Ahabaar 7

qusoor kee qurbaanee

¹qusoor kee qurbaanee jo nihaayat muqaddas hai us kay baaray men hidaayaat yah hain :

²qusoor kee qurbaanee vaheen zabah karnee hai jahaan bhasm honay vaalee qurbaanee zabah kee jaatee hai. us ka khoon qurbaangaah kay chaar pahelooon par chhidka jaaay. ³us kee tamaam charbee nikaal kar qurbaangaah par chadhaanee hai yaanee us kee dum, antadiyon par kee charbee, ⁴gurday us charbee samet jo un par aur kamar kay qareeb hotee hai aur jodkalejee. in cheezon ko gurdon kay saath hee alag karna hai. ⁵imaam yah sab kuchh rabb ko qurbaangaah par jalnay vaalee qurbaanee kay taur par pesh karay. yah qusoor kee qurbaanee hai. ⁶imaamon kay khaandaanon men say tamaam mard usay kha saktay hain. lekin usay muqaddas jagah par khaaya jaaay. yah nihaayat muqaddas hai.

⁷gunaah aur qusoor kee qurbaanee kay liyay ek hee usool hai, jo imaam qurbaanee ko pesh karkay kaffaara deta hai us ko us ka gosht milta hai. ⁸is tarah jo imaam kisee jaanvar ko bhasm honay vaalee qurbaanee kay taur par chadhaata hai usee ko jaanvar kee khaal miltee hai. ⁹aur isee tarah tanoor men, kadaahee men ya tavay par pakaaee gaee ghalla kee har nazar us imaam ko miltee hai jis nay usay pesh kiya hai. ¹⁰lekin haaroon kay tamaam beton ko ghalla kee baaqee nazren baraabar baraabar miltee rahen, khwaah un men tel milaaya gaya ho ya vah khushk hon.

salaamatee kee qurbaanee

¹¹salaamatee kee qurbaanee jo rabb ko pesh kee jaatee hai us kay baaray men zail kee hidaayaat hain :

¹²agar koee is qurbaanee say apnee shukrguzaaree ka izhaar karna chaahay to vah jaanvar kay saath bekhameeree rotee jis men tel daala gaya ho, bekhameeree rotee jis par tel lagaaya gaya ho aur rotee jis men behtareen maida aur tel milaaya gaya ho pesh karay. ¹³is kay ilaava vah khameeree rotee bhee pesh karay. ¹⁴pesh karnay vaala qurbaanee kee har cheez ka ek hissa utha kar rabb kay liyay makhsoos karay. yah us imaam ka hissa hai jo jaanvar ka khoon qurbaangaah par chhidakta hai. ¹⁵gosht usee din khaaya jaaay jab jaanvar ko zabah kiya gaya ho. aglee subah tak kuchh naheen bachna chaahiay.

¹⁶is qurbaanee ka gosht sirf is soorat men aglay din khaaya ja sakta hai jab kisee nay mannat maan kar ya apnee khushee say usay pesh kiya hai. ¹⁷agar kuchh gosht teesray din tak bach jaaay to usay jalaana hai. ¹⁸agar usay teesray din bhee khaaya jaaay to rabb yah qurbaanee qabool naheen karega. us ka koee faaida naheen hoga balki usay naapaak qaraar diya jaaega. jo bhee us say khaaega vah qusoorvaar thaherega. ¹⁹agar yah gosht kisee naapaak cheez say lag jaaay to usay naheen khaana hai balki usay jalaaya jaaay. agar gosht paak hai to har shakhs jo khud paak hai usay kha sakta hai. ²⁰lekin agar naapaak shakhs rabb ko pesh kee gaee salaamatee kee qurbaanee ka yah gosht khaaay to usay us kee qaum men say mita daalna hai. ²¹ho sakta hai ki kisee nay kisee naapaak cheez ko chhoo liya hai chaahay vah naapaak shakhs, jaanvar ya koee aur ghinaunee aur naapaak cheez ho. agar aisa shakhs rabb ko pesh kee gaee salaamatee kee qurbaanee ka gosht khaaay to usay us kee qaum men say mita daalna hai.”

charbee aur khoon khaana mana hai

²²rabb nay moosa say kaha, ²³“israaeeliyon ko bata dena ki gaay-bail aur bhed-bakriyon kee charbee khaana tumhaaray liyay mana hai. ²⁴tum fitree taur par maray huay jaanvaron aur phaaday huay jaanvaron kee charbee deegar kaamon kay liyay istemaal kar saktay ho, lekin usay khaana mana hai. ²⁵jo bhee us charbee men say khaaay jo jala kar rabb ko pesh kee jaatee hai usay us kee qaum men say mita daalna hai. ²⁶jahaan bhee tum rahetay ho vahaan parindon ya deegar jaanvaron ka khoon khaana mana hai. ²⁷jo bhee khoon khaaay usay us kee qaum men say mitaaya jaaay.”

qurbaaniyon men say imaam ka hissaa

²⁸rabb nay moosa say kaha, ²⁹“israaeeliyon ko bataana ki jo rabb ko salaamatee kee qurbaanee pesh karay vah rabb kay liyay ek hissa makhsoos karay. ³⁰vah jalnay vaalee yah qurbaanee apnay haathon say rabb ko pesh karay. is kay liyay vah jaanvar kee charbee aur seena rabb kay saamnay pesh karay. seena hilaanay vaalee qurbaanee ho. ³¹imaam charbee ko qurbaangaah par jala day jabki seena haaroon aur us kay beton ka hissa hai. ³²qurbaanee kee dahenee raan imaam ko uthaanay vaalee qurbaanee kay taur par dee jaaay. ³³vah us imaam ka hissa hai jo salaamatee kee qurbaanee ka khoon aur charbee chadhaata hai.

³⁴israaeeliyon kee salaamatee kee qurbaaniyon men say main nay hilaanay vaala seena aur uthaanay vaalee raan imaamon ko dee hai. yah cheezen hamesha kay liyay israaeeliyon kee taraf say imaamon ka haq hain.”

³⁵yah us din jalnay vaalee qurbaaniyon men say haaroon aur us kay beton ka hissa ban gaeen jab unhen maqdis men rabb kee khidmat men pesh kiya gaya. ³⁶rabb nay us din jab unhen tel say masah kiya gaya hukm diya tha ki israaeelee yah hissa hamesha imaamon ko diya karen.

³⁷gharaz yah hidaayaat tamaam qurbaaniyon kay baaray men hain yaanee bhasm honay vaalee qurbaanee, ghalla kee nazar, gunaah kee qurbaanee, qusoor kee qurbaanee, imaam ko maqdis men khidmat kay liyay makhsoos karnay kee qurbaanee aur salaamatee kee qurbaanee kay baaray men. ³⁸rabb nay moosa ko yah hidaayaat seena pahaad par deen, us din jab us nay israaeeliyon ko hukm diya ki vah dasht-ay-seena men rabb ko apnee qurbaaniyaan pesh karen.