaaz par laanat jo mannat maan kar kahay, ‘main rabb ko apnay revad ka achchha mendha qurbaan karoonga’ lekin is kay bajaay naaqis jaanvar pesh karay.” kyoonki rabb-ul-afwaaj farmaata hai, “main azeem baadshaah hoon, aur aqvaam men meray naam ka khauf maana jaata hai.