Looqa 20
eesa ka ikhtiyaar
1ek din jab vah bait-ul-muqaddas men logon ko taaleem day raha aur allaah kee khushkhabaree suna raha tha to raahanuma imaam, shareeat kay ulma aur buzurg us kay paas aaay. 2unhon nay kaha, “hamen bataaen, aap yah kis ikhtiyaar say kar rahay hain? kis nay aap ko yah ikhtiyaar diya hai?”
3eesa nay javaab diya, “mera bhee tum say ek savaal hai. tum mujhay bataao ki 4kya yaheya ka baptisma aasmaanee tha ya insaanee?”
5vah aapas men bahs karnay lagay, “agar ham kahen ‘aasmaanee’ to vah poochhega, ‘to phir tum us par eemaan kyoon na laaay?’ 6lekin agar ham kahen ‘insaanee’ to tamaam log hamen sangasaar karengay, kyoonki vah to yaqeen rakhtay hain ki yaheya nabee tha.” 7is liyay unhon nay javaab diya, “ham naheen jaantay ki vah kahaan say tha.”
8eesa nay kaha, “to phir main bhee tum ko naheen bataata ki main yah sab kuchh kis ikhtiyaar say kar raha hoon.”
angoor kay baagh kay muzaareon kee baghaavat
9phir eesa logon ko yah tamseel sunaanay laga, “kisee aadmee nay angoor ka ek baagh lagaaya. phir vah usay muzaareon kay sapurd karkay bahut der kay liyay bairoon-ay-mulk chala gaya. 10jab angoor pak gaay to us nay apnay naukar ko un kay paas bhej diya taaki vah maalik ka hissa vasool karay. lekin muzaareon nay us kee pitaaee karkay usay khaalee haath lauta diya. 11is par maalik nay ek aur naukar ko un kay paas bheja. lekin muzaareon nay usay bhee maar maar kar us kee beizzatee kee aur khaalee haath nikaal diya. 12phir maalik nay teesray naukar ko bhej diya. usay bhee unhon nay maar kar zakhmee kar diya aur nikaal diya. 13baagh kay maalik nay kaha, ‘ab main kya karoon? main apnay piyaaray betay ko bhejoonga, shaayad vah us ka lihaaz karen.’ 14lekin maalik kay betay ko dekh kar muzaaray aapas men kahenay lagay, ‘yah zameen ka vaaris hai. aao, ham isay maar daalen. phir is kee meeraas hamaaree hee hogee.’ 15unhon nay usay baagh say baahar phaink kar qatl kiya.”
eesa nay poochha, “ab bataao, baagh ka maalik kya karega? 16vah vahaan ja kar muzaareon ko halaak karega aur baagh ko doosron kay sapurd kar dega.”
yah sun kar logon nay kaha, “khuda aisa kabhee na karay.”
17eesa nay un par nazar daal kar poochha, “to phir kalaam-ay-muqaddas kay is havaalay ka kya matlab hai ki
‘jis patthar ko makaan banaanay vaalon nay radd kiya,
vah konay ka bunyaadee patthar ban gaya’?
18jo is patthar par girega vah tukday tukday ho jaaega, jabki jis par vah khud girega usay pees daalega.”
kya taiks dena jaaiz hai?
19shareeat kay ulma aur raahanuma imaamon nay usee vaqt usay pakadnay kee koshish kee, kyoonki vah samajh gaay thay ki tamseel men bayaanshuda muzaaray ham hee hain. lekin vah avaam say dartay thay. 20chunaanchay vah usay pakadnay ka mauqa dhoondtay rahay. is maqsad kay tahet unhon nay us kay paas jaasoos bhej diay. yah log apnay aap ko diyaanatdaar zaahir karkay eesa kay paas aaay taaki us kee koee baat pakad kar usay romee gavarnar kay havaalay kar saken. 21in jaasooson nay us say poochha, “ustaad, ham jaantay hain ki aap vahee kuchh bayaan kartay aur sikhaatay hain jo saheeh hai. aap jaanibdaar naheen hotay balki diyaanatdaaree say allaah kee raah kee taaleem detay hain. 22ab hamen bataaen ki kya romee shahenshaah ko taiks dena jaaiz hai ya naajaaiz?”
