Ahabaar 9

haaroon qurbaaniyaan chadhaata hai

¹makhsoosiyat kay saat din kay baad moosa nay aathven din haaroon, us kay beton aur israaeel kay buzurgon ko bulaaya. ²us nay haaroon say kaha, “ek beaib bachhda aur ek beaib mendha chun kar rabb ko pesh kar. bachhda gunaah kee qurbaanee kay liyay aur mendha bhasm honay vaalee qurbaanee kay liyay ho. ³phir israaeeliyon ko kah dena ki gunaah kee qurbaanee kay liyay ek bakra jabki bhasm honay vaalee qurbaanee kay liyay ek beaib yaksaala bachhda aur ek beaib yaksaala bhed ka bachcha pesh karo. ⁴saath hee salaamatee kee qurbaanee kay liyay ek bail aur ek mendha chuno. tel kay saath milaaee huee ghalla kee nazar bhee lay kar sab kuchh rabb ko pesh karo. kyoonki aaj hee rabb tum par zaahir hoga.”

⁵israaeelee moosa kee matlooba tamaam cheezen mulaaqaat kay khaimay kay saamnay lay aaay. pooree jamaaat qareeb a kar rabb kay saamnay khadee ho gaee. ⁶moosa nay un say kaha, “tumhen vahee karna hai jis ka hukm rabb nay tumhen diya hai. kyoonki aaj hee rabb ka jalaal tum par zaahir hoga.”

⁷phir us nay haaroon say kaha, “qurbaangaah kay paas ja kar gunaah kee qurbaanee aur bhasm honay vaalee qurbaanee chadha kar apna aur apnee qaum ka kaffaara dena. rabb kay hukm kay mutaabiq qaum kay liyay bhee qurbaanee pesh karna taaki us ka kaffaara diya jaaay.”

⁸haaroon qurbaangaah kay paas aaya. us nay bachhday ko zabah kiya. yah us kay liyay gunaah kee qurbaanee tha. ⁹us kay betay bachhday ka khoon us kay paas lay aaay. us nay apnee unglee khoon men dubo kar usay qurbaangaah kay seengon par lagaaya. baaqee khoon ko us nay qurbaangaah kay paaay par undel diya. ¹⁰phir us nay us kee charbee, gurdon aur jodkalejee ko qurbaangaah par jala diya. jaisay rabb nay moosa ko hukm diya tha vaisay hee haaroon nay kiya. ¹¹bachhday ka gosht aur khaal us nay khaimaagaah kay baahar lay ja kar jala dee.

¹²is kay baad haaroon nay bhasm honay vaalee qurbaanee ko zabah kiya. us kay beton nay usay us ka khoon diya, aur us nay usay qurbaangaah kay chaar pahelooon par chhidak diya. ¹³unhon nay usay qurbaanee kay mukhtalif tukday sar samet diay, aur us nay unhen qurbaangaah par jala diya. ¹⁴phir us nay us kee antadiyaan aur pindaliyaan dho kar bhasm honay vaalee qurbaanee kee baaqee cheezon par rakh kar jala deen.

¹⁵ab haaroon nay qaum kay liyay qurbaanee chadhaaee. us nay gunaah kee qurbaanee kay liyay bakra zabah karkay usay pahelee qurbaanee kee tarah chadhaaya. ¹⁶us nay bhasm honay vaalee qurbaanee bhee qavaaid kay mutaabiq chadhaaee. ¹⁷us nay ghalla kee nazar pesh kee aur us men say mutthee bhar qurbaangaah par jala diya. yah ghalla kee us nazar kay ilaava thee jo subah ko bhasm honay vaalee qurbaanee kay saath chadhaaee gaee thee. ¹⁸phir us nay salaamatee kee qurbaanee kay liyay bail aur mendhay ko zabah kiya. yah bhee qaum kay liyay thee. us kay beton nay usay jaanvaron ka khoon diya, aur us nay usay qurbaangaah kay chaar pahelooon par chhidak diya. ¹⁹lekin unhon nay bail aur mendhay ko charbee, dum, antadiyon par kee charbee aur jodkalejee nikaal kar ²⁰seenay kay tukdon par rakh diya. haaroon nay charbee ka hissa qurbaangaah par jala diya. ²¹seenay kay tukday aur dahenee raanen us nay hilaanay vaalee qurbaanee kay taur par rabb kay saamnay hilaaeen. us nay sab kuchh moosa kay hukm kay mutaabiq hee kiya.

²²tamaam qurbaaniyaan pesh karnay kay baad haaroon nay apnay haath utha kar qaum ko barkat dee. phir vah qurbaangaah say utar kar ²³moosa kay saath mulaaqaat kay khaimay men daakhil hua. jab donon baahar aaay to unhon nay qaum ko barkat dee. tab rabb ka jalaal pooree qaum par zaahir hua. ²⁴rabb kay huzoor say aag nikal kar qurbaangaah par utree aur bhasm honay vaalee qurbaanee aur charbee kay tukday bhasm kar diay. yah dekh kar log khushee kay naaray maarnay lagay aur munh kay bal gir gaay.