Looqa 19
eesa aur zakkaaee
1phir eesa yareehoo men daakhil hua aur us men say guzarnay laga. 2us shaher men ek ameer aadmee banaam zakkaaee raheta tha jo taiks lenay vaalon ka afsar tha. 3vah jaanna chaahata tha ki yah eesa kaun hai, lekin pooree koshish karnay kay baavujood usay dekh na saka, kyoonki eesa kay ird-gird bada hujoom tha aur zakkaaee ka qad chhota tha. 4is liyay vah daud kar aagay nikla aur usay dekhnay kay liyay anjeer-toot [a] ek saayaadaar darakht jis men anjeer kee tarah ka khurdanee phal lagta hai. is kay phool zard aur aaraaishee hotay hain. misree toot. jameez. fichus sayachomorus. kay darakht par chadh gaya jo raastay men tha. 5jab eesa vahaan pahuncha to us nay nazar utha kar kaha, “zakkaaee, jaldee say utar a, kyoonki aaj mujhay teray ghar men thaherna hai.”
6zakkaaee fauran utar aaya aur khushee say us kee mehamaan-navaazee kee. 7yah dekh kar baaqee tamaam log budbudaanay lagay, “is kay ghar men ja kar vah ek gunaahgaar kay mehamaan ban gaay hain.”
8lekin zakkaaee nay khudaavand kay saamnay khaday ho kar kaha, “khudaavand, main apnay maal ka aadha hissa ghareebon ko day deta hoon. aur jis say main nay naajaaiz taur say kuchh liya hai usay chaar guna vaapas karta hoon.”
9eesa nay us say kaha, “aaj is gharaanay ko najaat mil gaee hai, is liyay ki yah bhee ibraaheem ka beta hai. 10kyoonki ibn-ay-aadam gumshuda ko dhoondnay aur najaat denay kay liyay aaya hai.”
paison men izaafaa
11ab eesa yarooshalam kay qareeb a chuka tha, is liyay log andaaza lagaanay lagay ki allaah kee baadshaahee zaahir honay vaalee hai. is kay pesh-ay-nazar eesa nay apnee yah baaten sunnay vaalon ko ek tamseel sunaaee. 12us nay kaha, “ek navaab kisee doordaraaz mulk ko chala gaya taaki usay baadshaah muqarrar kiya jaaay. phir usay vaapas aana tha. 13ravaana honay say pahelay us nay apnay naukron men say das ko bula kar unhen sonay ka ek ek sikka diya. saath saath us nay kaha, ‘yah paisay lay kar us vaqt tak kaarobaar men lagaao jab tak main vaapas na aaoon.’ 14lekin us kee r’aaya us say nafrat rakhtee thee, is liyay us nay us kay peechhay vafad bhej kar ittila dee, ‘ham naheen chaahatay ki yah aadmee hamaara baadshaah banay.’
15to bhee usay baadshaah muqarrar kiya gaya. is kay baad jab vaapas aaya to us nay un naukron ko bulaaya jinhen us nay paisay diay thay taaki maaloom karay ki unhon nay yah paisay kaarobaar men laga kar kitna izaafa kiya hai. 16pahela naukar aaya. us nay kaha, ‘janaab, aap kay ek sikkay say das ho gaay hain.’ 17maalik nay kaha, ‘shaabaash, achchhay naukar. too thoday men vafaadaar raha, is liyay ab tujhay das shaheron par ikhtiyaar milega.’ 18phir doosra naukar aaya. us nay kaha, ‘janaab, aap kay ek sikkay say paanch ho gaay hain.’ 19maalik nay us say kaha, ‘tujhay paanch shaheron par ikhtiyaar milega.’
20phir ek aur naukar a kar kahenay laga, ‘janaab, yah aap ka sikka hai. main nay isay kapday men lapet kar mahfooz rakha, 21kyoonki main aap say darta tha, is liyay ki aap sakht aadmee hain. jo paisay aap nay naheen lagaaay unhen lay letay hain aur jo beej aap nay naheen boya us kee fasal kaattay hain.’ 22maalik nay kaha, ‘shareer naukar! main teray apnay alfaaz kay mutaabiq teree adaalat karoonga. jab too jaanta tha ki main sakht aadmee hoon, ki vah paisay lay leta hoon jo khud naheen lagaaay aur vah fasal kaatta hoon jis ka beej naheen boya, 23to phir too nay meray paisay baink men kyoon na jama karaaay? agar too aisa karta to vaapsee par mujhay kam az kam vah paisay sood samet mil jaatay.’
