Looqa 21
beva ka chandaa
1eesa nay nazar utha kar dekha ki ameer log apnay hadiay bait-ul-muqaddas kay chanday kay baks men daal rahay hain. 2ek ghareeb beva bhee vahaan say guzree jis nay us men taambay kay do maamoolee say sikkay daal diay. 3eesa nay kaha, “main tum ko sachch bataata hoon ki is ghareeb beva nay tamaam logon kee nisbat ziyaada daala hai. 4kyoonki in sab nay to apnee daulat kee kasrat say kuchh daala jabki is nay zarooratmand honay kay baavujood bhee apnay guzaaray kay saaray paisay day diay hain.”
bait-ul-muqaddas par aanay vaalee tabaahee
5us vaqt kuchh log bait-ul-muqaddas kee taareef men kahenay lagay ki vah kitnay khoobsoorat pattharon aur mannat kay tuhfon say sajee huee hai. yah sun kar eesa nay kaha, 6“jo kuchh tum ko yahaan nazar aata hai us ka patthar par patthar naheen rahega. aanay vaalay dinon men sab kuchh dha diya jaaega.”
museebaton aur eezaarasaanee kee peshgoee
7unhon nay poochha, “ustaad, yah kab hoga? kya kya nazar aaega jis say maaloom ho ki yah ab honay ko hai?”
8eesa nay javaab diya, “khabardaar raho ki koee tumhen gumraah na kar day. kyoonki bahut say log mera naam lay kar aaengay aur kahengay, ‘main hee maseeh hoon’ aur ki ‘vaqt qareeb a chuka hai.’ lekin un kay peechhay na lagna. 9aur jab jangon aur fitnon kee khabren tum tak pahunchengee to mat ghabraana. kyoonki laazim hai ki yah sab kuchh pahelay pesh aaay. to bhee abhee aakhirat na hogee.”
10us nay apnee baat jaaree rakhee, “ek qaum doosree kay khilaaf uth khadee hogee, aur ek baadshaahee doosree kay khilaaf. 11shadeed zalzlay aaengay, jagah jagah kaal padengay aur vabaaee beemaariyaan phail jaaengee. haibtanaak vaaqiaat aur aasmaan par baday nishaan dekhnay men aaengay. 12lekin in tamaam vaaqiaat say pahelay log tum ko pakad kar sataaengay. vah tum ko yahoodee ibaadatkhaanon kay havaalay karengay, qaidkhaanon men dalavaaengay aur baadshaahon aur hukmaraanon kay saamnay pesh karengay. aur yah is liyay hoga ki tum meray pairokaar ho. 13nateejay men tumhen meree gavaahee denay ka mauqa milega. 14lekin thaan lo ki tum pahelay say apna difa karnay kee tayyaaree na karo, 15kyoonki main tum ko aisay alfaaz aur hikmat ata karoonga ki tumhaaray tamaam mukhaalif na us ka muqaabla aur na us kee tardeed kar sakengay. 16tumhaaray vaalidain, bhaaee, rishtedaar aur dost bhee tum ko dushman kay havaalay kar dengay, balki tum men say baaz ko qatl kiya jaaega. 17sab tum say nafrat karengay, is liyay ki tum meray pairokaar ho. 18to bhee tumhaara ek baal bhee beeka naheen hoga. 19saabitqadam rahenay say hee tum apnee jaan bacha logay.
yarooshalam kee tabaahee
20jab tum yarooshalam ko faujon say ghira hua dekho to jaan lo ki us kee tabaahee qareeb a chukee hai. 21us vaqt yahoodiya kay baashinday bhaag kar pahaadee ilaaqay men panaah len. shaher kay rahenay vaalay us say nikal jaaen aur deehaat men aabaad log shaher men daakhil na hon. 22kyoonki yah ilaahee ghazab kay din hongay jin men vah sab kuchh poora ho jaaega jo kalaam-ay-muqaddas men likha hai. 23un khavaateen par afsos jo un dinon men haamila hon ya apnay bachchon ko doodh pilaatee hon, kyoonki mulk men bahut museebat hogee aur is qaum par allaah ka ghazab naazil hoga. 24log unhen talvaar say qatl karengay aur qaid karkay tamaam ghairyahoodee mamaalik men lay jaaengay. ghairyahoodee yarooshalam ko paaon talay kuchal daalengay. yah silsila us vaqt tak jaaree rahega jab tak ghairyahoodiyon ka daur poora na ho jaaay.
ibn-ay-aadam kee aamad
25sooraj, chaand aur sitaaron men ajeeb-o-ghareeb nishaan zaahir hongay. qaumen samundar kay shor aur thaathen maarnay say hairaan-o-pareshaan hongee. 26log is andeshay say ki kya kya museebat duniya par aaegee is qadar khauf khaaengay ki un kee jaan men jaan na rahegee, kyoonki aasmaan kee quvvaten hilaaee jaaengee. 27aur phir vah ibn-ay-aadam ko badee qudrat aur jalaal kay saath baadal men aatay huay dekhengay. 28chunaanchay jab yah kuchh pesh aanay lagay to seedhay khaday ho kar apnee nazar uthaao, kyoonki tumhaaree najaat nazdeek hogee.”
anjeer kay darakht kee tamseel
29is silsilay men eesa nay unhen ek tamseel sunaaee. “anjeer kay darakht aur baaqee darakhton par ghaur karo. 30joon hee komplen nikalnay lagtee hain tum jaan letay ho ki garmiyon ka mausam nazdeek hai. 31isee tarah jab tum yah vaaqiaat dekhogay to jaan logay ki allaah kee baadshaahee qareeb hee hai.
32main tum ko sachch bataata hoon ki is nasal kay khatm honay say pahelay pahelay yah sab kuchh vaaqay hoga. 33aasmaan-o-zameen to jaatay rahengay, lekin meree baaten hamesha tak qaaim rahengee.
khabardaar rahenaa
34khabardaar raho taaki tumhaaray dil ayyaashee, nashaabaazee aur rozaana kee fikron talay dab na jaaen. varna yah din achaanak tum par aan padega, 35aur phanday kee tarah tumhen jakad lega. kyoonki vah duniya kay tamaam baashindon par aaega. 36har vaqt chaukas raho aur dua kartay raho ki tum ko aanay vaalee in sab baaton say bach nikalnay kee taufeeq mil jaaay aur tum ibn-ay-aadam kay saamnay khaday ho sako.”
37har roz eesa bait-ul-muqaddas men taaleem deta raha aur har shaam vah nikal kar us pahaad par raat guzaarta tha jis ka naam zaitoon ka pahaad hai. 38aur tamaam log us kee baaten sunnay kay liyay subah-saveray bait-ul-muqaddas men us kay paas aatay thay.