Looqa 11
dua kis tarah karnee hai
1ek din eesa kaheen dua kar raha tha. jab vah faarigh hua to us kay kisee shaagird nay kaha, “khudaavand, hamen dua karna sikhaaen, jis tarah yaheya nay bhee apnay shaagirdon ko dua karnay kee taaleem dee.”
2eesa nay kaha, “dua kartay vaqt yoon kahena,
ai baap,
tera naam muqaddas maana jaaay.
teree baadshaahee aaay.
3har roz hamen hamaaree roz kee rotee day.
4hamaaray gunaahon ko muaaf kar.
kyoonki ham bhee har ek ko muaaf kartay hain
jo hamaara gunaah karta hai. [a] lafzee tarjuma : jo hamaara qarzdaar hai.
aur hamen aazmaaish men na padnay day.”
maangtay raho
5phir us nay un say kaha, “agar tum men say koee aadhee raat kay vaqt apnay dost kay ghar ja kar kahay, ‘bhaaee, mujhay teen rotiyaan day, baad men main yah vaapas kar doonga. 6kyoonki mera dost safar karkay meray paas aaya hai aur main usay khaanay kay liyay kuchh naheen day sakta.’ 7ab farz karo ki yah dost andar say javaab day, ‘meharbaanee karkay mujhay tang na kar. darvaazay par taala laga hai aur meray bachchay meray saath bistar par hain, is liyay main tujhay denay kay liyay uth naheen sakta.’ 8lekin main tum ko yah bataata hoon ki agar vah dostee kee khaatir na bhee uthay, to bhee vah apnay dost kay beja israar kee vajah say us kee tamaam zaroorat pooree karega.
9chunaanchay maangtay raho to tum ko diya jaaega, dhoondtay raho to tum ko mil jaaega. khatkhataatay raho to tumhaaray liyay darvaaza khol diya jaaega. 10kyoonki jo bhee maangta hai vah paata hai, jo dhoondta hai usay milta hai aur jo khatkhataata hai us kay liyay darvaaza khol diya jaata hai. 11tum baapon men say kaun apnay betay ko saamp dega agar vah machhlee maangay? 12ya kaun usay bichchhoo dega agar vah anda maangay? koee naheen! 13jab tum buray honay kay baavujood itnay samajhdaar ho ki apnay bachchon ko achchhee cheezen day saktay ho to phir kitnee ziyaada yaqeenee baat hai ki aasmaanee baap apnay maangnay vaalon ko rooh-ul-quds dega.”
eesa aur badroohon ka sardaar
14ek din eesa nay ek aisee badruh nikaal dee jo goongee thee. jab vah goongay aadmee men say niklee to vah bolnay laga. vahaan par jama log hakka-bakka rah gaay. 15lekin baaz nay kaha, “yah to badroohon kay sardaar baal-zabool kee madad say badroohon ko nikaalta hai.”
16auron nay usay aazmaanay kay liyay kisee ilaahee nishaan ka mutaalba kiya. 17lekin eesa nay un kay khayaalaat jaan kar kaha, “jis baadshaahee men bhee phoot pad jaaay vah tabaah ho jaaegee, aur jis gharaanay kee aisee haalat ho vah bhee khaak men mil jaaega. 18tum kahetay ho ki main baal-zabool kee madad say badroohon ko nikaalta hoon. lekin agar iblees men phoot pad gaee hai to phir us kee baadshaahee kis tarah qaaim rah saktee hai? 19doosra savaal yah hai, agar main baal-zabool kee madad say badroohon ko nikaalta hoon to tumhaaray betay unhen kis kay zareeay nikaaltay hain? chunaanchay vahee is baat men tumhaaray munsif hongay. 20lekin agar main allaah kee qudrat say badroohon ko nikaalta hoon to phir allaah kee baadshaahee tumhaaray paas pahunch chukee hai.
21jab tak koee zoraavar aadmee hathiyaaron say les apnay deray kee paheraadaaree karay us vaqt tak us kee milkiyat mahfooz rahetee hai. 22lekin agar koee ziyaada taaqatvar shakhs hamla karkay us par ghaalib aaay to vah us kay asaliha par qabza karega jis par us ka bharosa tha, aur loota hua maal apnay logon men taqseem kar dega.
23jo meray saath naheen vah meray khilaaf hai aur jo meray saath jama naheen karta vah bikherta hai.
badruh kee vaapsee
24jab koee badruh kisee shakhs men say nikaltee hai to vah veeraan ilaaqon men say guzartee huee aaraam kee jagah talaash kartee hai. lekin jab usay koee aisa maqaam naheen milta to vah kahetee hai, ‘main apnay us ghar men vaapas chalee jaaoongee jis men say niklee thee.’ 25vah vaapas a kar dekhtee hai ki kisee nay jhaadoo day kar sab kuchh saleeqay say rakh diya hai. 26phir vah ja kar saat aur badruhen dhoond laatee hai jo us say badtar hotee hain, aur vah sab us shakhs men ghus kar rahenay lagtee hain. chunaanchay ab us aadmee kee haalat pahelay kee nisbat ziyaada buree ho jaatee hai.”
kaun mubaarak hai?
27eesa abhee yah baat kar hee raha tha ki ek aurat nay oonchee aavaaz say kaha, “aap kee maan mubaarak hai jis nay aap ko janm diya aur aap ko doodh pilaaya.”
