Ahabaar 26

faramaambardaaree ka ajr

¹apnay liyay but na banaana. na apnay liyay devta kay mujassmay ya patthar kay makhsoos kiay huay satoon khaday karna, na sijda karnay kay liyay apnay mulk men aisay patthar rakhna jin men devta kee tasveer kanda kee gaee ho. main rabb tumhaara khuda hoon. ²sabat ka din manaana aur meray maqdis kee taazeem karna. main rabb hoon.

³agar tum meree hidaayaat par chalo aur meray ahkaam maan kar un par amal karo ⁴to main vaqt par baarish bhejoonga, zameen apnee paidaavaar degee aur darakht apnay apnay phal laaengay. ⁵kasrat kay baais anaaj kee fasal kee kataaee angoor todtay vaqt tak jaaree rahegee aur angoor kee fasal us vaqt tak todee jaaegee jab tak beej bonay ka mausam aaega. itnee khuraak milegee ki tum kabhee bhookay naheen hogay. aur tum apnay mulk men mahfooz rahogay.

⁶main mulk ko amn-o-amaan bakhshoonga. tum aaraam say let jaaogay, kyoonki kisee khatray say darnay kee zaroorat naheen hogee. main vaheshee jaanvar mulk say door kar doonga, aur vah talvaar kee qatl-o-ghaarat say bacha rahega. ⁷tum apnay dushmanon par ghaalib a kar un ka taaqqub karogay, aur vah tumhaaree talvaar say maaray jaaengay. ⁸tumhaaray paanch aadmee sau dushmanon ka peechha karengay, aur tumhaaray sau aadmee un kay das hazaar aadmiyon ko bhaga dengay. tumhaaray dushman tumhaaree talvaar say maaray jaaengay.

⁹meree nazar-ay-karam tum par hogee. main tumhaaree aulaad kee taadaad badhaaoonga aur tumhaaray saath apna ahd qaaim rakhoonga. ¹⁰ek saal itnee fasal hogee ki jab aglee fasal kee kataaee hogee to naay anaaj kay liyay jagah banaanay kee khaatir puraanay anaaj ko phaink dena padega. ¹¹main tumhaaray darmiyaan apna maskan qaaim karoonga aur tum say ghin naheen khaaoonga. ¹²main tum men phiroonga, aur tum meree qaum hogay.

¹³main rabb tumhaara khuda hoon jo tumhen misr say nikaal laaya taaki tumhaaree ghulaamee kee haalat khatm ho jaaay. main nay tumhaaray jooay ko tod daala, aur ab tum aazaad aur seedhay ho kar chal saktay ho.

faramaambardaar na honay kee sazaa

¹⁴lekin agar tum meree naheen sunogay aur in tamaam ahkaam par naheen chalogay, ¹⁵agar tum meree hidaayaat ko radd karkay meray ahkaam say ghin khaaogay aur un par amal na karkay mera ahd todoge ¹⁶to main javaab men tum par achaanak dahshat taaree kar doonga. jism ko khatm karnay vaalee beemaariyon aur bukhaar say tumhaaree aankhen zaaay ho jaaengee aur tumhaaree jaan chhin jaaegee. jab tum beej boogay to befaaida, kyoonki dushman us kee fasal kha jaaega. ¹⁷main tumhaaray khilaaf ho jaaoonga, is liyay tum apnay dushmanon kay haath say shikast khaaogay. tum say nafrat rakhnay vaalay tum par hukoomat karengay. us vaqt bhee jab koee tumhaara taaqqub naheen karega tum bhaag jaaogay.

¹⁸agar tum is kay baad bhee meree na suno to main tumhaaray gunaahon kay sabab say tumhen saat guna ziyaada saza doonga. ¹⁹main tumhaara sakht gharoor khaak men mila doonga. tumhaaray oopar aasmaan lohay jaisa aur tumhaaray neechay zameen peetal jaisee hogee. ²⁰jitnee bhee mehanat karogay vah befaaida hogee, kyoonki tumhaaray kheton men faslen naheen pakengee aur tumhaaray darakht phal naheen laaengay.

²¹agar tum phir bhee meree mukhaalafat karogay aur meree naheen sunogay to main in gunaahon kay javaab men tumhen is say bhee saat guna ziyaada saza doonga. ²²main tumhaaray khilaaf janglee jaanvar bhej doonga jo tumhaaray bachchon ko phaad khaaengay aur tumhaaray maveshee barbaad kar dengay. aakhir men tumhaaree taadaad itnee kam ho jaaegee ki tumhaaree sadken veeraan ho jaaengee.

