Looqa 8
khidmatguzaar khavaateen eesa kay saath safar kartee hain
1is kay kuchh der baad eesa mukhtalif shaheron aur deehaaton men say guzar kar safar karnay laga. har jagah us nay allaah kee baadshaahee kay baaray men khushkhabaree sunaaee. us kay baarah shaagird us kay saath thay, 2neez kuchh khavaateen bhee jinhen us nay badroohon say rihaaee aur beemaariyon say shifa dee thee. in men say ek mariyam thee jo magdaleenee kahelaatee thee jis men say saat badruhen nikaalee gaee theen. 3phir yooanna jo khooza kee beevee thee (khooza herodes baadshaah ka ek afsar tha). soosanna aur deegar kaee khavaateen bhee theen jo apnay maalee vasaail say un kee khidmat kartee theen.
beej bonay vaalay kee tamseel
4ek din eesa nay ek baday hujoom ko ek tamseel sunaaee. log mukhtalif shaheron say usay sunnay kay liyay jama ho gaay thay.
5“ek kisaan beej bonay kay liyay nikla. jab beej idhar udhar bikhar gaya to kuchh daanay raastay par giray. vahaan unhen paaon talay kuchla gaya aur parindon nay unhen chug liya. 6kuchh pathreelee zameen par giray. vahaan vah ugnay to lagay, lekin namee kee kamee thee, is liyay pauday kuchh der kay baad sookh gaay. 7kuchh daanay khudrau kaantedaar paudon kay darmiyaan bhee giray. vahaan vah ugnay to lagay, lekin khudrau paudon nay saath saath badh kar unhen phalnay phoolnay kee jagah na dee. chunaanchay vah bhee khatm ho gaay. 8lekin aisay daanay bhee thay jo zarkhez zameen par giray. vahaan vah ug sakay aur jab fasal pak gaee to sau guna ziyaada phal paida hua.”
yah kah kar eesa pukaar utha, “jo sun sakta hai vah sun lay!”
tamseelon ka maqsad
9us kay shaagirdon nay us say poochha ki is tamseel ka kya matlab hai? 10javaab men us nay kaha, “tum ko to allaah kee baadshaahee kay bhed samajhnay kee liyaaqat dee gaee hai. lekin main doosron ko samjhaanay kay liyay tamseelen istemaal karta hoon taaki paak kalaam poora ho jaaay ki ‘vah apnee aankhon say dekhengay magar kuchh naheen jaanengay, vah apnay kaanon say sunengay magar kuchh naheen samjhengay.’
beej bonay vaalay kee tamseel ka matlab
11tamseel ka matlab yah hai : beej say muraad allaah ka kalaam hai. 12raah par giray huay daanay vah log hain jo kalaam suntay to hain, lekin phir iblees a kar usay un kay dilon say chheen leta hai, aisa na ho ki vah eemaan la kar najaat paaen. 13pathreelee zameen par giray huay daanay vah log hain jo kalaam sun kar usay khushee say qabool to kar letay hain, lekin jad naheen pakadtay. nateejay men agarchi vah kuchh der kay liyay eemaan rakhtay hain to bhee jab kisee aazmaaish ka saamna karna padta hai to vah bargashta ho jaatay hain. 14khudrau kaantedaar paudon kay darmiyaan giray huay daanay vah log hain jo suntay to hain, lekin jab vah chalay jaatay hain to rozmarra kee pareshaaniyaan, daulat aur zindagee kee aish-o-ishrat unhen phalnay phoolnay naheen detee. nateejay men vah phal laanay tak naheen pahunchtay. 15is kay muqaablay men zarkhez zameen men giray huay daanay vah log hain jin ka dil diyaanatdaar aur achchha hai. jab vah kalaam suntay hain to vah usay apnaatay aur saabitqadmee say taraqqee kartay kartay phal laatay hain.
koee charaagh ko bartan kay neechay naheen chhupaataa
16jab koee charaagh jalaata hai to vah usay kisee bartan ya chaarpaaee kay neechay naheen rakhta, balki usay shamaadaan par rakh deta hai taaki us kee raushnee andar aanay vaalon ko nazar aaay.
