Looqa 2
eesa kee paidaaish
1un ayyaam men rom kay shahenshaah augustus nay farmaan jaaree kiya ki pooree saltanat kee mardumashumaaree kee jaaay. 2yah pahelee mardumashumaaree us vaqt huee jab kooriniyus shaam ka gavarnar tha. 3har kisee ko apnay vatnee shaher men jaana pada taaki vahaan rajistar men apna naam darj karvaaay.
4chunaanchay yoosuf galeel kay shaher naasrat say ravaana ho kar yahoodiya kay shaher bait-lahem pahuncha. vajah yah thee ki vah daaood baadshaah kay gharaanay aur nasal say tha, aur bait-lahem daaood ka shaher tha. 5chunaanchay vah apnay naam ko rajistar men darj karvaanay kay liyay vahaan gaya. us kee mangetar mariyam bhee saath thee. us vaqt vah ummeed say thee. 6jab vah vahaan thaheray huay thay to bachchay ko janm denay ka vaqt a pahuncha. 7beta paida hua. yah mariyam ka pahela bachcha tha. us nay usay kapdon [a] lafzee tarjuma : potdon men lapet kar ek charnee men lita diya, kyoonki unhen saraay men rahenay kee jagah naheen milee thee.
charvaahon ko khushkhabaree
8us raat kuchh charvaahay qareeb kay khulay maidaan men apnay revdon kee paheraadaaree kar rahay thay. 9achaanak rabb ka ek farishta un par zaahir hua, aur un kay ird-gird rabb ka jalaal chamka. yah dekh kar vah sakht dar gaay. 10lekin farishtay nay un say kaha, “daro mat! dekho main tum ko badee khushee kee khabar deta hoon jo tamaam logon kay liyay hogee. 11aaj hee daaood kay shaher men tumhaaray liyay najaatadihanda paida hua hai yaanee maseeh khudaavand. 12aur tum usay is nishaan say pahechaan logay, tum ek sheerakhwaar bachchay ko kapdon men lipta hua paaogay. vah charnee men pada hua hoga.”
13achaanak aasmaanee lashkaron kay beshumaar farishtay us farishtay kay saath zaahir huay jo allaah kee hamd-o-sana karkay kah rahay thay,
14“aasmaan kee bulandiyon par allaah kee izzat-o-jalaal, zameen par un logon kee salaamatee jo usay manzoor hain.”
15farishtay unhen chhod kar aasmaan par vaapas chalay gaay to charvaahay aapas men kahenay lagay, “aao, ham bait-lahem ja kar yah baat dekhen jo huee hai aur jo rabb nay ham par zaahir kee hai.”
16vah bhaag kar bait-lahem pahunchay. vahaan unhen mariyam aur yoosuf milay aur saath hee chhota bachcha jo charnee men pada hua tha. 17yah dekh kar unhon nay sab kuchh bayaan kiya jo unhen is bachchay kay baaray men bataaya gaya tha. 18jis nay bhee un kee baat sunee vah hairatzada hua. 19lekin mariyam ko yah tamaam baaten yaad raheen aur vah apnay dil men un par ghaur kartee rahee. 20phir charvaahay laut gaay aur chaltay chaltay un tamaam baaton kay liyay allaah kee taazeem-o-taareef kartay rahay jo unhon nay sunee aur dekhee theen, kyoonki sab kuchh vaisa hee paaya tha jaisa farishtay nay unhen bataaya tha.
bachchay ka naam eesa rakha jaata hai
21aath din kay baad bachchay ka khatna karvaanay ka vaqt a gaya. us ka naam eesa rakha gaya, yaanee vahee naam jo farishtay nay mariyam ko us kay haamila honay say pahelay bataaya tha.
eesa ko bait-ul-muqaddas men pesh kiya jaata hai
22jab moosa kee shareeat kay mutaabiq tahaarat kay din pooray huay tab vah bachchay ko yarooshalam lay gaay taaki usay rabb kay huzoor pesh kiya jaaay, 23jaisay rabb kee shareeat men likha hai, “har pahelauthay ko rabb kay liyay makhsoos-o-muqaddas karna hai.” 24saath hee unhon nay mariyam kee tahaarat kee rasm kay liyay vah qurbaanee pesh kee jo rabb kee shareeat bayaan kartee hai, yaanee “do qumriyaan ya do javaan kabootar.”
