Looqa 12
riyaakaaree say khabaradaasar raho!
1itnay men kaee hazaar log jama ho gaay thay. badee taadaad kee vajah say vah ek doosray par giray padtay thay. phir eesa apnay shaagirdon say yah baat karnay laga, “fareesiyon kay khameer yaanee riyaakaaree say khabardaar! 2jo kuchh bhee abhee chhupa hua hai usay aakhir men zaahir kiya jaaega aur jo kuchh bhee is vaqt posheeda hai us ka raaz aakhir men khul jaaega. 3is liyay jo kuchh tum nay andheray men kaha hai vah roz-ay-raushan men sunaaya jaaega aur jo kuchh tum nay androonee kamron ka darvaaza band karkay aahista aahista kaan men bayaan kiya hai us ka chhaton say elaan kiya jaaega.
kis say darna chaahiay?
4meray azeezo, un say mat darna jo sirf jism ko qatl kartay hain aur mazeed nuqsaan naheen pahuncha saktay. 5main tum ko bataata hoon ki kis say darna hai. allaah say daro, jo tumhen halaak karnay kay baad jahennum men phainknay ka ikhtiyaar bhee rakhta hai. jee haan, usee say khauf khaao.
6kya paanch chidiyaan do paison men naheen bikteen? to bhee allaah har ek kee fikr karkay ek ko bhee naheen bhoolta. 7haan, balki tumhaaray sar kay sab baal bhee ginay huay hain. lihaaza mat daro. tumhaaree qadar-o-qeemat bahut see chidiyon say kaheen ziyaada hai.
maseeh ka iqraar ya inkaar karnay kay nateeje
8main tum ko bataata hoon, jo bhee logon kay saamnay mera iqraar karay us ka iqraar ibn-ay-aadam bhee farishton kay saamnay karega. 9lekin jo logon kay saamnay mera inkaar karay us ka bhee allaah kay farishton kay saamnay inkaar kiya jaaega.
10aur jo bhee ibn-ay-aadam kay khilaaf baat karay usay muaaf kiya ja sakta hai. lekin jo rooh-ul-quds kay khilaaf kufr bakay usay muaaf naheen kiya jaaega.
11jab log tum ko ibaadatkhaanon men aur haakimon aur ikhtiyaar vaalon kay saamnay ghaseet kar lay jaaengay to yah sochtay sochtay pareshaan na ho jaana ki main kis tarah apna difa karoon ya kya kahoon, 12kyoonki rooh-ul-quds tum ko usee vaqt sikha dega ki tum ko kya kahena hai.”
naadaan ameer kee tamseel
13kisee nay bheed men say kaha, “ustaad, meray bhaaee say kahen ki meeraas ka mera hissa mujhay day.”
14eesa nay javaab diya, “bhaee, kis nay mujhay tum par jaj ya taqseem karnay vaala muqarrar kiya hai?” 15phir us nay un say mazeed kaha, “khabardaar! har qism kay laalach say bachay rahena, kyoonki insaan kee zindagee us kay maal-o-daulat kee kasrat par munhasir naheen.”
16us nay unhen ek tamseel sunaaee. “kisee ameer aadmee kee zameen men achchhee fasal paida huee. 17chunaanchay vah sochnay laga, ‘ab main kya karoon? meray paas to itnee jagah naheen jahaan main sab kuchh jama karkay rakhoon.’ 18phir us nay kaha, ‘main yah karoonga ki apnay godaamon ko dha kar in say baday taameer karoonga. un men apna tamaam anaaj aur baaqee paidaavaar jama kar loonga. 19phir main apnay aap say kahoonga ki lo, in achchhee cheezon say teree zarooriyaat bahut saalon tak pooree hotee rahengee. ab aaraam kar. kha, pee aur khushee mana.’ 20lekin allaah nay us say kaha, ‘ahemaq! isee raat too mar jaaega. to phir jo cheezen too nay jama kee hain vah kis kee hongee?’
