Looqa 14
sabat kay din mareez kee shifaa
1sabat kay ek din eesa khaanay kay liyay fareesiyon kay kisee raahanuma kay ghar aaya. log usay pakadnay kay liyay us kee har harkat par nazar rakhay huay thay. 2vahaan ek aadmee eesa kay saamnay tha jis kay baazoo aur taangen phoolay huay thay. 3yah dekh kar vah fareesiyon aur shareeat kay aalimon say poochhnay laga, “kya shareeat sabat kay din shifa denay kee ijaazat detee hai?”
4lekin vah khaamosh rahay. phir us nay us aadmee par haath rakha aur usay shifa day kar rukhsat kar diya. 5haazireen say vah kahenay laga, “agar tum men say kisee ka beta ya bail sabat kay din kuen men gir jaaay to kya tum usay fauran naheen nikaalogay?”
6is par vah koee javaab na day sakay.
izzat aur ajr haasil karnay ka tareeqaa
7jab eesa nay dekha ki mehamaan mez par izzat kee kursiyaan chun rahay hain to us nay unhen yah tamseel sunaaee, 8“jab tujhay kisee shaadee kee ziyaafat men shareek honay kee daavat dee jaaay to vahaan ja kar izzat kee kursee par na baithna. aisa na ho ki kisee aur ko bhee daavat dee gaee ho jo tujh say ziyaada izzatdaar hai. 9kyoonki jab vah pahunchega to mezbaan teray paas a kar kahega, ‘zara is aadmee ko yahaan baithnay day.’ yoon teree beizzatee ho jaaegee aur tujhay vahaan say uth kar aakhiree kursee par baithna padega. 10is liyay aisa mat karna balki jab tujhay daavat dee jaaay to ja kar aakhiree kursee par baith ja. phir jab mezbaan tujhay vahaan baitha hua dekhega to vah kahega, ‘dost, saamnay vaalee kursee par baith.’ is tarah tamaam mehamaanon kay saamnay teree izzat ho jaaegee. 11kyoonki jo bhee apnay aap ko sarfaraaz karay usay past kiya jaaega aur jo apnay aap ko past karay usay sarfaraaz kiya jaaega.”
12phir eesa nay mezbaan say baat kee, “jab too logon ko dopaher ya shaam ka khaana khaanay kee daavat dena chaahata hai to apnay doston, bhaaiyon, rishtedaaron ya ameer hamsaaiyon ko na bula. aisa na ho ki vah is kay ivz tujhay bhee daavat den. kyoonki agar vah aisa karen to yahee tera muaavaza hoga. 13is kay bajaay ziyaafat kartay vaqt ghareebon, langadon, mafloojon aur andhon ko daavat day. 14aisa karnay say tujhay barkat milegee. kyoonki vah tujhay is kay ivz kuchh naheen day sakengay, balki tujhay is ka muaavaza us vaqt milega jab raastbaaz jee uthengay.”
badee ziyaafat kee tamseel
15yah sun kar mehamaanon men say ek nay us say kaha, “mubaarak hai vah jo allaah kee baadshaahee men khaana khaaay.”
16eesa nay javaab men kaha, “kisee aadmee nay ek badee ziyaafat ka intizaam kiya. is kay liyay us nay bahut say logon ko daavat dee. 17jab ziyaafat ka vaqt aaya to us nay apnay naukar ko mehamaanon ko ittila denay kay liyay bheja ki ‘aaen, sab kuchh tayyaar hai.’ 18lekin vah sab kay sab maazrat chaahanay lagay. pahelay nay kaha, ‘main nay khet khareeda hai aur ab zarooree hai ki nikal kar us ka muaaina karoon. main maazrat chaahata hoon.’ 19doosray nay kaha, ‘main nay bailon kay paanch joday khareeday hain. ab main unhen aazmaanay ja raha hoon. main maazrat chaahata hoon.’ 20teesray nay kaha, ‘main nay shaadee kee hai, is liyay naheen a sakta.’
21naukar nay vaapas a kar maalik ko sab kuchh bataaya. vah ghussay ho kar naukar say kahenay laga, ‘ja, seedhay shaher kee sadkon aur galiyon men ja kar vahaan kay ghareebon, langadon, andhon aur mafloojon ko lay a.’ naukar nay aisa hee kiya. 22phir vaapas a kar us nay maalik ko ittila dee, ‘janaab, jo kuchh aap nay kaha tha poora ho chuka hai. lekin ab bhee mazeed logon kay liyay gunjaaish hai.’ 23maalik nay us say kaha, phir shaher say nikal kar deehaat kee sadkon par aur baadon kay paas ja. jo bhee mil jaaay usay hamaaree khushee men shareek honay par majboor kar taaki mera ghar bhar jaaay. 24kyoonki main tum ko bataata hoon ki jin ko pahelay daavat dee gaee thee un men say koee bhee meree ziyaafat men shareek na hoga.”
shaagird honay kee qeemat
25ek bada hujoom eesa kay saath chal raha tha. un kee taraf mud kar us nay kaha, 26“agar koee meray paas a kar apnay baap, maan, beevee, bachchon, bhaaiyon, bahenon balki apnay aap say bhee dushmanee na rakhay to vah mera shaagird naheen ho sakta. 27aur jo apnee saleeb utha kar meray peechhay na ho lay vah mera shaagird naheen ho sakta.
28agar tum men say koee burj taameer karna chaahay to kya vah pahelay baith kar pooray akhraajaat ka andaaza naheen lagaaega taaki maaloom ho jaaay ki vah usay takmeel tak pahuncha sakega ya naheen? 29varna khatra hai ki us kee bunyaad daalnay kay baad paisay khatm ho jaaen aur vah aagay kuchh na bana sakay. phir jo koee bhee dekhega vah us ka mazaaq uda kar 30kahega, ‘us nay imaarat ko shuroo to kiya, lekin ab usay mukammal naheen kar paaya.’
31ya agar koee baadshaah kisee doosray baadshaah kay saath jang kay liyay niklay to kya vah pahelay baith kar andaaza naheen lagaaega ki vah apnay das hazaar faujiyon say un bees hazaar faujiyon par ghaalib a sakta hai jo us say ladnay a rahay hain? 32agar vah is nateejay par pahunchay ki ghaalib naheen a sakta to vah sulah karnay kay liyay apnay numaainday dushman kay paas bhejega jab vah abhee door hee ho. 33isee tarah tum men say jo bhee apna sab kuchh na chhoday vah mera shaagird naheen ho sakta.
bekaar namak
34namak achchhee cheez hai. lekin agar us ka zaaiqa jaata rahay to phir usay kyoonkar dubaara namkeen kiya ja sakta hai? 35na vah zameen kay liyay mufeed hai, na khaad kay liyay balki usay nikaal kar baahar phainka jaaega. jo sun sakta hai vah sun lay.”