Looqa 10
eesa 72 shaagirdon ko munaadee kay liyay bhejta hai
1is kay baad khudaavand nay mazeed 72 shaagirdon ko muqarrar kiya aur unhen do do karkay apnay aagay har us shaher aur jagah bhej diya jahaan vah abhee jaanay ko tha. 2us nay un say kaha, “fasal bahut hai, lekin mazdoor thoday. is liyay fasal kay maalik say darakhwaast karo ki vah fasal kaatnay kay liyay mazeed mazdoor bhej day. 3ab ravaana ho jaao, lekin zahen men yah baat rakho ki tum bhed kay bachchon kee maanind ho jinhen main bhediyon kay darmiyaan bhej raha hoon. 4apnay saath na batva lay jaana, na saamaan kay liyay baig, na jootay. aur raastay men kisee ko bhee salaam na karna. 5jab bhee tum kisee kay ghar men daakhil ho to pahelay yah kahena, ‘is ghar kee salaamatee ho.’ 6agar us men salaamatee ka koee banda hoga to tumhaaree barkat us par thaheregee, varna vah tum par laut aaegee. 7salaamatee kay aisay ghar men thahero aur vah kuchh khaao piyo jo tum ko diya jaaay, kyoonki mazdoor apnee mazdooree ka haqdaar hai. mukhtalif gharon men ghoomtay na phiro balki ek hee ghar men raho. 8jab bhee tum kisee shaher men daakhil ho aur log tum ko qabool karen to jo kuchh vah tum ko khaanay ko den usay khaao. 9vahaan kay mareezon ko shifa day kar bataao ki allaah kee baadshaahee qareeb a gaee hai. 10lekin agar tum kisee shaher men jaao aur log tum ko qabool na karen to phir shaher kee sadkon par khaday ho kar kaho, 11‘ham apnay jooton say tumhaaray shaher kee gard bhee jhaad detay hain. yoon ham tumhaaray khilaaf gavaahee detay hain. lekin yah jaan lo ki allaah kee baadshaahee qareeb a gaee hai.’ 12main tum ko bataata hoon ki us din us shaher kee nisbat sadoom ka haal ziyaada qaabil-ay-bardaasht hoga.
tauba na karnay vaalay shaheron par afsos
13ai khuraazeen, tujh par afsos! bait-saida, tujh par afsos! agar soor aur saida men vah mojizay kiay gaay hotay jo tum men huay to vahaan kay log kab kay taat odh kar aur sar par raakh daal kar tauba kar chukay hotay. 14jee haan, adaalat kay din tumhaaree nisbat soor aur saida ka haal ziyaada qaabil-ay-bardaasht hoga. 15aur too ai kafarnahoom, kya tujhay aasmaan tak sarfaraaz kiya jaaega? hargiz naheen, balki too utarta utarta paataal tak pahunchega.
16jis nay tumhaaree sunee us nay meree bhee sunee. aur jis nay tum ko radd kiya us nay mujhay bhee radd kiya. aur mujhay radd karnay vaalay nay usay bhee radd kiya jis nay mujhay bheja hai.”
72 shaagirdon kee vaapsee
1772 shaagird laut aaay. vah bahut khush thay aur kahenay lagay, “khudaavand, jab ham aap ka naam letay hain to badruhen bhee hamaaray taabay ho jaatee hain.”
18eesa nay javaab diya, “iblees mujhay nazar aaya aur vah bijlee kee tarah aasmaan say gir raha tha. 19dekho, main nay tum ko saampon aur bichhooon par chalnay ka ikhtiyaar diya hai. tum ko dushman kee pooree taaqat par ikhtiyaar haasil hai. kuchh bhee tum ko nuqsaan naheen pahuncha sakega. 20lekin is vajah say khushee na manaao ki badruhen tumhaaray taabay hain, balki is vajah say ki tumhaaray naam aasmaan par darj kiay gaay hain.”
baap kee tamjeed
21usee vaqt eesa rooh-ul-quds men khushee manaanay laga. us nay kaha, “ai baap, aasmaan-o-zameen kay maalik! main teree tamjeed karta hoon ki too nay yah baat daanaaon aur aqalmandon say chhupa kar chhotay bachchon par zaahir kar dee hai. haan meray baap, kyoonki yahee tujhay pasand aaya.
