Looqa 9
eesa baarah rasoolon ko tableegh karnay bhej deta hai
1is kay baad eesa nay apnay baarah shaagirdon ko ikattha karkay unhen badroohon ko nikaalnay aur mareezon ko shifa denay kee quvvat aur ikhtiyaar diya. 2phir us nay unhen allaah kee baadshaahee kee munaadee karnay aur shifa denay kay liyay bhej diya. 3us nay kaha, “safar par kuchh saath na lena. na laathee, na saamaan kay liyay baig, na rotee, na paisay aur na ek say ziyaada soot. 4jis ghar men bhee tum jaatay ho us men us maqaam say chalay jaanay tak thahero. 5aur agar maqaamee log tum ko qabool na karen to phir us shaher say nikaltay vaqt us kee gard apnay paaon say jhaad do. yoon tum un kay khilaaf gavaahee dogay.”
6chunaanchay vah nikal kar gaaon gaaon ja kar allaah kee khushkhabaree sunaanay aur mareezon ko shifa denay lagay.
herodes antipaas pareshaan ho jaata hai
7jab galeel kay hukmaraan herodes antipaas nay sab kuchh suna jo eesa kar raha tha to vah uljhan men pad gaya. baaz to kah rahay thay ki yaheya baptisma denay vaala jee utha hai. 8auron ka khayaal tha ki ilyaas nabee eesa men zaahir hua hai ya ki qadeem zamaanay ka koee aur nabee jee utha hai. 9lekin herodes nay kaha, “main nay khud yaheya ka sar qalam karvaaya tha. to phir yah kaun hai jis kay baaray men main is qism kee baaten sunta hoon?” aur vah us say milnay kee koshish karnay laga.
eesa 5000 afraad ko khaana khilaata hai
10rasool vaapas aaay to unhon nay eesa ko sab kuchh sunaaya jo unhon nay kiya tha. phir vah unhen alag lay ja kar bait-saida naamee shaher men aaya. 11lekin jab logon ko pata chala to vah un kay peechhay vahaan pahunch gaay. eesa nay unhen aanay diya aur allaah kee baadshaahee kay baaray men taaleem dee. saath saath us nay mareezon ko shifa bhee dee. 12jab din dhalnay laga to baarah shaagirdon nay paas a kar us say kaha, “logon ko rukhsat kar den taaki vah ird-gird kay deehaaton aur bastiyon men ja kar raat thahernay aur khaanay ka band-o-bast kar saken, kyoonki is veeraan jagah men kuchh naheen milega.”
13lekin eesa nay unhen kaha, “tum khud inhen kuchh khaanay ko do.”
unhon nay javaab diya, “hamaaray paas sirf paanch rotiyaan aur do machhliyaan hain. ya kya ham ja kar in tamaam logon kay liyay khaana khareed laaen?” 14(vahaan taqreeban 5,000 mard thay.)
eesa nay apnay shaagirdon say kaha, “tamaam logon ko gurohon men taqseem karkay bitha do. har guroh pachaas afraad par mushtamil ho.”
15shaagirdon nay aisa hee kiya aur sab ko bitha diya. 16is par eesa nay un paanch rotiyon aur do machhliyon ko lay kar aasmaan kee taraf nazar uthaaee aur un kay liyay shukrguzaaree kee dua kee. phir us nay unhen tod tod kar shaagirdon ko diya taaki vah logon men taqseem karen. 17aur sab nay jee bhar kar khaaya. is kay baad jab bachay huay tukday jama kiay gaay to baarah tokray bhar gaay.
patras ka iqraar
18ek din eesa akela dua kar raha tha. sirf shaagird us kay saath thay. us nay un say poochha, “main aam logon kay nazdeek kaun hoon?”
19unhon nay javaab diya, “kuchh kahetay hain yaheya baptisma denay vaala, kuchh yah ki aap ilyaas nabee hain. kuchh yah bhee kahetay hain ki qadeem zamaanay ka koee nabee jee utha hai.”