23lekin eesa nay un kee chaalaakee bhaamp lee aur kaha, 24“mujhay chaandee ka ek romee sikka dikhaao. kis kee soorat aur naam is par kanda hai?”
unhon nay javaab diya, “shahenshaah ka.”
25us nay kaha, “to jo shahenshaah ka hai shahenshaah ko do aur jo allaah ka hai allaah ko.”
26yoon vah avaam kay saamnay us kee koee baat pakadnay men naakaam rahay. us ka javaab sun kar vah hakka-bakka rah gaay aur mazeed koee baat na kar sakay.
kya ham jee uthengay?
27phir kuchh sadooqee us kay paas aaay. sadooqee naheen maantay ki roz-ay-qiyaamat murday jee uthengay. unhon nay eesa say ek savaal kiya, 28“ustaad, moosa nay hamen hukm diya ki agar koee shaadeeshuda aadmee beaulaad mar jaaay aur us ka bhaaee ho to bhaaee ka farz hai ki vah beva say shaadee karkay apnay bhaaee kay liyay aulaad paida karay. 29ab farz karen ki saat bhaaee thay. pahelay nay shaadee kee, lekin beaulaad faut hua. 30is par doosray nay us say shaadee kee, lekin vah bhee beaulaad mar gaya. 31phir teesray nay us say shaadee kee. yah silsila saatven bhaaee tak jaaree raha. yakay baad deegray har bhaaee beva say shaadee karnay kay baad mar gaya. 32aakhir men beva bhee faut ho gaee. 33ab bataaen ki qiyaamat kay din vah kis kee beevee hogee? kyoonki saat kay saat bhaaiyon nay us say shaadee kee thee.”
34eesa nay javaab diya, “is zamaanay men log byaah-shaadee kartay aur karaatay hain. 35lekin jinhen allaah aanay vaalay zamaanay men shareek honay aur murdon men say jee uthnay kay laaiq samajhta hai vah us vaqt shaadee naheen karengay, na un kee shaadee kisee say karaaee jaaegee. 36vah mar bhee naheen sakengay, kyoonki vah farishton kee maanind hongay aur qiyaamat kay farzand honay kay baais allaah kay farzand hongay. 37aur yah baat ki murday jee uthengay moosa say bhee zaahir kee gaee hai. kyoonki jab vah kaantedaar jhaadee kay paas aaya to us nay rabb ko yah naam diya, ‘ibraaheem ka khuda, ishaaq ka khuda aur yaaqoob ka khuda,’ haalaanki us vaqt teenon bahut pahelay mar chukay thay. is ka matlab hai ki yah haqeeqat men zinda hain. 38kyoonki allaah murdon ka naheen balki zindon ka khuda hai. us kay nazdeek yah sab zinda hain.”
39yah sun kar shareeat kay kuchh ulma nay kaha, “shaabaash ustaad, aap nay achchha kaha hai.” 40is kay baad unhon nay us say koee bhee savaal karnay kee jur’at na kee.
maseeh kay baaray men savaal
41phir eesa nay un say poochha, “maseeh kay baaray men kyoon kaha jaata hai ki vah daaood ka farzand hai? 42kyoonki daaood khud zaboor kee kitaab men farmaata hai,
‘rabb nay meray rabb say kaha,
meray dahenay haath baith,
43jab tak main teray dushmanon ko teray paaon kee chaukee na bana doon.’
44daaood to khud maseeh ko rabb kaheta hai. to phir vah kis tarah daaood ka farzand ho sakta hai?”
shareeat kay ulma say khabardaar
45jab log sun rahay thay to us nay apnay shaagirdon say kaha, 46“shareeat kay ulma say khabardaar raho! kyoonki vah shaandaar choghay pahen kar idhar udhar phirna pasand kartay hain. jab log baazaaron men salaam karkay un kee izzat kartay hain to phir vah khush ho jaatay hain. un kee bas ek hee khwaahish hotee hai ki ibaadatkhaanon aur ziyaafaton men izzat kee kursiyon par baith jaaen. 47yah log bevaaon kay ghar hadap kar jaatay aur saath saath dikhaavay kay liyay lambee lambee duaaen maangtay hain. aisay logon ko nihaayat sakht saza milegee.”