Looqa 1
peshlafz
1muhtaram thiyufilus, bahut say log vah sab kuchh likh chukay hain jo hamaaray darmiyaan vaaqay hua hai. 2un kee koshish yah thee ki vahee kuchh bayaan kiya jaaay jis kee gavaahee vah detay hain jo shuroo hee say saath thay aur aaj tak allaah ka kalaam sunaanay kee khidmat sar’anjaam day rahay hain. 3main nay bhee har mumkin koshish kee hai ki sab kuchh shuroo say aur ain haqeeqat kay mutaabiq maaloom karoon. ab main yah baaten tarteeb say aap kay liyay likhna chaahata hoon. 4aap yah padh kar jaan lengay ki jo baaten aap ko sikhaaee gaee hain vah sachch aur durust hain.
yaheya kay baaray men peshgoee
5yahoodiya kay baadshaah herodes kay zamaanay men ek imaam tha jis ka naam zakariyaah tha. bait-ul-muqaddas men imaamon kay mukhtalif guroh khidmat sar’anjaam detay thay, aur zakariyaah ka taalluq abiyaah kay guroh say tha. us kee beevee imaam-ay-aazam haaroon kee nasal say thee aur us ka naam ileeshiba tha. 6miyaan-beevee allaah kay nazdeek raastbaaz thay aur rabb kay tamaam ahkaam aur hidaayaat kay mutaabiq beilzaam zindagee guzaartay thay. 7lekin vah beaulaad thay. ileeshiba kay bachchay paida naheen ho saktay thay. ab vah donon boodhay ho chukay thay.
8ek din bait-ul-muqaddas main abiyaah kay guroh kee baaree thee aur zakariyaah allaah kay huzoor apnee khidmat sar’anjaam day raha tha. 9dastoor kay mutaabiq unhon nay qur’a daala taaki maaloom karen ki rabb kay maqdis men ja kar bakhoor kee qurbaanee kaun jalaaay. zakariyaah ko chuna gaya. 10jab vah muqarrara vaqt par bakhoor jalaanay kay liyay bait-ul-muqaddas men daakhil hua to jama honay vaalay tamaam parastaar sahen men dua kar rahay thay.
11achaanak rabb ka ek farishta zaahir hua jo bakhoor jalaanay kee qurbaangaah kay dahenee taraf khada tha. 12usay dekh kar zakariyaah ghabraaya aur bahut dar gaya. 13lekin farishtay nay us say kaha, “zakariyaah, mat dar! allaah nay teree dua sun lee hai. teree beevee ileeshiba kay beta hoga. us ka naam yaheya rakhna. 14vah na sirf teray liyay khushee aur musarrat ka baais hoga, balki bahut say log us kee paidaaish par khushee manaaengay. 15kyoonki vah rabb kay nazdeek azeem hoga. laazim hai ki vah mai aur sharaab say parhez karay. vah paida honay say pahelay hee rooh-ul-quds say maamoor hogaa 16aur israaeelee qaum men say bahuton ko rabb un kay khuda kay paas vaapas laaega. 17vah ilyaas kee rooh aur quvvat say khudaavand kay aagay aagay chalega. us kee khidmat say vaalidon kay dil apnay bachchon kee taraf maail ho jaaengay aur naaframaan log raastbaazon kee daanaaee kee taraf rujoo karengay. yoon vah is qaum ko rabb kay liyay tayyaar karega.”
18zakariyaah nay farishtay say poochha, “main kis tarah jaanoon ki yah baat sachch hai? main khud boodha hoon aur meree beevee bhee umr rauseeda hai.”
19farishtay nay javaab diya, “main jibraaeel hoon jo allaah kay huzoor khada raheta hoon. mujhay isee maqsad kay liyay bheja gaya hai ki tujhay yah khushkhabaree sunaaoon. 20lekin choonki too nay meree baat ka yaqeen naheen kiya is liyay too khaamosh rahega aur us vaqt tak bol naheen sakega jab tak teray beta paida na ho. meree yah baaten muqarrara vaqt par hee pooree hongee.”
21is dauraan baahar kay log zakariyaah kay intizaar men thay. vah hairaan hotay ja rahay thay ki usay vaapas aanay men kyoon itnee der ho rahee hai. 22aakhirkaar vah baahar aaya, lekin vah un say baat na kar saka. tab unhon nay jaan liya ki us nay bait-ul-muqaddas men roya dekhee hai. us nay haathon say ishaaray to kiay, lekin khaamosh raha.
