Looqa 13
tauba karo varna halaak ho jaaoge
1us vaqt kuchh log eesa kay paas pahunchay. unhon nay usay galeel kay kuchh logon kay baaray men bataaya jinhen peelaatus nay us vaqt qatl karvaaya tha jab vah bait-ul-muqaddas men qurbaaniyaan pesh kar rahay thay. yoon un ka khoon qurbaaniyon kay khoon kay saath milaaya gaya tha. 2eesa nay yah sun kar poochha, “kya tumhaaray khayaal men yah log galeel kay baaqee logon say ziyaada gunaahgaar thay ki inhen itna dukh uthaana pada? 3hargiz naheen! balki main tum ko bataata hoon ki agar tum tauba na karo to tum bhee isee tarah tabaah ho jaaogay. 4ya un 18 afraad kay baaray men tumhaara kya khayaal hai jo mar gaay jab shilokh ka burj un par gira? kya vah yarooshalam kay baaqee baashindon kee nisbat ziyaada gunaahgaar thay? 5hargiz naheen! main tum ko bataata hoon ki agar tum tauba na karo to tum bhee tabaah ho jaaogay.”
bephal anjeer ka darakht
6phir eesa nay unhen yah tamseel sunaaee, “kisee nay apnay baagh men anjeer ka darakht lagaaya. jab vah us ka phal todnay kay liyay aaya to koee phal naheen tha. 7yah dekh kar us nay maalee say kaha, ‘main teen saal say is ka phal todnay aata hoon, lekin aaj tak kuchh bhee naheen mila. isay kaat daal. yah zameen kee taaqat kyoon khatm karay?’ 8lekin maalee nay kaha, ‘janaab, isay ek saal aur rahenay den. main is kay ird-gird godee karkay khaad daaloonga. 9phir agar yah aglay saal phal laaya to theek, varna isay katva daalna’.”
sabat kay din kubdee aurat kee shifaa
10sabat kay din eesa kisee ibaadatkhaanay men taaleem day raha tha. 11vahaan ek aurat thee jo 18 saal say badruh kay baais beemaar thee. vah kubdee ho gaee thee aur seedhee khadee honay kay bilkul qaabil na thee. 12jab eesa nay usay dekha to pukaar kar kaha, “ai aurat, too apnee beemaaree say chhoot gaee hai!” 13us nay apnay haath us par rakhay to vah fauran seedhee khadee ho kar allaah kee tamjeed karnay lagee.
14lekin ibaadatkhaanay ka raahanuma naaraaz hua kyoonki eesa nay sabat kay din shifa dee thee. us nay logon say kaha, “haftay kay chhah din kaam karnay kay liyay hotay hain. is liyay itwaar say lay kar jumaay tak shifa paanay kay liyay aao, na ki sabat kay din.”
15khudaavand nay javaab men us say kaha, “tum kitnay riyaakaar ho! kya tum men say har koee sabat kay din apnay bail ya gadhay ko khol kar usay thaan say baahar naheen lay jaata taaki usay paanee pilaaay? 16ab is aurat ko dekho jo ibraaheem kee betee hai aur jo 18 saal say iblees kay bandhan men thee. jab tum sabat kay din apnay jaanvaron kee madad kartay ho to kya yah theek naheen ki aurat ko is bandhan say rihaaee dilaaee jaatee, chaahay yah kaam sabat kay din hee kyoon na kiya jaaay?” 17eesa kay is javaab say us kay mukhaalif sharminda ho gaay. lekin aam log us kay in tamaam shaandaar kaamon say khush huay.
raaee kay daanay kee tamseel
18eesa nay kaha, “allaah kee baadshaahee kis cheez kee maanind hai? main is ka muvaazna kis say karoon? 19vah raaee kay ek daanay kee maanind hai jo kisee nay apnay baagh men bo diya. badhtay badhtay vah darakht sa ban gaya aur parindon nay us kee shaakhon men apnay ghonslay bana liyay.”
khameer kee misaal
20us nay dubaara poochha, “allaah kee baadshaahee ka kis cheez say muvaazna karoon? 21vah us khameer kee maanind hai jo kisee aurat nay lay kar taqreeban 27 kilograam aatay men mila diya. go vah us men chhup gaya to bhee hotay hotay pooray gundhay huay aatay ko khameer kar gaya.”
tang darvaazaa
22eesa taaleem detay detay mukhtalif shaheron aur deehaaton men say guzra. ab us ka rukh yarooshalam hee kee taraf tha. 23itnay men kisee nay us say poochha, “khudaavand, kya kam logon ko najaat milegee?”
us nay javaab diya, 24“tang darvaazay men say daakhil honay kee sirtod koshish karo. kyoonki main tum ko bataata hoon ki bahut say log andar jaanay kee koshish karengay, lekin befaaida. 25ek vaqt aaega ki ghar ka maalik uth kar darvaaza band kar dega. phir tum baahar khaday rahogay aur khatkhataatay khatkhataatay iltimaas karogay, ‘khudaavand, hamaaray liyay darvaaza khol den.’ lekin vah javaab dega, ‘na main tum ko jaanta hoon, na yah ki tum kahaan kay ho.’ 26phir tum kahogay, ‘ham nay to aap kay saamnay hee khaaya aur piya aur aap hee hamaaree sadkon par taaleem detay rahay.’ 27lekin vah javaab dega, ‘na main tum ko jaanta hoon, na yah ki tum kahaan kay ho. ai tamaam badkaaro, mujh say door ho jaao!’ 28vahaan tum rotay aur daant peestay rahogay. kyoonki tum dekhogay ki ibraaheem, ishaaq, yaaqoob aur tamaam nabee allaah kee baadshaahee men hain jabki tum ko nikaal diya gaya hai. 29aur log mashriq, maghrib, shimaal aur junoob say a kar allaah kee baadshaahee kee ziyaafat men shareek hongay. 30us vaqt kuchh aisay hongay jo pahelay aakhir thay, lekin ab avval hongay. aur kuchh aisay bhee hongay jo pahelay avval thay, lekin ab aakhir hongay.”
yarooshalam par afsos
31us vaqt kuchh fareesee eesa kay paas a kar us say kahenay lagay, “is maqaam ko chhod kar kaheen aur chalay jaaen, kyoonki herodes aap ko qatl karnay ka iraada rakhta hai.”
32eesa nay javaab diya, “jaao, us lomdee ko bata do, ‘aaj aur kal main badruhen nikaalta aur mareezon ko shifa deta rahoonga. phir teesray din main paaya-ay-takmeel ko pahunchoonga.’ 33is liyay laazim hai ki main aaj, kal aur parson aagay chalta rahoon. kyoonki mumkin naheen ki koee nabee yarooshalam say baahar halaak ho.
34haay yarooshalam, yarooshalam! too jo nabiyon ko qatl kartee aur apnay paas bhejay huay paighambaron ko sangasaar kartee hai. main nay kitnee hee baar teree aulaad ko jama karna chaaha, bilkul usee tarah jis tarah murghee apnay bachchon ko apnay paron talay jama karkay mahfooz kar letee hai. lekin too nay na chaaha. 35ab teray ghar ko veeraan-o-sunsaan chhoda jaaega. aur main tum ko bataata hoon, tum mujhay us vaqt tak dubaara naheen dekhogay jab tak tum na kaho ki mubaarak hai vah jo rabb kay naam say aata hai.”