Ahabaar 8

haaroon aur us kay beton kee makhsoosiyat

¹rabb nay moosa say kaha, ²“haaroon aur us kay beton ko meray huzoor lay aana. neez imaamon kay libaas, masah ka tel, gunaah kee qurbaanee kay liyay javaan bail, do mendhay aur bekhameeree rotiyon kee tokree lay aana. ³phir pooree jamaaat ko khaimay kay darvaazay par jama karna.”

⁴moosa nay aisa hee kiya. jab pooree jamaaat ikatthee ho gaee to ⁵us nay un say kaha, “ab main vah kuchh karta hoon jis ka hukm rabb nay diya hai.” ⁶moosa nay haaroon aur us kay beton ko saamnay la kar ghusal karaaya. ⁷us nay haaroon ko kataan ka zerjaama pahena kar kamarband lapeta. phir us nay chogha pahenaaya jis par us nay baalaaposh ko mahaarat say bunay huay patkay say baandha. ⁸is kay baad us nay seenay ka keesa laga kar us men donon quraay banaam ooreem aur tummeem rakhay. ⁹phir us nay haaroon kay sar par pagdee rakhee jis kay saamnay vaalay hissay par us nay muqaddas taaj yaanee sonay kee takhtee laga dee. sab kuchh us hukm kay ain mutaabiq hua jo rabb nay moosa ko diya tha.

¹⁰is kay baad moosa nay masah kay tel say maqdis ko aur jo kuchh us men tha masah karkay usay makhsoos-o-muqaddas kiya. ¹¹us nay yah tel saat baar jaanvar chadhaanay kee qurbaangaah aur us kay saamaan par chhidak diya. isee tarah us nay saat baar dhonay kay hauz aur us dhaanchay par tel chhidak diya jis par hauz rakha hua tha. yoon yah cheezen makhsoos-o-muqaddas hueen. ¹²us nay haaroon kay sar par masah ka tel undel kar usay masah kiya. yoon vah makhsoos-o-muqaddas hua.

¹³phir moosa nay haaroon kay beton ko saamnay la kar unhen zerjaamay pahenaaay, kamarband lapetay aur un kay saron par pagdiyaan baandheen. sab kuchh us hukm kay ain mutaabiq hua jo rabb nay moosa ko diya tha.

¹⁴ab moosa nay gunaah kee qurbaanee kay liyay javaan bail ko pesh kiya. haaroon aur us kay beton nay apnay haath us kay sar par rakhay. ¹⁵moosa nay usay zabah karkay us kay khoon men say kuchh lay kar apnee unglee say qurbaangaah kay seengon par laga diya taaki vah gunaahon say paak ho jaaay. baaqee khoon us nay qurbaangaah kay paaay par undel diya. yoon us nay usay makhsoos-o-muqaddas karkay us ka kaffaara diya. ¹⁶moosa nay antadiyon par kee tamaam charbee, jodkalejee aur donon gurday un kee charbee samet lay kar qurbaangaah par jala diay. ¹⁷lekin bail kee khaal, gosht aur antadiyon kay gobar ko us nay khaimaagaah kay baahar lay ja kar jala diya. sab kuchh us hukm kay mutaabiq hua jo rabb nay moosa ko diya tha.

¹⁸is kay baad us nay bhasm honay vaalee qurbaanee kay liyay pahela mendha pesh kiya. haaroon aur us kay beton nay apnay haath us kay sar par rakh diay. ¹⁹moosa nay usay zabah karkay us ka khoon qurbaangaah kay chaar pahelooon par chhidak diya. ²⁰us nay mendhay ko tukday tukday karkay sar, tukday aur charbee jala dee. ²¹us nay antadiyaan aur pindaliyaan paanee say saaf karkay pooray mendhay ko qurbaangaah par jala diya. sab kuchh us hukm kay ain mutaabiq hua jo rabb nay moosa ko diya tha. rabb kay liyay jalnay vaalee yah qurbaanee bhasm honay vaalee qurbaanee thee, aur us kee khushboo rabb ko pasand thee.

²²is kay baad moosa nay doosray mendhay ko pesh kiya. is qurbaanee ka maqsad imaamon ko maqdis men khidmat kay liyay makhsoos karna tha. haaroon aur us kay beton nay apnay haath mendhay kay sar par rakh diay. ²³moosa nay usay zabah karkay us kay khoon men say kuchh lay kar haaroon kay dahenay kaan kee lau par aur us kay dahenay haath aur dahenay paaon kay angoothon par lagaaya. ²⁴yahee us nay haaroon kay beton kay saath bhee kiya. us nay unhen saamnay la kar un kay dahenay kaan kee lau par aur un kay dahenay haath aur dahenay paaon kay angoothon par khoon lagaaya. baaqee khoon us nay qurbaangaah kay chaar pahelooon par chhidak diya. ²⁵us nay mendhay kee charbee, dum, antadiyon par kee saaree charbee, jodkalejee, donon gurday un kee charbee samet aur dahenee raan alag kee. ²⁶phir vah rabb kay saamnay padee bekhameeree rotiyon kee tokree men say ek saada rotee, ek rotee jis men tel daala gaya tha aur ek rotee jis par tel lagaaya gaya tha lay kar charbee aur raan par rakh dee. ²⁷us nay yah sab kuchh haaroon aur us kay beton kay haathon par rakh kar usay hilaanay vaalee qurbaanee kay taur par rabb ko pesh kiya. ²⁸phir us nay yah cheezen un say vaapas lay kar qurbaangaah par jala deen jis par pahelay bhasm honay vaalee qurbaanee rakhee gaee thee. rabb kay liyay jalnay vaalee yah qurbaanee imaamon ko makhsoos karnay kay liyay chadhaaee gaee, aur us kee khushboo rabb ko pasand thee.

²⁹moosa nay seena bhee liya aur usay hilaanay vaalee qurbaanee kay taur par rabb kay saamnay hilaaya. yah makhsoosiyat kay mendhay men say moosa ka hissa tha. moosa nay is men bhee sab kuchh rabb kay hukm kay ain mutaabiq kiya.

³⁰phir us nay masah kay tel aur qurbaangaah par kay khoon men say kuchh lay kar haaroon, us kay beton aur un kay kapdon par chhidak diya. yoon us nay unhen aur un kay kapdon ko makhsoos-o-muqaddas kiya.

³¹moosa nay un say kaha, “gosht ko mulaaqaat kay khaimay kay darvaazay par ubaal kar usay un rotiyon kay saath khaana jo makhsoosiyat kee qurbaaniyon kee tokree men padee hain. kyoonki rabb nay mujhay yahee hukm diya hai. ³²gosht aur rotiyon ka baqaaya jala dena. ³³saat din tak mulaaqaat kay khaimay kay darvaazay men say na nikalna, kyoonki maqdis men khidmat kay liyay tumhaaree makhsoosiyat kay itnay hee din hain. ³⁴jo kuchh aaj hua hai vah rabb kay hukm kay mutaabiq hua taaki tumhaara kaffaara diya jaaay. ³⁵tumhen saat raat aur din tak khaimay kay darvaazay kay andar rahena hai. rabb kee is hidaayat ko maano varna tum mar jaaogay, kyoonki yah hukm mujhay rabb kee taraf say diya gaya hai.”

³⁶haaroon aur us kay beton nay un tamaam hidaayaat par amal kiya jo rabb nay moosa kee maarifat unhen dee theen.