21yahee us shakhs ka anjaam hai jo sirf apnay liyay cheezen jama karta hai jabki vah allaah kay saamnay ghareeb hai.”
allaah par bharosaa
22phir eesa nay apnay shaagirdon say kaha, “is liyay apnee zindagee kee zarooriyaat pooree karnay kay liyay pareshaan na raho ki haay, main kya khaaoon. aur jism kay liyay fikrmand na raho ki haay, main kya pahenoon. 23zindagee to khaanay say ziyaada ahem hai aur jism poshaak say ziyaada. 24kavvon par ghaur karo. na vah beej botay, na faslen kaattay hain. un kay paas na stor hota hai, na godaam. to bhee allaah khud unhen khaana khilaata hai. aur tumhaaree qadar-o-qeemat to parindon say kaheen ziyaada hai. 25kya tum men say koee fikr kartay kartay apnee zindagee men ek lamhay ka bhee izaafa kar sakta hai? 26agar tum fikr karnay say itnee chhotee see tabdeelee bhee naheen la saktay to phir tum baaqee baaton kay baaray men kyoon fikrmand ho? 27ghaur karo ki sosan kay phool kis tarah ugtay hain. na vah mehanat kartay, na kaattay hain. lekin main tumhen bataata hoon ki sulemaan baadshaah apnee pooree shaan-o-shaukat kay baavujood aisay shaandaar kapdon say mulabbas naheen tha jaisay un men say ek. 28agar allaah us ghaas ko jo aaj maidaan men hai aur kal aag men jhonkee jaaegee aisa shaandaar libaas pahenaata hai to ai kamaetiqaado, vah tum ko pahenaanay kay liyay kya kuchh naheen karega?
29is kee talaash men na rahena ki kya khaaogay ya kya piyogay. aisee baaton kee vajah say bechain na raho. 30kyoonki duniya men jo eemaan naheen rakhtay vahee in tamaam cheezon kay peechhay bhaagtay rahetay hain, jabki tumhaaray baap ko pahelay say maaloom hai ki tum ko in kee zaroorat hai. 31chunaanchay usee kee baadshaahee kee talaash men raho. phir yah tamaam cheezen bhee tum ko mil jaaengee.
aasmaan par daulat jama karnaa
32ai chhotay gallay, mat darna, kyoonki tumhaaray baap nay tum ko baadshaahee dena pasand kiya. 33apnee milkiyat bech kar ghareebon ko day dena. apnay liyay aisay batvay banvaao jo naheen ghistay. apnay liyay aasmaan par aisa khazaana jama karo jo kabhee khatm naheen hoga aur jahaan na koee chor aaega, na koee keeda usay kharaab karega. 34kyoonki jahaan tumhaara khazaana hai vaheen tumhaara dil bhee laga rahega.
har vaqt tayyaar naukar
35khidmat kay liyay tayyaar khaday raho aur is par dhyaan do ki tumhaaray charaagh jaltay rahen. 36yaanee aisay naukron kee maanind jin ka maalik kisee shaadee say vaapas aanay vaala hai aur vah us kay liyay tayyaar khaday hain. joon hee vah a kar dastak day vah darvaazay ko khol dengay. 37vah naukar mubaarak hain jinhen maalik a kar jaagtay huay aur chaukas paaega. main tum ko sachch bataata hoon ki yah dekh kar maalik apnay kapday badal kar unhen bithaaega aur mez par un kee khidmat karega. 38ho sakta hai maalik aadhee raat ya is kay baad aaay. agar vah is soorat men bhee unhen mustaid paaay to vah mubaarak hain. 39yaqeen jaano, agar kisee ghar kay maalik ko pata hota ki chor kab aaega to vah zaroor usay ghar men naqab lagaanay na deta. 40tum bhee tayyaar raho, kyoonki ibn-ay-aadam aisay vaqt aaega jab tum is kee tavaqqo naheen karogay.”
vafaadaar naukar
41patras nay poochha, “khudaavand, kya yah tamseel sirf hamaaray liyay hai ya sab kay liyay?”