20us nay poochha, “lekin tum kya kahetay ho? tumhaaray nazdeek main kaun hoon?”
patras nay javaab diya, “aap allaah kay maseeh hain.”
eesa apnee maut ka zikr karta hai
21yah sun kar eesa nay unhen yah baat kisee ko bhee bataanay say mana kiya. 22us nay kaha, “laazim hai ki ibn-ay-aadam bahut dukh utha kar buzurgon, raahanuma imaamon aur shareeat kay ulma say radd kiya jaaay. usay qatl bhee kiya jaaega, lekin teesray din vah jee uthega.”
23phir us nay sab say kaha, “jo meray peechhay aana chaahay vah apnay aap ka inkaar karay aur har roz apnee saleeb utha kar meray peechhay ho lay. 24kyoonki jo apnee jaan ko bachaaay rakhna chaahay vah usay kho dega. lekin jo meree khaatir apnee jaan kho day vahee usay bachaaega. 25kya faaida hai agar kisee ko pooree duniya haasil ho jaaay magar vah apnee jaan say maheroom ho jaaay ya usay is ka nuqsaan uthaana paday? 26jo bhee meray aur meree baaton kay sabab say sharmaaay us say ibn-ay-aadam bhee us vaqt sharamaaega jab vah apnay aur apnay baap kay aur muqaddas farishton kay jalaal men aaega. 27main tum ko sachch bataata hoon, yahaan kuchh aisay log khaday hain jo marnay say pahelay hee allaah kee baadshaahee ko dekhengay.”
eesa kee soorat badal jaatee hai
28taqreeban aath din guzar gaay. phir eesa patras, yaaqoob aur yoohanna ko saath lay kar dua karnay kay liyay pahaad par chadh gaya. 29vahaan dua kartay kartay us kay chiharay kee soorat badal gaee aur us kay kapday safed ho kar bijlee kee tarah chamaknay lagay. 30achaanak do mard zaahir ho kar us say mukhaatib huay. ek moosa aur doosra ilyaas tha. 31un kee shakl-o-soorat purjalaal thee. vah eesa say is kay baaray men baat karnay lagay ki vah kis tarah allaah ka maqsad poora karkay yarooshalam men is duniya say kooch kar jaaega. 32patras aur us kay saathiyon ko gaheree neend a gaee thee, lekin jab vah jaag uthay to eesa ka jalaal dekha aur yah ki do aadmee us kay saath khaday hain. 33jab vah mard eesa ko chhod kar ravaana honay lagay to patras nay kaha, “ustaad, kitnee achchhee baat hai ki ham yahaan hain. aaen, ham teen jhompadiyaan banaaen, ek aap kay liyay, ek moosa kay liyay aur ek ilyaas kay liyay.” lekin vah naheen jaanta tha ki kya kah raha hai.
34yah kahetay hee ek baadal a kar un par chha gaya. jab vah us men daakhil huay to dahshatzada ho gaay. 35phir baadal say ek aavaaz sunaaee dee, “yah mera chuna hua farzand hai, is kee suno.”
36aavaaz khatm huee to eesa akela hee tha. aur un dinon men shaagirdon nay kisee ko bhee is vaakiay kay baaray men na bataaya balki khaamosh rahay.
eesa ladkay men say badruh nikaalta hai
37aglay din vah pahaad say utar aaay to ek bada hujoom eesa say milnay aaya. 38hujoom men say ek aadmee nay oonchee aavaaz say kaha, “ustaad, meharbaanee karkay meray betay par nazar karen. vah mera iklauta beta hai. 39ek badruh usay baar baar apnee girift men lay letee hai. phir vah achaanak cheekhen maarnay lagta hai. badruh usay jhanjhod kar itna tang kartee hai ki us kay munh say jhaag nikalnay lagta hai. vah usay kuchal kuchal kar mushkil say chhodtee hai. 40main nay aap kay shaagirdon say darakhwaast kee thee ki vah usay nikaalen, lekin vah naakaam rahay.”
41eesa nay kaha, “eemaan say khaalee aur tedhee nasal! main kab tak tumhaaray paas rahoon, kab tak tumhen bardaasht karoon?” phir us nay aadmee say kaha, “apnay betay ko lay a.”