23zakariyaah muqarrara vaqt tak bait-ul-muqaddas men apnee khidmat anjaam deta raha, phir apnay ghar vaapas chala gaya. 24thoday dinon kay baad us kee beevee ileeshiba haamila ho gaee aur vah paanch maah tak ghar men chhupee rahee. 25us nay kaha, “khudaavand nay meray liyay kitna bada kaam kiya hai, kyoonki ab us nay meree fikr kee aur logon kay saamnay say meree rusvaaee door kar dee.”
eesa kee paidaaish kee peshgoee
26-27 ileeshiba chhah maah say ummeed say thee jab allaah nay jibraaeel farishtay ko ek kunvaaree kay paas bheja jo naasrat men rahetee thee. naasrat galeel ka ek shaher hai aur kunvaaree ka naam mariyam tha. us kee mangnee ek mard kay saath ho chukee thee jo daaood baadshaah kee nasal say tha aur jis ka naam yoosuf tha. 28farishtay nay us kay paas a kar kaha, “ai khaatoon jis par rabb ka khaas fazl hua hai, salaam! rabb teray saath hai.”
29mariyam yah sun kar ghabra gaee aur socha, “yah kis tarah ka salaam hai?” 30lekin farishtay nay apnee baat jaaree rakhee aur kaha, “ai mariyam, mat dar, kyoonki tujh par allaah ka fazl hua hai. 31too ummeed say ho kar ek betay ko janm degee. tujhay us ka naam eesa (najaat denay vaala) rakhna hai. 32vah azeem hoga aur allaah t’aala ka farzand kahelaaega. rabb hamaara khuda usay us kay baap daaood kay takht par bithaaegaa 33aur vah hamesha tak israaeel par hukoomat karega. us kee saltanat kabhee khatm na hogee.”
34mariyam nay farishtay say kaha, “yah kyoonkar ho sakta hai? abhee to main kunvaaree hoon.”
35farishtay nay javaab diya, “rooh-ul-quds tujh par naazil hoga, allaah t’aala kee qudrat ka saaya tujh par chha jaaega. is liyay yah bachcha quddoos hoga aur allaah ka farzand kahelaaega. 36aur dekh, teree rishtedaar ileeshiba kay bhee beta hoga haalaanki vah umrraseeda hai. go usay baanjh qaraar diya gaya tha, lekin vah chhah maah say ummeed say hai. 37kyoonki allaah kay nazdeek koee kaam naamumkin naheen hai.”
38mariyam nay javaab diya, “main rabb kee khidmat kay liyay haazir hoon. meray saath vaisa hee ho jaisa aap nay kaha hai.” is par farishta chala gaya.
mariyam ileeshiba say miltee hai
39un dinon men mariyam yahoodiya kay pahaadee ilaaqay kay ek shaher kay liyay ravaana huee. us nay jaldee jaldee safar kiya. 40vahaan pahunch kar vah zakariyaah kay ghar men daakhil huee aur ileeshiba ko salaam kiya. 41mariyam ka yah salaam sun kar ileeshiba ka bachcha us kay pet men uchhal pada aur ileeshiba khud rooh-ul-quds say bhar gaee. 42us nay buland aavaaz say kaha, “too tamaam aurton men mubaarak hai aur mubaarak hai tera bachcha! 43main kaun hoon ki meray khudaavand kee maan meray paas aaee! 44joon hee main nay tera salaam suna bachcha meray pet men khushee say uchhal pada. 45too kitnee mubaarak hai, kyoonki too eemaan laaee ki jo kuchh rabb nay farmaaya hai vah takmeel tak pahunchega.”
mariyam ka geet
46is par mariyam nay kaha,
“meree jaan rabb kee taazeem kartee hai
47aur meree rooh apnay najaatadihanda allaah say nihaayat khush hai.
48kyoonki us nay apnee khaadima kee pastee par nazar kee hai.
haan, ab say tamaam naslen mujhay mubaarak kahengee,
49kyoonki qaadir-ay-mutlaq nay meray liyay baday baday kaam kiay hain.
us ka naam quddoos hai.
50jo us ka khauf maantay hain
un par vah pusht-dar-pusht apnee rahemat zaahir karega.