17jo kuchh bhee is vaqt posheeda hai vah aakhir men zaahir ho jaaega, aur jo kuchh bhee chhupa hua hai vah maaloom ho jaaega aur raushnee men laaya jaaega.
18chunaanchay is par dhyaan do ki tum kis tarah suntay ho. kyoonki jis kay paas kuchh hai usay aur diya jaaega, jabki jis kay paas kuchh naheen hai us say vah bhee chheen liya jaaega jis kay baaray men vah khayaal karta hai ki us ka hai.”
eesa kee maan aur bhaaee
19ek din eesa kee maan aur bhaaee us kay paas aaay, lekin vah hujoom kee vajah say us tak na pahunch sakay. 20chunaanchay eesa ko ittila dee gaee, “aap kee maan aur bhaaee baahar khaday hain aur aap say milna chaahatay hain.”
21us nay javaab diya, “meree maan aur bhaaee vah sab hain jo allaah ka kalaam sun kar us par amal kartay hain.”
eesa aandhee ko thama deta hai
22ek din eesa nay apnay shaagirdon say kaha, “aao, ham jheel ko paar karen.” chunaanchay vah kashtee par savaar ho kar ravaana huay. 23jab kashtee chalee ja rahee thee to eesa so gaya. achaanak jheel par aandhee aaee. kashtee paanee say bharnay lagee aur doobnay ka khatra tha. 24phir unhon nay eesa kay paas ja kar usay jaga diya aur kaha, “ustaad, ustaad, ham tabaah ho rahay hain.”
vah jaag utha aur aandhee aur maujon ko daanta. aandhee tham gaee aur laheren bilkul saakit ho gaeen. 25phir us nay shaagirdon say poochha, “tumhaara eemaan kahaan hai?”
un par khauf taaree ho gaya aur vah sakht hairaan ho kar aapas men kahenay lagay, “aakhir yah kaun hai? vah hava aur paanee ko bhee hukm deta hai, aur vah us kee maantay hain.”
eesa ek garaaseenee aadmee say badruhen nikaal deta hai
26phir vah safar jaaree rakhtay huay garaasa kay ilaaqay kay kinaaray par pahunchay jo jheel kay paar galeel kay muqaabil hai. 27jab eesa kashtee say utra to shaher ka ek aadmee eesa ko mila jo badroohon kee girift men tha. vah kaafee der say kapday pahenay baghair chalta phirta tha aur apnay ghar kay bajaay qabron men raheta tha. 28eesa ko dekh kar vah chillaaya aur us kay saamnay gir gaya. oonchee aavaaz say us nay kaha, “eesa allaah t’aala kay farzand, mera aap kay saath kya vaasta hai? main minnat karta hoon, mujhay azaab men na daalen.” 29kyoonki eesa nay naapaak rooh ko hukm diya tha, “aadmee men say nikal ja!” is badruh nay badee der say us par qabza kiya hua tha, is liyay logon nay us kay haath-paaon zanjeeron say baandh kar us kee paheraadaaree karnay kee koshish kee thee, lekin befaaida. vah zanjeeron ko tod daalta aur badruh usay veeraan ilaaqon men bhagaaay phirtee thee.
30eesa nay us say poochha, “tera naam kya hai?” us nay javaab diya, “lashkar.” is naam kee vajah yah thee ki us men bahut see badruhen ghusee huee theen. 31ab yah minnat karnay lageen, “hamen athaah gadhay men jaanay ko na kahen.”
32us vaqt qareeb kee pahaadee par sooaron ka bada ghol char raha tha. badroohon nay eesa say iltimaas kee, “hamen un sooaron men daakhil honay den.” us nay ijaazat day dee. 33chunaanchay vah us aadmee men say nikal kar sooaron men ja ghuseen. is par pooray ghol kay sooar bhaag bhaag kar pahaadee kee dhalaan par say utray aur jheel men jhapat kar doob maray.
