Ahabaar 6

¹rabb nay moosa say kaha, ²“ho sakta hai kisee nay gunaah karkay beeemaanee kee hai, maslan us nay apnay padosee kee koee cheez vaapas naheen kee jo us kay sapurd kee gaee thee ya jo usay girvee kay taur par milee thee, ya us nay us kee koee cheez choree kee, ya us nay kisee say koee cheez chheen lee, ³ya us nay kisee kee gumshuda cheez kay baaray men jhoot bola jab usay mil gaee, ya us nay qasam kha kar jhoot bola hai, ya is tarah ka koee aur gunaah kiya hai. ⁴agar vah is tarah ka gunaah karkay qusoorvaar thaheray to laazim hai ki vah vahee cheez vaapas karay jo us nay choree kee ya chheen lee ya jo us kay sapurd kee gaee ya jo gumshuda ho kar us kay paas a gaee hai ⁵ya jis kay baaray men us nay qasam kha kar jhoot bola hai. vah us ka utna hee vaapas karkay 20 feesad ziyaada day. aur vah yah sab kuchh us din vaapas karay jab vah apnee qusoor kee qurbaanee pesh karta hai. ⁶qusoor kee qurbaanee kay taur par vah ek beaib aur qeemat kay lihaaz say munaasib mendha imaam kay paas lay aaay aur rabb ko pesh karay. us kee qeemat maqdis kee sharah kay mutaabiq muqarrar kee jaaay. ⁷phir imaam rabb kay saamnay us ka kaffaara dega to usay muaafee mil jaaegee.”

bhasam honay vaalee qurbaanee

⁸rabb nay moosa say kaha, ⁹“haaroon aur us kay beton ko bhasm honay vaalee qurbaaniyon kay baaray men zail kee hidaayaat dena : bhasm honay vaalee qurbaanee pooree raat subah tak qurbaangaah kee us jagah par rahay jahaan aag jaltee hai. aag ko bujhnay na dena. ¹⁰subah ko imaam kataan ka libaas aur kataan ka paajaama pahen kar qurbaanee say bachee huee raakh qurbaangaah kay paas zameen par daalay. ¹¹phir vah apnay kapday badal kar raakh ko khaimaagaah kay baahar kisee paak jagah par chhod aaay. ¹²qurbaangaah par aag jaltee rahay. vah kabhee bhee na bujhay. har subah imaam lakdiyaan chun kar us par bhasm honay vaalee qurbaanee tarteeb say rakhay aur us par salaamatee kee qurbaanee kee charbee jala day. ¹³aag hamesha jaltee rahay. vah kabhee na bujhnay paaay.

ghalla kee nazar

¹⁴ghalla kee nazar kay baaray men hidaayaat yah hain : haaroon kay betay usay qurbaangaah kay saamnay rabb ko pesh karen. ¹⁵phir imaam yaadgaar ka hissa yaanee tel say milaaya gaya mutthee bhar behtareen maida aur qurbaanee ka tamaam lubaan lay kar qurbaangaah par jala day. is kee khushboo rabb ko pasand hai. ¹⁶haaroon aur us kay betay qurbaanee ka baaqee hissa kha len. lekin vah usay muqaddas jagah par yaanee mulaaqaat kay khaimay kee chaardeevaaree kay andar khaaen, aur us men khameer na ho. ¹⁷usay pakaanay kay liyay us men khameer na daala jaaay. main nay jalnay vaalee qurbaaniyon men say yah hissa un kay liyay muqarrar kiya hai. yah gunaah kee qurbaanee aur qusoor kee qurbaanee kee tarah nihaayat muqaddas hai. ¹⁸haaroon kee aulaad kay tamaam mard usay khaaen. yah usool abad tak qaaim rahay. jo bhee usay chhuega vah makhsoos-o-muqaddas ho jaaega.”

¹⁹rabb nay moosa say kaha, ²⁰“jab haaroon aur us kay beton ko imaam kee zimmaadaaree uthaanay kay liyay makhsoos karkay tel say masah kiya jaaega to vah dedh kilograam behtareen maida pesh karen. us ka aadha hissa subah ko aur aadha hissa shaam kay vaqt pesh kiya jaaay. vah ghalla kee yah nazar rozaana pesh karen. ²¹usay tel kay saath mila kar tavay par pakaana hai. phir usay tukday tukday karkay ghalla kee nazar kay taur par pesh karna. us kee khushboo rabb ko pasand hai. ²²yah qurbaanee hamesha haaroon kee nasal ka vah aadmee pesh karay jisay masah karkay imaam-ay-aazam ka uhda diya gaya hai, aur vah usay pooray taur par rabb kay liyay jala day. ²³imaam kee ghalla kee nazar hamesha pooray taur par jalaana. usay na khaana.”

gunaah kee qurbaanee

²⁴rabb nay moosa say kaha, ²⁵“haaroon aur us kay beton ko gunaah kee qurbaanee kay baaray men zail kee hidaayaat dena : gunaah kee qurbaanee ko rabb kay saamnay vaheen zabah karna hai jahaan bhasm honay vaalee qurbaanee zabah kee jaatee hai. vah nihaayat muqaddas hai. ²⁶usay pesh karnay vaala imaam usay muqaddas jagah par yaanee mulaaqaat kay khaimay kee chaardeevaaree kay andar khaaay. ²⁷jo bhee is qurbaanee kay gosht ko chhoo leta hai vah makhsoos-o-muqaddas ho jaata hai. agar qurbaanee kay khoon kay chheentay kisee libaas par pad jaaen to usay muqaddas jagah par dhona hai. ²⁸agar gosht ko handiya men pakaaya gaya ho to us bartan ko baad men tod dena hai. agar us kay liyay peetal ka bartan istemaal kiya gaya ho to usay khoob maanjh kar paanee say saaf karna. ²⁹imaamon kay khaandaanon men say tamaam mard usay kha saktay hain. yah khaana nihaayat muqaddas hai. ³⁰lekin gunaah kee har vah qurbaanee khaaee na jaaay jis ka khoon mulaaqaat kay khaimay men is liyay laaya gaya hai ki maqdis men kisee ka kaffaara diya jaaay. usay jalaana hai.