42khudaavand nay javaab diya, “kaun sa naukar vafaadaar aur samajhdaar hai? farz karo ki ghar kay maalik nay kisee naukar ko baaqee naukron par muqarrar kiya ho. us kee ek zimmaadaaree yah bhee hai ki unhen vaqt par munaasib khaana khilaaay. 43vah naukar mubaarak hoga jo maalik kee vaapsee par yah sab kuchh kar raha hoga. 44main tum ko sachch bataata hoon ki yah dekh kar maalik usay apnee pooree jaaydaad par muqarrar karega. 45lekin farz karo ki naukar apnay dil men sochay, ‘maalik kee vaapsee men abhee der hai.’ vah naukron aur naukraaniyon ko peetnay lagay aur khaatay-peetay vah nashay men rahay. 46agar vah aisa karay to maalik aisay din aur vaqt aaega jis kee tavaqqo naukar ko naheen hogee. in haalaat ko dekh kar vah naukar ko tukday tukday kar daalega aur usay ghaireemaandaaron men shaamil karega.
47jo naukar apnay maalik kee marzee ko jaanta hai, lekin us kay liyay tayyaariyaan naheen karta, na usay pooree karnay kee koshish karta hai, us kee khoob pitaaee kee jaaegee. 48is kay muqaablay men vah jo maalik kee marzee ko naheen jaanta aur is bina par koee qaabil-ay-saza kaam karay us kee kam pitaaee kee jaaegee. kyoonki jisay bahut diya gaya ho us say bahut talab kiya jaaega. aur jis kay sapurd bahut kuchh kiya gaya ho us say kaheen ziyaada maanga jaaega.
eesa kee vajah say ikhtilaaf paida hogaa
49main zameen par aag lagaanay aaya hoon, aur kaash vah pahelay hee bhadak rahee hotee! 50lekin ab tak meray saamnay ek baptisma hai jisay lena zarooree hai. aur mujh par kitna dabaao hai jab tak us kee takmeel na ho jaaay. 51kya tum samajhtay ho ki main duniya men sulah-salaamatee qaaim karnay aaya hoon? naheen, main tum ko bataata hoon ki is kee bajaay main ikhtilaaf paida karoonga. 52kyoonki ab say ek gharaanay kay paanch afraad men ikhtilaaf hoga. teen do kay khilaaf aur do teen kay khilaaf hongay. 53baap betay kay khilaaf hoga aur beta baap kay khilaaf, maan betee kay khilaaf aur betee maan kay khilaaf, saas bahoo kay khilaaf aur bahoo saas kay khilaaf.”
maujooda haalaat ka saheeh nateeja nikaalna chaahie
54eesa nay hujoom say yah bhee kaha, “joon hee koee baadal maghribee ufaq say chadhta hua nazar aaay to tum kahetay ho ki baarish hogee. aur aisa hee hota hai. 55aur jab junoobee loo chaltee hai to tum kahetay ho ki sakht garmee hogee. aur aisa hee hota hai. 56ai riyaakaaro! tum aasmaan-o-zameen kay haalaat par ghaur karkay saheeh nateeja nikaal letay ho. to phir tum maujooda zamaanay kay haalaat par ghaur karkay saheeh nateeja kyoon naheen nikaal saktay?
apnay mukhaalif say samjhauta karnaa
57tum khud saheeh faisla kyoon naheen kar saktay? 58farz karo ki kisee nay tujh par muqaddma chalaaya hai. agar aisa ho to pooree koshish kar ki kachaheree men pahunchnay say pahelay pahelay muaamala hal karkay mukhaalif say faarigh ho jaaay. aisa na ho ki vah tujh ko jaj kay saamnay ghaseet kar lay jaaay, jaj tujhay pulis afsar kay havaalay karay aur pulis afsar tujhay jel men daal day. 59main tujhay bataata hoon, vahaan say too us vaqt tak naheen nikal paaega jab tak jurmaanay kee pooree pooree raqam ada na kar day.”