34yah dekh kar sooaron kay gallaabaan bhaag gaay. unhon nay shaher aur deehaat men is baat ka charcha kiyaa 35to log yah maaloom karnay kay liyay ki kya hua hai apnee jagahon say nikal kar eesa kay paas aaay. us kay paas pahunchay to vah aadmee mila jis say badruhen nikal gaee theen. ab vah kapday pahenay eesa kay paaon men baitha tha aur us kee zahenee haalat theek thee. yah dekh kar vah dar gaay. 36jinhon nay sab kuchh dekha tha unhon nay logon ko bataaya ki is badruh-girifta aadmee ko kis tarah rihaaee milee hai. 37phir us ilaaqay kay tamaam logon nay eesa say darakhwaast kee ki vah unhen chhod kar chala jaaay, kyoonki un par bada khauf chha gaya tha. chunaanchay eesa kashtee par savaar ho kar vaapas chala gaya. 38jis aadmee say badruhen nikal gaee theen us nay us say iltimaas kee, “mujhay bhee apnay saath jaanay den.”
lekin eesa nay usay ijaazat na dee balki kaha, 39“apnay ghar vaapas chala ja aur doosron ko vah sab kuchh bata jo allaah nay teray liyay kiya hai.”
chunaanchay vah vaapas chala gaya aur pooray shaher men logon ko bataanay laga ki eesa nay meray liyay kya kuchh kiya hai.
yaaeer kee betee aur beemaar khaatoon
40jab eesa jheel kay doosray kinaaray par vaapas pahuncha to logon nay us ka istiqbaal kiya, kyoonki vah us kay intizaar men thay. 41itnay men ek aadmee eesa kay paas aaya jis ka naam yaaeer tha. vah maqaamee ibaadatkhaanay ka raahanuma tha. vah eesa kay paaon men gir kar minnat karnay laga, “meray ghar chalen.” 42kyoonki us kee iklautee betee jo taqreeban baarah saal kee thee marnay ko thee.
eesa chal pada. hujoom nay usay yoon ghera hua tha ki saans lena bhee mushkil tha. 43hujoom men ek khaatoon thee jo baarah saal say khoon bahenay kay marz say rihaaee na pa sakee thee. koee usay shifa na day saka tha. 44ab us nay peechhay say a kar eesa kay libaas kay kinaaray ko chhua. khoon bahena fauran band ho gaya. 45lekin eesa nay poochha, “kis nay mujhay chhua hai?”
sab nay inkaar kiya aur patras nay kaha, “ustaad, yah tamaam log to aap ko gher kar daba rahay hain.”
46lekin eesa nay israar kiya, “kisee nay zaroor mujhay chhua hai, kyoonki mujhay mahsoos hua hai ki mujh men say tavaanaaee niklee hai.” 47jab us khaatoon nay dekha ki bhed khul gaya to vah laraztee huee aaee aur us kay saamnay gir gaee. pooray hujoom kee maujoodgee men us nay bayaan kiya ki us nay eesa ko kyoon chhua tha aur ki chhootay hee usay shifa mil gaee thee. 48eesa nay kaha, “betee, teray eemaan nay tujhay bacha liya hai. salaamatee say chalee ja.”
49eesa nay yah baat abhee khatm naheen kee thee ki ibaadatkhaanay kay raahanuma yaaeer kay ghar say koee shakhs a pahuncha. us nay kaha, “aap kee betee faut ho chukee hai, ab ustaad ko mazeed takleef na den.”
50lekin eesa nay yah sun kar kaha, “mat ghabra. faqat eemaan rakh to vah bach jaaegee.”
51vah ghar pahunch gaay to eesa nay kisee ko bhee siva-ay-patras, yoohanna, yaaqoob aur betee kay vaalidain kay andar aanay kee ijaazat na dee. 52tamaam log ro rahay aur chhaatee peet peet kar maatam kar rahay thay. eesa nay kaha, “khaamosh! vah mar naheen gaee balki so rahee hai.”
53log hans kar us ka mazaaq udaanay lagay, kyoonki vah jaantay thay ki ladkee mar gaee hai. 54lekin eesa nay ladkee ka haath pakad kar oonchee aavaaz say kaha, “betee, jaag uth!” 55ladkee kee jaan vaapas a gaee aur vah fauran uth khadee huee. phir eesa nay hukm diya ki usay kuchh khaanay ko diya jaaay. 56yah sab kuchh dekh kar us kay vaalidain hairatzada huay. lekin us nay unhen kaha ki is kay baaray men kisee ko bhee na bataana.