Ahabaar 27

makhsoos kee huee cheezon kee vaapsee

¹rabb nay moosa say kaha, ²“israaeeliyon ko bataana ki agar kisee nay mannat maan kar kisee ko rabb kay liyay makhsoos kiya ho to vah usay zail kee raqam day kar aazaad kar sakta hai (mustaamal sikkay maqdis kay sikkon kay baraabar hon) : ³us aadmee kay liyay jis kee umr 20 aur 60 saal kay darmiyaan hai chaandee kay 50 sikkay, ⁴isee umr kee aurat kay liyay chaandee kay 30 sikkay, ⁵us ladkay kay liyay jis kee umr 5 aur 20 saal kay darmiyaan ho chaandee kay 20 sikkay, isee umr kee ladkee kay liyay chaandee kay 10 sikkay, ⁶ek maah say lay kar 5 saal tak kay ladkay kay liyay chaandee kay 5 sikkay, isee umr kee ladkee kay liyay chaandee kay 3 sikkay, ⁷saath saal say baday aadmee kay liyay chaandee kay 15 sikkay aur isee umr kee aurat kay liyay chaandee kay 10 sikkay.

⁸agar mannat maannay vaala muqarrara raqam ada na kar sakay to vah makhsoos kiay huay shakhs ko imaam kay paas lay aaay. phir imaam aisee raqam muqarrar karay jo mannat maannay vaala ada kar sakay.

⁹agar kisee nay mannat maan kar aisa jaanvar makhsoos kiya jo rabb kee qurbaaniyon kay liyay istemaal ho sakta hai to aisa jaanvar makhsoos-o-muqaddas ho jaata hai. ¹⁰vah usay badal naheen sakta. na vah achchhay jaanvar kee jagah naaqis, na naaqis jaanvar kee jagah achchha jaanvar day. agar vah ek jaanvar doosray kee jagah day to donon makhsoos-o-muqaddas ho jaatay hain.

¹¹agar kisee nay mannat maan kar koee naapaak jaanvar makhsoos kiya jo rabb kee qurbaaniyon kay liyay istemaal naheen ho sakta to vah us ko imaam kay paas lay aaay. ¹²imaam us kee raqam us kee achchhee aur buree sifton ka lihaaz karkay muqarrar karay. is muqarrara qeemat men kamee beshee naheen ho saktee. ¹³agar mannat maannay vaala usay vaapas khareedna chaahay to vah muqarrara qeemat jama 20 feesad ada karay.

¹⁴agar koee apna ghar rabb kay liyay makhsoos-o-muqaddas karay to imaam us kee achchhee aur buree sifton ka lihaaz karkay us kee raqam muqarrar karay. is muqarrara qeemat men kamee beshee naheen ho saktee. ¹⁵agar ghar ko makhsoos karnay vaala usay vaapas khareedna chaahay to vah muqarrara raqam jama 20 feesad ada karay.

¹⁶agar koee apnee mauroosee zameen men say kuchh rabb kay liyay makhsoos-o-muqaddas karay to us kee qeemat us beej kee miqdaar kay mutaabiq muqarrar kee jaaay jo us men bona hota hai. jis khet men 135 kilograam jau ka beej boya jaaay us kee qeemat chaandee kay 50 sikkay hogee. ¹⁷shart yah hai ki vah apnee zameen bahaalee kay saal kay ain baad makhsoos karay. phir us kee yahee qeemat muqarrar kee jaaay. ¹⁸agar zameen ka maalik usay bahaalee kay saal kay kuchh der baad makhsoos karay to imaam aglay bahaalee kay saal tak rahenay vaalay saalon kay mutaabiq zameen kee qeemat muqarrar karay. jitnay kam saal baaqee hain utnee kam us kee qeemat hogee. ¹⁹agar makhsoos karnay vaala apnee zameen vaapas khareedna chaahay to vah muqarrara qeemat jama 20 feesad ada karay. ²⁰agar makhsoos karnay vaala apnee zameen ko rabb say vaapas khareeday baghair usay kisee aur ko bechay to usay vaapas khareednay ka haq khatm ho jaaega. ²¹aglay bahaalee kay saal yah zameen makhsoos-o-muqaddas rahegee aur rabb kee daaimee milkiyat ho jaaegee. chunaanchay vah imaam kee milkiyat hogee.

²²agar koee apna mauroosee khet naheen balki apna khareeda hua khet rabb kay liyay makhsoos kare ²³to imaam aglay bahaalee kay saal tak rahenay vaalay saalon ka lihaaz karkay us kee qeemat muqarrar karay. khet ka maalik usee din us kay paisay ada karay. yah paisay rabb kay liyay makhsoos-o-muqaddas hongay. ²⁴bahaalee kay saal men yah khet us shakhs kay paas vaapas aaega jis nay usay becha tha.

²⁵vaapas khareednay kay liyay mustaamal sikkay maqdis kay sikkon kay baraabar hon. us kay chaandee kay sikkon ka vazan 11 graam hai.

²⁶lekin koee bhee kisee maveshee ka pahelautha rabb kay liyay makhsoos naheen kar sakta. vah to pahelay say rabb kay liyay makhsoos hai. is men koee farq naheen ki vah gaay, bail ya bhed ho. ²⁷agar us nay koee naapaak jaanvar makhsoos kiya ho to vah usay muqarrara qeemat jama 20 feesad kay liyay vaapas khareed sakta hai. agar vah usay vaapas na khareeday to vah muqarrara qeemat kay liyay becha jaaay.

²⁸lekin agar kisee nay apnee milkiyat men say kuchh ghairmashroot taur par rabb kay liyay makhsoos kiya hai to usay becha ya vaapas naheen khareeda ja sakta, khwaah vah insaan, jaanvar ya zameen ho. jo is tarah makhsoos kiya gaya ho vah rabb kay liyay nihaayat muqaddas hai. ²⁹isee tarah jis shakhs ko tabaahee kay liyay makhsoos kiya gaya hai us ka fidya naheen diya ja sakta. laazim hai ki usay saza-ay-maut dee jaaay.

³⁰har fasal ka dasvaan hissa rabb ka hai, chaahay vah anaaj ho ya phal. vah rabb kay liyay makhsoos-o-muqaddas hai. ³¹agar koee apnee fasal ka dasvaan hissa chhudaana chaahata hai to vah is kay liyay us kee muqarrara qeemat jama 20 feesad day. ³²isee tarah gaay-bailon aur bhed-bakriyon ka dasvaan hissa bhee rabb kay liyay makhsoos-o-muqaddas hai, har dasvaan jaanvar jo gallaabaan kay danday kay neechay say guzrega. ³³yah jaanvar chunnay say pahelay un ka muaaina na kiya jaaay ki kaun say jaanvar achchhay ya kamzor hain. yah bhee na karna ki dasven hissay kay kisee jaanvar kay badlay koee aur jaanvar diya jaaay. agar phir bhee usay badla jaaay to donon jaanvar rabb kay liyay makhsoos-o-muqaddas hongay. aur unhen vaapas khareeda naheen ja sakta.”

³⁴yah vah ahkaam hain jo rabb nay seena pahaad par moosa ko israaeeliyon kay liyay diay.