22meray baap nay sab kuchh meray sapurd kar diya hai. koee naheen jaanta ki farzand kaun hai siva-ay-baap kay. aur koee naheen jaanta ki baap kaun hai siva-ay-farzand kay aur un logon kay jin par farzand yah zaahir karna chaahata hai.”
23phir eesa shaagirdon kee taraf muda aur alaahidagee men un say kahenay laga, “mubaarak hain vah aankhen jo vah kuchh dekhtee hain jo tum nay dekha hai. 24main tum ko bataata hoon ki bahut say nabee aur baadshaah yah dekhna chaahatay thay jo tum dekhtay ho, lekin unhon nay na dekha. aur vah yah sunnay kay aarzoomand thay jo tum suntay ho, lekin unhon nay na suna.”
nek saamree kee tamseel
25ek mauqay par shareeat ka ek aalim eesa ko phansaanay kee khaatir khada hua. us nay poochha, “ustaad, main kya kya karnay say meeraas men abdee zindagee pa sakta hoon?”
26eesa nay us say kaha, “shareeat men kya likha hai? too us men kya padhta hai?”
27aadmee nay javaab diya, “‘rabb apnay khuda say apnay pooray dil, apnee pooree jaan, apnee pooree taaqat aur apnay pooray zahen say piyaar karna.’ aur ‘apnay padosee say vaisee muhabbat rakhna jaisee too apnay aap say rakhta hai’.”
28eesa nay kaha, “too nay theek javaab diya. aisa hee kar to zinda rahega.”
29lekin aalim nay apnay aap ko durust saabit karnay kee gharaz say poochha, “to mera padosee kaun hai?”
30eesa nay javaab men kaha, “ek aadmee yarooshalam say yareehoo kee taraf ja raha tha ki vah daakuon kay haathon men pad gaya. unhon nay us kay kapday utaar kar usay khoob maara aur adhmua chhod kar chalay gaay. 31ittifaaq say ek imaam bhee usee raastay par yareehoo kee taraf chal raha tha. lekin jab us nay zakhmee aadmee ko dekha to raastay kee parlee taraf ho kar aagay nikal gaya. 32laavee qabeelay ka ek khaadim bhee vahaan say guzra. lekin vah bhee raastay kee parlee taraf say aagay nikal gaya. 33phir saamriya ka ek musaafir vahaan say guzra. jab us nay zakhmee aadmee ko dekha to usay us par taras aaya. 34vah us kay paas gaya aur us kay zakhmon par tel aur mai laga kar un par pattiyaan baandh deen. phir us ko apnay gadhay par bitha kar saraay tak lay gaya. vahaan us nay us kee mazeed dekh-bhaal kee. 35aglay din us nay chaandee kay do sikkay nikaal kar saraay kay maalik ko diay aur kaha, ‘is kee dekh-bhaal karna. agar kharcha is say badh kar hua to main vaapsee par ada kar doonga’.”
36phir eesa nay poochha, “ab tera kya khayaal hai, daakuon kee zad men aanay vaalay aadmee ka padosee kaun tha? imaam, laavee ya saamree?”
37aalim nay javaab diya, “vah jis nay us par rahem kiya.”
eesa nay kaha, “bilkul theek. ab too bhee ja kar aisa hee kar.”
eesa mariyam aur martha kay ghar jaata hai
38phir eesa shaagirdon kay saath aagay nikla. chaltay chaltay vah ek gaaon men pahuncha. vahaan kee ek aurat banaam martha nay usay apnay ghar men khush’aamadeed kaha. 39martha kee ek bahen thee jis ka naam mariyam tha. vah khudaavand kay paaon men baith kar us kee baaten sunnay lagee 40jabki martha mehamaanon kee khidmat kartay kartay thak gaee. aakhirkaar vah eesa kay paas a kar kahenay lagee, “khudaavand, kya aap ko parva naheen ki meree bahen nay mehamaanon kee khidmat ka poora intizaam mujh par chhod diya hai? us say kahen ki vah meree madad karay.”
41lekin khudaavand eesa nay javaab men kaha, “martha, martha, too bahut see fikron aur pareshaaniyon men pad gaee hai. 42lekin ek baat zarooree hai. mariyam nay behatar hissa chun liya hai aur yah us say chheena naheen jaaega.”