Ahabaar 25
zameen kay liyay sabat ka saal
1rabb nay seena pahaad par moosa say kaha, 2“israaeeliyon ko bataana ki jab tum us mulk men daakhil hogay jo main tumhen doonga to laazim hai ki rabb kee taazeem men zameen ek saal aaraam karay. 3chhah saal kay dauraan apnay kheton men beej bona, apnay angoor kay baaghon kee kaant-chhaant karna aur un kee faslen jama karna. 4lekin saatvaan saal zameen kay liyay aaraam ka saal hai, rabb kee taazeem men sabat ka saal. us saal na apnay kheton men beej bona, na apnay angoor kay baaghon kee kaant-chhaant karna. 5jo anaaj khud-ba-khud ugta hai us kee kataaee na karna aur jo angoor us saal lagtay hain un ko tod kar jama na karna, kyoonki zameen ko ek saal kay liyay aaraam karna hai. 6alabatta jo bhee yah zameen aaraam kay saal men paida karegee us say tum apnee rozaana kee zarooriyaat pooree kar saktay ho yaanee too, teray ghulaam aur laundiyaan, teray mazdoor, teray ghairshaheree, teray saath rahenay vaalay pardesee, 7teray maveshee aur teree zameen par rahenay vaalay janglee jaanvar. jo kuchh bhee yah zameen paida kartee hai vah khaaya ja sakta hai.
bahaalee ka saal
8saat sabat kay saal yaanee 49 saal kay baad ek aur kaam karna hai. 9pachaasaven saal kay saatven maheenay kay dasven din yaanee kaffaara kay din apnay mulk kee har jagah narsinga bajaana. 10pachaasavaan saal makhsoos-o-muqaddas karo aur pooray mulk men elaan karo ki tamaam baashindon ko aazaad kar diya jaaay. yah bahaalee ka saal ho jis men har shakhs ko us kee milkiyat vaapas kee jaaay aur har ghulaam ko aazaad kiya jaaay taaki vah apnay rishtedaaron kay paas vaapas ja sakay. 11yah pachaasavaan saal bahaalee ka saal ho, is liyay na apnay kheton men beej bona, na khud-ba-khud ugnay vaalay anaaj kee kataaee karna, aur na angoor tod kar jama karna. 12kyoonki yah bahaalee ka saal hai jo tumhaaray liyay makhsoos-o-muqaddas hai. rozaana utnee hee paidaavaar lena ki ek din kee zarooriyaat pooree ho jaaen. 13bahaalee kay saal men har shakhs ko us kee milkiyat vaapas kee jaaay.
14chunaanchay jab kabhee tum apnay kisee hamvatan bhaaee ko zameen bechatay ya us say khareedtay ho to us say naajaaiz faaida na uthaana. 15zameen kee qeemat is hisaab say muqarrar kee jaaay ki vah aglay bahaalee kay saal tak kitnay saal faslen paida karegee. 16agar bahut saal rah gaay hon to us kee qeemat ziyaada hogee, aur agar kam saal rah gaay hon to us kee qeemat kam hogee. kyoonki un faslon kee taadaad bik rahee hai jo zameen aglay bahaalee kay saal tak paida kar saktee hai.
17apnay hamvatan say naajaaiz faaida na uthaana balki rabb apnay khuda ka khauf maanna, kyoonki main rabb tumhaara khuda hoon.
18meree hidaayaat par amal karna aur meray ahkaam ko maan kar un kay mutaabiq chalna. tab tum apnay mulk men mahfooz rahogay. 19zameen apnee pooree paidaavaar degee, tum ser ho jaaogay aur mahfooz rahogay. 20ho sakta hai koee poochhay, ‘ham saatven saal men kya khaaengay jabki ham beej naheen boengay aur fasal naheen kaatengay?’ 21javaab yah hai ki main chhatay saal men zameen ko itnee barkat doonga ki us saal kee paidaavaar teen saal kay liyay kaafee hogee. 22jab tum aathven saal beej boogay to tumhaaray paas chhatay saal kee itnee paidaavaar baaqee hogee ki tum fasal kee kataaee tak guzaara kar sakogay.
mauroosee zameen kay huqooq
23koee zameen bhee hamesha kay liyay na bechee jaaay, kyoonki mulk kee tamaam zameen meree hee hai. tum meray huzoor sirf pardesee aur ghairshaheree ho. 24mulk men jahaan bhee zameen bik jaaay vahaan mauroosee maalik ka yah haq maana jaaay ki vah apnee zameen vaapas khareed sakta hai.