28lekin eesa nay javaab diya, “baat yah naheen hai. haqeeqat men vah mubaarak hain jo allaah ka kalaam sun kar us par amal kartay hain.”
ilaahee nishaan ka taqaazaa
29sunnay vaalon kee taadaad bahut badh gaee to vah kahenay laga, “yah nasal shareer hai, kyoonki yah mujh say ilaahee nishaan ka taqaaza kartee hai. lekin isay koee bhee ilaahee nishaan pesh naheen kiya jaaega siva-ay-yoonus kay nishaan kay. 30kyoonki jis tarah yoonus neenva shaher kay baashindon kay liyay nishaan tha bilkul usee tarah ibn-ay-aadam is nasal kay liyay nishaan hoga. 31qiyaamat kay din junoobee mulk saba kee malika is nasal kay logon kay saath khadee ho kar unhen mujrim qaraar degee. kyoonki vah doordaraaz mulk say sulemaan kee hikmat sunnay kay liyay aaee thee jabki yahaan vah hai jo sulemaan say bhee bada hai. 32us din neenva kay baashinday bhee is nasal kay logon kay saath khaday ho kar unhen mujrim thaheraaengay. kyoonki yoonus kay elaan par unhon nay tauba kee thee jabki yahaan vah hai jo yoonus say bhee bada hai.
badan kee raushnee
33jab koee shakhs charaagh jalaata hai to na vah usay chhupaata, na bartan kay neechay rakhta balki usay shamaadaan par rakh deta hai taaki us kee raushnee andar aanay vaalon ko nazar aaay. 34teree aankh teray badan ka charaagh hai. agar teree aankh theek ho to tera poora jism raushan hoga. lekin agar aankh kharaab ho to poora jism andhera hee andhera hoga. 35khabardaar! aisa na ho ki jo raushnee teray andar hai vah haqeeqat men taareekee ho. 36chunaanchay agar tera poora jism raushan ho aur koee bhee hissa taareek na ho to phir vah bilkul raushan hoga, aisa jaisa us vaqt hota hai jab charaagh tujhay apnay chamaknay damaknay say raushan kar deta hai.”
fareesiyon par afsos
37eesa abhee baat kar raha tha ki kisee fareesee nay usay khaanay kee daavat dee. chunaanchay vah us kay ghar men ja kar khaanay kay liyay baith gaya. 38mezbaan bada hairaan hua, kyoonki us nay dekha ki eesa haath dhoay baghair khaanay kay liyay baith gaya hai. 39lekin khudaavand nay us say kaha, “dekho, tum fareesee baahar say har piyaalay aur bartan kee safaaee kartay ho, lekin andar say tum loot-maar aur sharaarat say bharay hotay ho. 40naadaano! allaah nay baahar vaalay hissay ko khalaq kiya, to kya us nay andar vaalay hissay ko naheen banaaya? 41chunaanchay jo kuchh bartan kay andar hai usay ghareebon ko day do. phir tumhaaray liyay sab kuchh paak-saaf hoga.
42fareesiyo, tum par afsos! kyoonki ek taraf tum paudeena, sadaab aur baagh kee har qism kee tarkaaree ka dasvaan hissa allaah kay liyay makhsoos kartay ho, lekin doosree taraf tum insaaf aur allaah kee muhabbat ko nazar’andaaz kartay ho. laazim hai ki tum yah kaam bhee karo aur pahela bhee na chhodo.
43fareesiyo, tum par afsos! kyoonki tum ibaadatkhaanon kee izzat kee kursiyon par baithnay kay liyay bechain rahetay aur baazaar men logon ka salaam sunnay kay liyay tadaptay ho. 44haan, tum par afsos! kyoonki tum posheeda qabron kee maanind ho jin par say log naadaanista taur par guzartay hain.”
45shareeat kay ek aalim nay etiraaz kiya, “ustaad, aap yah kah kar hamaaree bhee beizzatee kartay hain.”
46eesa nay javaab diya, “tum shareeat kay aalimon par bhee afsos! kyoonki tum logon par bhaaree bojh daal detay ho jo mushkil say uthaaya ja sakta hai. na sirf yah balki tum khud is bojh ko apnee ek unglee bhee naheen lagaatay. 47tum par afsos! kyoonki tum nabiyon kay mazaar bana detay ho, un kay jinhen tumhaaray baapdaada nay maar daala. 48is say tum gavaahee detay ho ki tum vah kuchh pasand kartay ho jo tumhaaray baapdaada nay kiya. unhon nay nabiyon ko qatl kiya jabki tum un kay mazaar taameer kartay ho. 49is liyay allaah kee hikmat nay kaha, ‘main un men nabee aur rasool bhej doongee. un men say baaz ko vah qatl karengay aur baaz ko sataaengay.’ 50nateejay men yah nasal tamaam nabiyon kay qatl kee zimmaadaar thaheregee - duniya kee takhleeq say lay kar aaj tak, 51yaanee haabeel kay qatl say lay kar zakariyaah kay qatl tak, jisay bait-ul-muqaddas kay sahen men maujood qurbaangaah aur bait-ul-muqaddas kay darvaazay kay darmiyaan qatl kiya gaya. haan, main tum ko bataata hoon ki yah nasal zaroor un kee zimmaadaar thaheregee.
52shareeat kay aalimo, tum par afsos! kyoonki tum nay ilm kee kunjee ko chheen liya hai. na sirf yah ki tum khud daakhil naheen huay, balki tum nay daakhil honay vaalon ko bhee rok liya.”
53jab eesa vahaan say nikla to aalim aur fareesee us kay sakht mukhaalif ho gaay aur baday ghaur say us kee poochhgichh karnay lagay. 54vah is taak men rahay ki usay munh say niklee kisee baat kee vajah say pakden.