Looqa 15

khoee huee bhed

¹ab aisa tha ki tamaam taiks lenay vaalay aur gunaahgaar eesa kee baaten sunnay kay liyay us kay paas aatay thay. ²yah dekh kar fareesee aur shareeat kay aalim budbudaanay lagay, “yah aadmee gunaahgaaron ko khush’aamadeed kah kar un kay saath khaana khaata hai.” ³is par eesa nay unhen yah tamseel sunaaee,

⁴“farz karo ki tum men say kisee kee sau bheden hain. lekin ek gum ho jaatee hai. ab maalik kya karega? kya vah baaqee 99 bheden khulay maidaan men chhod kar gumshuda bhed ko dhoondnay naheen jaaega? zaroor jaaega, balki jab tak usay vah bhed mil na jaaay vah us kee talaash men rahega. ⁵phir vah khush ho kar usay apnay kandhon par utha lega. ⁶yoon chaltay chaltay vah apnay ghar pahunch jaaega aur vahaan apnay doston aur hamsaaiyon ko bula kar un say kahega, ‘meray saath khushee manaao! kyoonki mujhay apnee khoee huee bhed mil gaee hai.’ ⁷main tum ko bataata hoon ki aasmaan par bilkul isee tarah khushee manaaee jaaegee jab ek hee gunaahgaar tauba karega. aur yah khushee us khushee kee nisbat ziyaada hogee jo un 99 afraad kay baais manaaee jaaegee jinhen tauba karnay kee zaroorat hee naheen thee.

gumshuda sikkaa

⁸ya farz karo ki kisee aurat kay paas das sikkay hon lekin ek sikka gum ho jaaay. ab aurat kya karegee? kya vah charaagh jala kar aur ghar men jhaadoo day day kar badee ehatiyaat say sikkay ko talaash naheen karegee? zaroor karegee, balki vah us vaqt tak dhoondtee rahegee jab tak usay sikka mil na jaaay. ⁹jab usay sikka mil jaaega to vah apnee saheliyon aur hamsaaiyon ko bula kar un say kahegee, ‘meray saath khushee manaao! kyoonki mujhay apna gumshuda sikka mil gaya hai.’ ¹⁰main tum ko bataata hoon ki bilkul isee tarah allaah kay farishton kay saamnay khushee manaaee jaatee hai jab ek bhee gunaahgaar tauba karta hai.”

gumshuda betaa

¹¹eesa nay apnee baat jaaree rakhee. “kisee aadmee kay do betay thay. ¹²in men say chhotay nay baap say kaha, ‘ai baap, meeraas ka mera hissa day den.’ is par baap nay donon men apnee milkiyat taqseem kar dee. ¹³thoday dinon kay baad chhota beta apna saara saamaan samet kar apnay saath kisee doordaraaz mulk men lay gaya. vahaan us nay ayyaashee men apna poora maal-o-mata uda diya. ¹⁴sab kuchh zaaay ho gaya to us mulk men sakht kaal pada. ab vah zarooratmand honay laga. ¹⁵nateejay men vah us mulk kay kisee baashinday kay haan ja pada jis nay usay sooaron ko charaanay kay liyay apnay kheton men bhej diya. ¹⁶vahaan vah apna pet un phaliyon say bharnay kee shadeed khwaahish rakhta tha jo sooar khaatay thay, lekin usay is kee bhee ijaazat na milee. ¹⁷phir vah hosh men aaya. vah kahenay laga, meray baap kay kitnay mazdooron ko kasrat say khaana milta hai jabki main yahaan bhooka mar raha hoon. ¹⁸main uth kar apnay baap kay paas vaapas chala jaaoonga aur us say kahoonga, ‘ai baap, main nay aasmaan ka aur aap ka gunaah kiya hai. ¹⁹ab main is laaiq naheen raha ki aap ka beta kahelaaoon. meharbaanee karkay mujhay apnay mazdooron men rakh len.’ ²⁰phir vah uth kar apnay baap kay paas vaapas chala gaya.

lekin vah ghar say abhee door hee tha ki us kay baap nay usay dekh liya. usay taras aaya aur vah bhaag kar betay kay paas aaya aur galay laga kar usay bosa diya. ²¹betay nay kaha, ‘ai baap, main nay aasmaan ka aur aap ka gunaah kiya hai. ab main is laaiq naheen raha ki aap ka beta kahelaaoon.’ ²²lekin baap nay apnay naukron ko bulaaya aur kaha, ‘jaldee karo, behtareen soot la kar isay pahenaao. is kay haath men angoothee aur paaon men jootay pahena do. ²³phir mota-taaza bachhda la kar usay zabah karo taaki ham khaaen aur khushee manaaen, ²⁴kyoonki yah mera beta murda tha ab zinda ho gaya hai, gum ho gaya tha ab mil gaya hai.’ is par vah khushee manaanay lagay.

²⁵is dauraan baap ka bada beta khet men tha. ab vah ghar lauta. jab vah ghar kay qareeb pahuncha to andar say mooseeqee aur naachnay kee aavaazen sunaaee deen. ²⁶us nay kisee naukar ko bula kar poochha, ‘yah kya ho raha hai?’ ²⁷naukar nay javaab diya, ‘aap ka bhaaee a gaya hai aur aap kay baap nay mota-taaza bachhda zabah karvaaya hai, kyoonki usay apna beta saheeh-salaamat vaapas mil gaya hai.’

²⁸yah sun kar bada beta ghussay hua aur andar jaanay say inkaar kar diya. phir baap ghar say nikal kar usay samjhaanay laga. ²⁹lekin us nay javaab men apnay baap say kaha, ‘dekhen, main nay itnay saal aap kee khidmat men sakht mehanat-mashaqqat kee hai aur ek dafa bhee aap kee marzee kee khilaafvarzee naheen kee. to bhee aap nay mujhay is pooray arsay men ek chhota bakra bhee naheen diya ki usay zabah karkay apnay doston kay saath ziyaafat karta. ³⁰lekin joon hee aap ka yah beta aaya jis nay aap kee daulat kasbiyon men uda dee, aap nay us kay liyay mota-taaza bachhda zabah karvaaya.’ ³¹baap nay javaab diya, ‘beta, aap to har vaqt meray paas rahay hain, aur jo kuchh mera hai vah aap hee ka hai. ³²lekin ab zarooree tha ki ham jashn manaaen aur khush hon. kyoonki aap ka yah bhaaee jo murda tha ab zinda ho gaya hai, jo gum ho gaya tha ab mil gaya hai’.”