²³agar tum phir bhee meree tarbiyat qabool na karo balki meray mukhaalif raho ²⁴to main khud tumhaaray khilaaf ho jaaoonga. in gunaahon kay javaab men main tumhen saat guna ziyaada saza doonga. ²⁵main tum par talvaar chala kar is ka badla loonga ki tum nay meray ahd ko toda hai. jab tum apnee hifaazat kay liyay shaheron men bhaag kar jama hogay to main tumhaaray darmiyaan vabaaee beemaariyaan phailaaoonga aur tumhen dushmanon kay haath men day doonga. ²⁶anaaj kee itnee kamee hogee ki das aurten tumhaaree pooree rotee ek hee tanoor men paka sakengee, aur vah usay badee ehatiyaat say tol tol kar taqseem karengee. tum kha kar bhee bhookay rahogay.

²⁷agar tum phir bhee meree naheen sunogay balki meray mukhaalif rahoge ²⁸to mera ghussa bhadkega aur main tumhaaray khilaaf ho kar tumhaaray gunaahon kay javaab men tumhen saat guna ziyaada saza doonga. ²⁹tum museebat kay baais apnay betay-betiyon ka gosht khaaogay. ³⁰main tumhaaree oonchee jagahon kee qurbaangaahen aur tumhaaree bakhoor kee qurbaangaahen barbaad kar doonga. main tumhaaree laashon kay dher tumhaaray bejaan buton par lagaaoonga aur tum say ghin khaaoonga. ³¹main tumhaaray shaheron ko khandaraat men badal kar tumhaaray mandiron ko barbaad karoonga. tumhaaree qurbaaniyon kee khushboo mujhay pasand naheen aaegee. ³²main tumhaaray mulk ka satyaanaas yoon karoonga ki jo dushman us men aabaad ho jaaengay un kay rongtay khaday ho jaaengay. ³³main tumhen mukhtalif mamaalik men muntashir kar doonga, lekin vahaan bhee apnee talvaar ko haath men liyay tumhaara peechha karoonga. tumhaaree zameen veeraan hogee aur tumhaaray shaher khandaraat ban jaaengay. ³⁴us vaqt jab tum apnay dushmanon kay mulk men rahogay tumhaaree zameen veeraan haalat men aaraam kay vah saal mana sakegee jin say vah maheroom rahee hai. ³⁵un tamaam dinon men jab vah barbaad rahegee usay vah aaraam milega jo usay na mila jab tum mulk men rahetay thay.

³⁶tum men say jo bach kar apnay dushmanon kay mamaalik men rahengay un kay dilon par main dahshat taaree karoonga. vah hava kay jhonkon say girnay vaalay pattay kee aavaaz say chaunk kar bhaag jaaengay. vah faraar hongay goya koee haath men talvaar liyay un ka taaqqub kar raha ho. aur vah gir kar mar jaaengay haalaanki koee un ka peechha naheen kar raha hoga. ³⁷vah ek doosray say takra kar ladkhadaaengay goya koee talvaar lay kar un kay peechhay chal raha ho haalaanki koee naheen hai. chunaanchay tum apnay dushmanon ka saamna naheen kar sakogay. ³⁸tum deegar qaumon men muntashir ho kar halaak ho jaaogay, aur tumhaaray dushmanon kee zameen tumhen hadap kar legee.

³⁹tum men say baaqee log apnay aur apnay baapdaada kay qusoor kay baais apnay dushmanon kay mamaalik men gal sad jaaengay. ⁴⁰lekin ek vaqt aaega ki vah apnay aur apnay baapdaada ka qusoor maan lengay. vah meray saath apnee bevafaaee aur vah mukhaalafat tasleem karenge ⁴¹jis kay sabab say main un kay khilaaf hua aur unhen un kay dushmanon kay mulk men dhakel diya tha. pahelay un ka khatna sirf zaahiree taur par hua tha, lekin ab un ka dil aajiz ho jaaega aur vah apnay qusoor kee qeemat ada karengay. ⁴²phir main ibraaheem kay saath apna ahd, ishaaq kay saath apna ahd aur yaaqoob kay saath apna ahd yaad karoonga. main mulk-ay-kan’aan bhee yaad karoonga. ⁴³lekin pahelay vah zameen ko chhodengay taaki vah un kee ghairmaujoodgee men veeraan ho kar aaraam kay saal manaaay. yoon israaeelee apnay qusoor kay nateejay bhugatengay, is sabab say ki unhon nay meray ahkaam radd kiay aur meree hidaayaat say ghin khaaee. ⁴⁴is kay baavujood bhee main unhen dushmanon kay mulk men chhod kar radd naheen karoonga, na yahaan tak un say ghin khaaoonga ki vah bilkul tabaah ho jaaen. kyoonki main un kay saath apna ahd naheen todnay ka. main rabb un ka khuda hoon. ⁴⁵main un kee khaatir un kay baapdaada kay saath bandha hua ahd yaad karoonga, un logon kay saath ahd jinhen main doosree qaumon kay dekhtay dekhtay misr say nikaal laaya taaki un ka khuda hoon. main rabb hoon.”

⁴⁶rabb nay moosa ko israaeeliyon kay liyay yah tamaam hidaayaat aur ahkaam seena pahaad par diay.