24yah kah kar vah haazireen say mukhaatib hua, ‘yah sikka is say lay kar us naukar ko day do jis kay paas das sikkay hain.’ 25unhon nay etiraaz kiya, ‘janaab, us kay paas to pahelay hee das sikkay hain.’ 26us nay javaab diya, ‘main tumhen bataata hoon ki har shakhs jis kay paas kuchh hai usay aur diya jaaega, lekin jis kay paas kuchh naheen hai us say vah bhee chheen liya jaaega jo us kay paas hai. 27ab un dushmanon ko lay aao jo naheen chaahatay thay ki main un ka baadshaah banoon. unhen meray saamnay phaansee day do’.”
yarooshalam men eesa ka purjosh istiqbaal
28in baaton kay baad eesa doosron kay aagay aagay yarooshalam kee taraf badhnay laga. 29jab vah bait-fagay aur bait-aniyaah kay qareeb pahuncha jo zaitoon kay pahaad par thay to us nay do shaagirdon ko apnay aagay bhej kar 30kaha, “saamnay vaalay gaaon men jaao. vahaan tum ek javaan gadha dekhogay. vah bandha hua hoga aur ab tak koee bhee us par savaar naheen hua hai. usay khol kar lay aao. 31agar koee poochhay ki gadhay ko kyoon khol rahay ho to usay bata dena ki khudaavand ko is kee zaroorat hai.”
32donon shaagird gaay to dekha ki sab kuchh vaisa hee hai jaisa eesa nay unhen bataaya tha. 33jab vah javaan gadhay ko kholnay lagay to us kay maalikon nay poochha, “tum gadhay ko kyoon khol rahay ho?”
34unhon nay javaab diya, “khudaavand ko is kee zaroorat hai.” 35vah usay eesa kay paas lay aaay, aur apnay kapday gadhay par rakh kar us ko us par savaar kiya. 36jab vah chal pada to logon nay us kay aagay aagay raastay men apnay kapday bichha diay.
37chaltay chaltay vah us jagah kay qareeb pahuncha jahaan raasta zaitoon kay pahaad par say utarnay lagta hai. is par shaagirdon ka poora hujoom khushee kay maaray oonchee aavaaz say un mojizon kay liyay allaah kee tamjeed karnay laga jo unhon nay dekhay thay,
38“mubaarak hai vah baadshaah
jo rabb kay naam say aata hai.
aasmaan par salaamatee ho aur bulandiyon par izzat-o-jalaal.”
39kuchh fareesee bheed men thay. unhon nay eesa say kaha, “ustaad, apnay shaagirdon ko samjhaaen.”
40us nay javaab diya, “main tumhen bataata hoon, agar yah chup ho jaaen to patthar pukaar uthengay.”
eesa shaher ko dekh kar ro padta hai
41jab vah yarooshalam kay qareeb pahuncha to shaher ko dekh kar ro padaa 42aur kaha, “kaash too bhee is din pahechaan letee ki teree salaamatee kis men hai. lekin ab yah baat teree aankhon say chhupee huee hai. 43kyoonki tujh par aisa vaqt aaega ki teray dushman teray ird-gird band baandh kar tera muhaasara karengay aur yoon tujhay chaaron taraf say gher kar tang karengay. 44vah tujhay teray bachchon samet zameen par patkengay aur teray andar ek bhee patthar doosray par naheen chhodengay. aur vajah yahee hogee ki too nay vah vaqt naheen pahechaana jab allaah nay teree najaat kay liyay tujh par nazar kee.”
eesa bait-ul-muqaddas men jaata hai
45phir eesa bait-ul-muqaddas men ja kar unhen nikaalnay laga jo vahaan qurbaaniyon kay liyay darkaar cheezen bech rahay thay. us nay kaha, 46“kalaam-ay-muqaddas men likha hai, ‘mera ghar dua ka ghar hoga’ jabki tum nay usay daakuon kay adday men badal diya hai.”
47aur vah rozaana bait-ul-muqaddas men taaleem deta raha. lekin bait-ul-muqaddas kay raahanuma imaam, shareeat kay aalim aur avaamee raahanuma usay qatl karnay kay liyay koshaan rahay, 48alabatta unhen koee mauqa na mila, kyoonki tamaam log eesa kee har baat sun sun kar us say liptay rahetay thay.