51us kee qudrat nay azeem kaam kar dikhaaay hain,
aur dil say maghroor log tittar-bittar ho gaay hain.
52us nay hukmaraanon ko un kay takht say hata kar
pastahaal logon ko sarfaraaz kar diya hai.
53bhookon ko us nay achchhee cheezon say maalaamaal karke
ameeron ko khaalee haath lauta diya hai.
54vah apnay khaadim israaeel kee madad kay liyay a gaya hai.
haan, us nay apnee rahemat ko yaad kiya hai,
55yaanee vah daaimee vaada jo us nay hamaaray buzurgon kay saath kiya tha,
ibraaheem aur us kee aulaad kay saath.”
56mariyam taqreeban teen maah ileeshiba kay haan thaheree rahee, phir apnay ghar laut gaee.
yaheya baptisma denay vaalay kee paidaaish
57phir ileeshiba ka bachchay ko janm denay ka din a pahuncha aur us kay beta hua. 58jab us kay hamsaaiyon aur rishtedaaron ko ittila milee ki rabb kee us par kitnee badee rahemat huee hai to unhon nay us kay saath khushee manaaee.
59jab bachcha aath din ka tha to vah us ka khatna karvaanay kee rasm kay liyay aaay. vah bachchay ka naam us kay baap kay naam par zakariyaah rakhna chaahatay thay, 60lekin us kee maan nay etiraaz kiya. us nay kaha, “naheen, us ka naam yaheya ho.”
61unhon nay kaha, “aap kay rishtedaaron men to aisa naam kaheen bhee naheen paaya jaata.” 62tab unhon nay ishaaron say bachchay kay baap say poochha ki vah kya naam rakhna chaahata hai.
63javaab men zakariyaah nay takhtee mangva kar us par likha, “is ka naam yaheya hai.” yah dekh kar sab hairaan huay. 64usee lamhay zakariyaah dubaara bolnay kay qaabil ho gaya, aur vah allaah kee tamjeed karnay laga. 65tamaam hamsaaiyon par khauf chha gaya aur is baat ka charcha yahoodiya kay pooray ilaaqay men phail gaya. 66jis nay bhee suna us nay sanjeedgee say is par ghaur kiya aur socha, “is bachchay ka kya banega?” kyoonki rabb kee qudrat us kay saath thee.
zakariyaah kee nubuvvat
67us ka baap zakariyaah rooh-ul-quds say maamoor ho gaya aur nubuvvat karkay kaha,
68“rabb israaeel kay allaah kee tamjeed ho!
kyoonki vah apnee qaum kee madad kay liyay aaya hai,
us nay fidya day kar usay chhudaaya hai.
69us nay apnay khaadim daaood kay gharaanay men
hamaaray liyay ek azeem najaatadihanda khada kiya hai.
70aisa hee hua jis tarah us nay qadeem zamaanon men
apnay muqaddas nabiyon kee maarifat farmaaya tha,
71ki vah hamen hamaaray dushmanon say najaat dilaaega,
un sab kay haath se
jo ham say nafrat rakhtay hain.
72kyoonki us nay farmaaya tha ki vah hamaaray baapdaada par rahem karegaa
73aur apnay muqaddas ahd ko yaad rakhega,
us vaaday ko jo us nay qasam kha kar
ibraaheem kay saath kiya tha.
74ab us ka yah vaada poora ho jaaega :
ham apnay dushmanon say makhlsee pa kar
khauf kay baghair allaah kee khidmat kar sakengay,
75jeetay jee us kay huzoor muqaddas aur raast zindagee guzaar sakengay.
76aur too, meray bachchay, allaah t’aala ka nabee kahelaaega.
kyoonki too khudaavand kay aagay aage
us kay raastay tayyaar karega.
77too us kee qaum ko najaat ka raasta dikhaaega,
ki vah kis tarah apnay gunaahon kee muaafee paaegee.
78hamaaray allaah kee badee rahemat kee vajah se
ham par ilaahee noor chamkega.
79us kee raushnee un par phail jaaegee jo andhere
aur maut kay saay men baithay hain,
haan vah hamaaray qadmon ko salaamatee kee raah par pahunchaaegee.”
80yaheya parvaan chadha aur us kee rooh nay taqviyat paaee. us nay us vaqt tak registaan men zindagee guzaaree jab tak usay israaeel kee khidmat karnay kay liyay bulaaya na gaya.