Looqa 17
gunaah
1eesa nay apnay shaagirdon say kaha, “aazmaaishon ko to aana hee aana hai, lekin us par afsos jis kee maarifat vah aaen. 2agar vah in chhoton men say kisee ko gunaah karnay par uksaaay to us kay liyay behatar hai ki us kay galay men badee chakkee ka paat baandha jaaay aur usay samundar men phaink diya jaaay. 3khabardaar raho!
agar tumhaara bhaaee gunaah karay to usay samjhaao. agar vah is par tauba karay to usay muaaf kar do. 4ab farz karo ki vah ek din kay andar saat baar tumhaara gunaah karay, lekin har dafa vaapas a kar tauba ka izhaar karay, to bhee usay har dafa muaaf kar do.”
eemaan
5rasoolon nay khudaavand say kaha, “hamaaray eemaan ko badha den.”
6khudaavand nay javaab diya, “agar tumhaara eemaan raaee kay daanay jaisa chhota bhee ho to tum shahtoot kay is darakht ko kah saktay ho, ‘ukhad kar samundar men ja lag’ to vah tumhaaree baat par amal karega.
ghulaam ka farz
7farz karo ki tum men say kisee nay hal chalaanay ya jaanvar charaanay kay liyay ek ghulaam rakha hai. jab yah ghulaam khet say ghar aaega to kya us ka maalik kahega, ‘idhar aao, khaanay kay liyay baith jaao?’ 8hargiz naheen, balki vah yah kahega, ‘mera khaana tayyaar karo, dyootee kay kapday pahen kar meree khidmat karo jab tak main kha pee na loon. is kay baad tum bhee kha aur pee sakogay.’ 9aur kya vah apnay ghulaam kee us khidmat ka shukriya ada karega jo us nay usay karnay ko kaha tha? hargiz naheen! 10isee tarah jab tum sab kuchh jo tumhen karnay ko kaha gaya hai kar chuko tab tum ko yah kahena chaahiay, ‘ham naalaaiq naukar hain. ham nay sirf apna farz ada kiya hai’.”
kodh kay das mareezon kee shifaa
11aisa hua ki yarooshalam kee taraf safar kartay kartay eesa saamriya aur galeel men say guzra. 12ek din vah kisee gaaon men daakhil ho raha tha ki kodh kay das mareez us ko milnay aaay. vah kuchh faasilay par khaday ho kar 13oonchee aavaaz say kahenay lagay, “ai eesa, ustaad, ham par rahem karen.”
14us nay unhen dekha to kaha, “jaao, apnay aap ko imaamon ko dikhaao taaki vah tumhaara muaaina karen.”
aur aisa hua ki vah chaltay chaltay apnee beemaaree say paak-saaf ho gaay. 15un men say ek nay jab dekha ki shifa mil gaee hai to vah mud kar oonchee aavaaz say allaah kee tamjeed karnay laga, 16aur eesa kay saamnay munh kay bal gir kar shukriya ada kiya. yah aadmee saamriya ka baashinda tha. 17eesa nay poochha, “kya das kay das aadmee apnee beemaaree say paak-saaf naheen huay? baaqee nau kahaan hain? 18kya is ghairmulkee kay ilaava koee aur vaapas a kar allaah kee tamjeed karnay kay liyay tayyaar naheen tha?” 19phir us nay us say kaha, “uth kar chala ja. teray eemaan nay tujhay bacha liya hai.”
allaah kee baadshaahee kab aaegee
20kuchh fareesiyon nay eesa say poochha, “allaah kee baadshaahee kab aaegee?” us nay javaab diya, “allaah kee baadshaahee yoon naheen a rahee ki usay zaahiree nishaanon say pahechaana jaaay. 21log yah bhee naheen kah sakengay, ‘vah yahaan hai’ ya ‘vah vahaan hai’ kyoonki allaah kee baadshaahee tumhaaray darmiyaan hai.”
22phir us nay apnay shaagirdon say kaha, “aisay din aaengay ki tum ibn-ay-aadam ka kam az kam ek din dekhnay kee tamanna karogay, lekin naheen dekhogay. 23log tum ko bataaengay, ‘vah vahaan hai’ ya ‘vah yahaan hai.’ lekin mat jaana aur un kay peechhay na lagna. 24kyoonki jab ibn-ay-aadam ka din aaega to vah bijlee kee maanind hoga jis kee chamak aasmaan ko ek siray say lay kar doosray siray tak raushan kar detee hai. 25lekin pahelay laazim hai ki vah bahut dukh uthaaay aur is nasal kay haathon radd kiya jaaay. 26jab ibn-ay-aadam ka vaqt aaega to haalaat nooh kay dinon jaisay hongay. 27log us din tak khaanay-peenay aur shaadee karnay karvaanay men lagay rahay jab tak nooh kashtee men daakhil na ho gaya. phir sailaab nay a kar un sab ko tabaah kar diya. 28bilkul yahee kuchh loot kay ayyaam men hua. log khaanay-peenay, khareed-o-farokht, kaashtkaaree aur taameer kay kaam men lagay rahay. 29lekin jab loot sadoom ko chhod kar nikla to aag aur gandhak nay aasmaan say baras kar un sab ko tabaah kar diya. 30ibn-ay-aadam kay zuhoor kay vaqt aisay hee haalaat hongay.
31jo shakhs us din chhat par ho vah ghar ka saamaan saath lay jaanay kay liyay neechay na utray. isee tarah jo khet men ho vah apnay peechhay padee cheezon ko saath lay jaanay kay liyay ghar na lautay. 32loot kee beevee ko yaad rakho. 33jo apnee jaan bachaanay kee koshish karega vah usay kho dega, aur jo apnee jaan kho dega vahee usay bachaaay rakhega. 34main tum ko bataata hoon ki us raat do afraad ek bistar men soay hongay, ek ko saath lay liya jaaega jabki doosray ko peechhay chhod diya jaaega. 35do khavaateen chakkee par gandum pees rahee hongee, ek ko saath lay liya jaaega jabki doosree ko peechhay chhod diya jaaega. 36[do afraad khet men hongay, ek ko saath lay liya jaaega jabki doosray ko peechhay chhod diya jaaega.]”
37unhon nay poochha, “khudaavand, yah kahaan hoga?” us nay javaab diya, “jahaan laash padee ho vahaan giddh jama ho jaaengay.”