42beta eesa kay paas a raha tha to badruh usay zameen par patakh kar jhanjhodnay lagee. lekin eesa nay naapaak rooh ko daant kar bachchay ko shifa dee. phir us nay usay vaapas baap kay sapurd kar diya. 43tamaam log allaah kee azeem qudrat ko dekh kar hakka-bakka rah gaay.
eesa kee maut ka doosra elaan
abhee sab un tamaam kaamon par taajjub kar rahay thay jo eesa nay haal hee men kiay thay ki us nay apnay shaagirdon say kaha, 44“meree is baat par khoob dhyaan do, ibn-ay-aadam ko aadmiyon kay havaalay kar diya jaaega.” 45lekin shaagird is ka matlab na samjhay. yah baat un say posheeda rahee aur vah isay samajh na sakay. neez, vah eesa say is kay baaray men poochhnay say dartay bhee thay.
kaun sab say bada hai?
46phir shaagird bahs karnay lagay ki ham men say kaun sab say bada hai. 47lekin eesa jaanta tha ki vah kya soch rahay hain. us nay ek chhotay bachchay ko lay kar apnay paas khada kiyaa 48aur un say kaha, “jo meray naam men is bachchay ko qabool karta hai vah mujhay hee qabool karta hai. aur jo mujhay qabool karta hai vah usay qabool karta hai jis nay mujhay bheja hai. chunaanchay tum men say jo sab say chhota hai vahee bada hai.”
jo tumhaaray khilaaf naheen vah tumhaaray haq men hai
49yoohanna bol utha, “ustaad, ham nay kisee ko dekha jo aap ka naam lay kar badruhen nikaal raha tha. ham nay usay mana kiya, kyoonki vah hamaaray saath mil kar aap kee pairvee naheen karta.”
50lekin eesa nay kaha, “usay mana na karna, kyoonki jo tumhaaray khilaaf naheen vah tumhaaray haq men hai.”
ek saamree gaaon eesa ko thahernay naheen detaa
51jab vah vaqt qareeb aaya ki eesa ko aasmaan par utha liya jaaay to vah baday azam kay saath yarooshalam kee taraf safar karnay laga. 52is maqsad kay tahet us nay apnay aagay qaasid bhej diay. chaltay chaltay vah saamriyon kay ek gaaon men pahunchay jahaan vah us kay liyay thahernay kee jagah tayyaar karna chaahatay thay. 53lekin gaaon kay logon nay eesa ko tiknay na diya, kyoonki us kee manzil-ay-maqsood yarooshalam thee. 54yah dekh kar us kay shaagird yaaqoob aur yoohanna nay kaha, “khudaavand, kya [ilyaas kee tarah] ham kahen ki aasmaan par say aag naazil ho kar in ko bhasm kar day?”
55lekin eesa nay mud kar unhen daanta [aur kaha, “tum naheen jaantay ki tum kis qism kee rooh kay ho. ibn-ay-aadam is liyay naheen aaya ki logon ko halaak karay balki is liyay ki unhen bachaaay.”] 56chunaanchay vah kisee aur gaaon men chalay gaay.
pairvee kee sanjeedgee
57safar kartay kartay kisee nay raastay men eesa say kaha, “jahaan bhee aap jaaen main aap kay peechhay chalta rahoonga.”
58eesa nay javaab diya, “lomdiyaan apnay bhaton men aur parinday apnay ghonslon men aaraam kar saktay hain, lekin ibn-ay-aadam kay paas sar rakh kar aaraam karnay kee koee jagah naheen.”
59kisee aur say us nay kaha, “meray peechhay ho lay.”
lekin us aadmee nay kaha, “khudaavand, mujhay pahelay ja kar apnay baap ko dafan karnay kee ijaazat den.”
60lekin eesa nay javaab diya, “murdon ko apnay murday dafnaanay day. too ja kar allaah kee baadshaahee kee munaadee kar.”
61ek aur aadmee nay yah maazrat chaahee, “khudaavand, main zaroor aap kay peechhay ho loonga. lekin pahelay mujhay apnay ghar vaalon ko khairbaad kahenay den.”
62lekin eesa nay javaab diya, “jo bhee hal chalaatay huay peechhay kee taraf dekhay vah allaah kee baadshaahee kay laaiq naheen hai.”