25us vaqt yarooshalam men ek aadmee banaam shamaaoon raheta tha. vah raastbaaz aur khudaataras tha aur is intizaar men tha ki maseeh a kar israaeel ko sukoon bakhshay. rooh-ul-quds us par tha, 26aur us nay us par yah baat zaahir kee thee ki vah jeetay jee rabb kay maseeh ko dekhega. 27us din rooh-ul-quds nay usay tahereek dee ki vah bait-ul-muqaddas men jaaay. chunaanchay jab mariyam aur yoosuf bachchay ko rabb kee shareeat kay mutaabiq pesh karnay kay liyay bait-ul-muqaddas men aae 28to shamaaoon maujood tha. us nay bachchay ko apnay baazooon men lay kar allaah kee hamd-o-sana kartay huay kaha,
29“ai aaqa, ab too apnay banday ko ijaazat deta hai
ki vah salaamatee say rihalat kar jaaay, jis tarah too nay farmaaya hai.
30kyoonki main nay apnee aankhon say teree us najaat ka mushaahada kar liya hai
31jo too nay tamaam qaumon kee maujoodgee men tayyaar kee hai.
32yah ek aisee raushnee hai jis say ghairyahoodiyon kee aankhen khul jaaengee
aur teree qaum israaeel ko jalaal haasil hoga.”
33bachchay kay maan-baap apnay betay kay baaray men in alfaaz par hairaan huay. 34shamaaoon nay unhen barkat dee aur mariyam say kaha, “yah bachcha muqarrar hua hai ki israaeel kay bahut say log is say thokar kha kar gir jaaen, lekin bahut say is say apnay paaon par khaday bhee ho jaaengay. go yah allaah kee taraf say ek ishaara hai to bhee is kee mukhaalafat kee jaaegee. 35yoon bahuton kay dilee khayaalaat zaahir ho jaaengay. is silsilay men talvaar teree jaan men say bhee guzar jaaegee.”
36vahaan bait-ul-muqaddas men ek umrraseeda nabiya bhee thee jis ka naam hannaah tha. vah fanooel kee betee aur aashar kay qabeelay say thee. shaadee kay saat saal baad us ka shauhar mar gaya tha. 37ab vah beva kee haisiyat say 84 saal kee ho chukee thee. vah kabhee bait-ul-muqaddas ko naheen chhodtee thee, balki din raat allaah ko sijda kartee, roza rakhtee aur dua kartee thee. 38us vaqt vah mariyam aur yoosuf kay paas a kar allaah kee tamjeed karnay lagee. saath saath vah har ek ko jo is intizaar men tha ki allaah fidya day kar yarooshalam ko chhudaaay, bachchay kay baaray men bataatee rahee.
vah naasrat vaapas chalay jaatay hain
39jab eesa kay vaalidain nay rabb kee shareeat men darj tamaam faraaiz ada kar liyay to vah galeel men apnay shaher naasrat ko laut gaay. 40vahaan bachcha parvaan chadha aur taqviyat paata gaya. vah hikmat-o-daanaaee say maamoor tha, aur allaah ka fazl us par tha.
baarah saal kee umr men bait-ul-muqaddas men
41eesa kay vaalidain har saal fasah kee eed kay liyay yarooshalam jaaya kartay thay. 42us saal bhee vah maamool kay mutaabiq eed kay liyay gaay jab eesa baarah saal ka tha. 43eed kay ikhtitaam par vah naasrat vaapas jaanay lagay, lekin eesa yarooshalam men rah gaya. pahelay us kay vaalidain ko maaloom na tha, 44kyoonki vah samajhtay thay ki vah qaafilay men kaheen maujood hai. lekin chaltay chaltay pahela din guzar gaya aur vah ab tak nazar na aaya tha. is par vaalidain usay apnay rishtedaaron aur azeezon men dhoondnay lagay. 45jab vah vahaan na mila to mariyam aur yoosuf yarooshalam vaapas gaay aur vahaan dhoondnay lagay. 46teen din kay baad vah aakhirkaar bait-ul-muqaddas men pahunchay. vahaan eesa deenee ustaadon kay darmiyaan baitha un kee baaten sun raha aur un say savaalaat poochh raha tha. 47jis nay bhee us kee baaten suneen vah us kee samajh aur javaabon say dang rah gaya. 48usay dekh kar us kay vaalidain ghabra gaay. us kee maan nay kaha, “beta, too nay hamaaray saath yah kyoon kiya? tera baap aur main tujhay dhoondtay dhoondtay shadeed kofat ka shikaar huay.”
49eesa nay javaab diya, “aap ko mujhay talaash karnay kee kya zaroorat thee? kya aap ko maaloom na tha ki mujhay apnay baap kay ghar men hona zaroor hai?” 50lekin vah us kee baat na samjhay.
51phir vah un kay saath ravaana ho kar naasrat vaapas aaya aur un kay taabay raha. lekin us kee maan nay yah tamaam baaten apnay dil men mahfooz rakhen. 52yoon eesa javaan hua. us kee samajh aur hikmat badhtee gaee, aur usay allaah aur insaan kee maqbooliyat haasil thee.