Looqa 18
beva aur jaj kee tamseel
1phir eesa nay unhen ek tamseel sunaaee jo musalsal dua karnay aur himmat na haarnay kee zaroorat ko zaahir kartee hai. 2us nay kaha, “kisee shaher men ek jaj raheta tha jo na khuda ka khauf maanta, na kisee insaan ka lihaaz karta tha. 3ab us shaher men ek beva bhee thee jo yah kah kar us kay paas aatee rahee ki ‘meray mukhaalif ko jeetnay na den balki mera insaaf karen.’ 4kuchh der kay liyay jaj nay inkaar kiya. lekin phir vah dil men kahenay laga, ‘beshak main khuda ka khauf naheen maanta, na logon kee parva karta hoon, 5lekin yah beva mujhay baar baar tang kar rahee hai. is liyay main us ka insaaf karoonga. aisa na ho ki aakhirkaar vah a kar meray munh par thappad maaray’.”
6khudaavand nay baat jaaree rakhee. “is par dhyaan do jo beinsaaf jaj nay kaha. 7agar us nay aakhirkaar insaaf kiya to kya allaah apnay chunay huay logon ka insaaf naheen karega jo din raat usay madad kay liyay pukaartay hain? kya vah un kee baat multavee karta rahega? 8hargiz naheen! main tum ko bataata hoon ki vah jaldee say un ka insaaf karega. lekin kya ibn-ay-aadam jab duniya men aaega to eemaan dekh paaega?”
fareesee aur taiks lenay vaalay kee tamseel
9baaz log maujood thay jo apnee raastbaazee par bharosa rakhtay aur doosron ko haqeer jaantay thay. unhen eesa nay yah tamseel sunaaee, 10“do aadmee bait-ul-muqaddas men dua karnay aaay. ek fareesee tha aur doosra taiks lenay vaala.
11fareesee khada ho kar yah dua karnay laga, ‘ai khuda, main tera shukr karta hoon ki main baaqee logon kee tarah naheen hoon. na main daakoo hoon, na beinsaaf, na zinaakaar. main is taiks lenay vaalay kee maanind bhee naheen hoon. 12main haftay men do martaba roza rakhta hoon aur tamaam aamdanee ka dasvaan hissa teray liyay makhsoos karta hoon.’
13lekin taiks lenay vaala door hee khada raha. us nay apnee aankhen aasmaan kee taraf uthaanay tak kee jur’at na kee balki apnee chhaatee peet peet kar kahenay laga, ‘ai khuda, mujh gunaahgaar par rahem kar!’ 14main tum ko bataata hoon ki jab donon apnay apnay ghar lautay to fareesee naheen balki yah aadmee allaah kay nazdeek raastbaaz thahera. kyoonki jo bhee apnay aap ko sarfaraaz karay usay past kiya jaaega aur jo apnay aap ko past karay usay sarfaraaz kiya jaaega.”
eesa chhotay bachchon ko piyaar karta hai
15ek din log apnay chhotay bachchon ko bhee eesa kay paas laaay taaki vah unhen chhuay. yah dekh kar shaagirdon nay un ko malaamat kee. 16lekin eesa nay unhen apnay paas bula kar kaha, “bachchon ko meray paas aanay do aur unhen na roko, kyoonki allaah kee baadshaahee in jaisay logon ko haasil hai. 17main tum ko sachch bataata hoon, jo allaah kee baadshaahee ko bachchay kee tarah qabool na karay vah us men daakhil naheen hoga.”
ameer mushkil say allaah kee baadshaahee men daakhil ho saktay hain
18kisee raahanuma nay us say poochha, “nek ustaad, main kya karoon taaki meeraas men abdee zindagee paaoon?”
19eesa nay javaab diya, “too mujhay nek kyoon kaheta hai? koee nek naheen siva-ay-ek kay aur vah hai allaah. 20too shareeat kay ahkaam say to vaaqif hai ki zina na karna, qatl na karna, choree na karna, jhootee gavaahee na dena, apnay baap aur apnee maan kee izzat karna.”
21aadmee nay javaab diya, “main nay javaanee say aaj tak in tamaam ahkaam kee pairvee kee hai.”
22yah sun kar eesa nay kaha, “ek kaam ab tak rah gaya hai. apnee pooree jaaydaad farokht karkay paisay ghareebon men taqseem kar day. phir teray liyay aasmaan par khazaana jama ho jaaega. is kay baad a kar meray peechhay ho lay.” 23yah sun kar aadmee ko bahut dukh hua, kyoonki vah nihaayat daulatmand tha.
24yah dekh kar eesa nay kaha, “daulatmandon kay liyay allaah kee baadshaahee men daakhil hona kitna mushkil hai! 25ameer kay allaah kee baadshaahee men daakhil honay kee nisbat yah ziyaada aasaan hai ki oont sooee kay naakay men say guzar jaaay.”
26yah baat sun kar sunnay vaalon nay poochha, “phir kis ko najaat mil saktee hai?”
27eesa nay javaab diya, “jo insaan kay liyay naamumkin hai vah allaah kay liyay mumkin hai.”
28patras nay us say kaha, “ham to apna sab kuchh chhod kar aap kay peechhay ho liyay hain.”
29eesa nay javaab diya, “main tum ko sachch bataata hoon ki jis nay bhee allaah kee baadshaahee kee khaatir apnay ghar, beevee, bhaaiyon, vaalidain ya bachchon ko chhod diya hai 30usay is zamaanay men kaee guna ziyaada aur aanay vaalay zamaanay men abdee zindagee milegee.”
eesa kee maut kee teesree peshgoee
31eesa shaagirdon ko ek taraf lay ja kar un say kahenay laga, “suno, ham yarooshalam kee taraf badh rahay hain. vahaan sab kuchh poora ho jaaega jo nabiyon kee maarifat ibn-ay-aadam kay baaray men likha gaya hai. 32usay ghairyahoodiyon kay havaalay kar diya jaaega jo us ka mazaaq udaaengay, us kee beizzatee karengay, us par thookengay, 33us ko koday maarengay aur usay qatl karengay. lekin teesray din vah jee uthega.”
34lekin shaagirdon kee samajh men kuchh na aaya. is baat ka matlab un say chhupa raha aur vah na samjhay ki vah kya kah raha hai.
andhay kee shifaa
35eesa yareehoo kay qareeb pahuncha. vahaan raastay kay kinaaray ek andha baitha bheek maang raha tha. 36bahut say log us kay saamnay say guzarnay lagay to us nay yah sun kar poochha ki kya ho raha hai.
37unhon nay kaha, “eesa naasree yahaan say guzar raha hai.”
38andha chillaanay laga, “ai eesa ibn-ay-daaood, mujh par rahem karen.”
39aagay chalnay vaalon nay usay daant kar kaha, “khaamosh!” lekin vah mazeed oonchee aavaaz say pukaarta raha, “ai ibn-ay-daaood, mujh par rahem karen.”
40eesa ruk gaya aur hukm diya, “usay meray paas laao.” jab vah qareeb aaya to eesa nay us say poochha, 41“too kya chaahata hai ki main teray liyay karoon?”
us nay javaab diya, “khudaavand, yah ki main dekh sakoon.”
42eesa nay us say kaha, “to phir dekh! teray eemaan nay tujhay bacha liya hai.”
43joon hee us nay yah kaha andhay kee aankhen bahaal ho gaeen aur vah allaah kee tamjeed kartay huay us kay peechhay ho liya. yah dekh kar pooray hujoom nay allaah ko jalaal diya.