25agar tera koee hamvatan bhaaee ghareeb ho kar apnee kuchh zameen bechanay par majboor ho jaaay to laazim hai ki us ka sab say qareebee rishtedaar usay vaapas khareed lay. 26ho sakta hai ki aisay shakhs ka koee qareebee rishtedaar na ho jo us kee zameen vaapas khareed sakay, lekin vah khud kuchh der kay baad itnay paisay jama karta hai ki vah apnee zameen vaapas khareed sakta hai. 27is soorat men vah hisaab karay ki khareednay vaalay kay liyay aglay bahaalee kay saal tak kitnay saal rah gaay hain. jitna nuqsaan khareednay vaalay ko zameen ko bahaalee kay saal say pahelay vaapas denay say pahunchega utnay hee paisay usay denay hain. 28lekin agar us kay paas itnay paisay na hon to zameen aglay bahaalee kay saal tak khareednay vaalay kay haath men rahegee. phir usay mauroosee maalik ko vaapas diya jaaega.
29agar kisee ka ghar faseeldaar shaher men hai to jab vah usay bechega to apna ghar vaapas khareednay ka haq sirf ek saal tak rahega. 30agar pahela maalik usay pahelay saal kay andar andar na khareeday to vah hamesha kay liyay khareednay vaalay kee mauroosee milkiyat ban jaaega. vah bahaalee kay saal men bhee vaapas naheen kiya jaaega.
31lekin jo ghar aisee aabaadee men hai jis kee faseel na ho vah deehaat men shumaar kiya jaata hai. us kay mauroosee maalik ko haq haasil hai ki har vaqt apna ghar vaapas khareed sakay. bahaalee kay saal men is ghar ko laaziman vaapas kar dena hai.
32lekin laaviyon ko yah haq haasil hai ki vah apnay vah ghar har vaqt khareed saktay hain jo un kay liyay muqarrar kiay huay shaheron men hain. 33agar aisa ghar kisee laavee kay haath farokht kiya jaaay aur vaapas na khareeda jaaay to usay laaziman bahaalee kay saal men vaapas karna hai. kyoonki laavee kay jo ghar un kay muqarrara shaheron men hotay hain vah israaeeliyon men un kee mauroosee milkiyat hain. 34lekin jo zameenen shaheron kay ird-gird maveshee charaanay kay liyay muqarrar hain unhen bechanay kee ijaazat naheen hai. vah un kee daaimee milkiyat hain.
ghareebon kay liyay qarzaa
35agar tera koee hamvatan bhaaee ghareeb ho jaaay aur guzaara na kar sakay to us kee madad kar. us tarah us kee madad karna jis tarah pardesee ya ghairshaheree kee madad karnee hotee hai taaki vah teray saath rahetay huay zindagee guzaar sakay. 36us say kisee tarah ka sood na lena balki apnay khuda ka khauf maanna taaki tera bhaaee teray saath zindagee guzaar sakay. 37agar vah tera qarzdaar ho to us say sood na lena. isee tarah khuraak bechatay vaqt us say nafa na lena. 38main rabb tumhaara khuda hoon. main tumhen is liyay misr say nikaal laaya ki tumhen mulk-ay-kan’aan doon aur tumhaara khuda hoon.
israaeelee ghulaamon kay huqooq
39agar tera koee israaeelee bhaaee ghareeb ho kar apnay aap ko teray haath bech daalay to us say ghulaam ka sa kaam na karaana. 40us kay saath mazdoor ya ghairshaheree ka sa sulook karna. vah teray liyay bahaalee kay saal tak kaam karay. 41phir vah aur us kay baal-bachchay aazaad ho kar apnay rishtedaaron aur mauroosee zameen kay paas vaapas jaaen. 42choonki israaeelee meray khaadim hain jinhen main misr say nikaal laaya is liyay unhen ghulaamee men na becha jaaay. 43aisay logon par sakhtee say hukmraanee na karna balki apnay khuda ka khauf maanna.
44tum padosee mamaalik say apnay liyay ghulaam aur laundiyaan haasil kar saktay ho. 45jo pardesee ghairshaheree kay taur par tumhaaray mulk men aabaad hain unhen bhee tum khareed saktay ho. un men vah bhee shaamil hain jo tumhaaray mulk men paida huay hain. vahee tumhaaree milkiyat ban kar 46tumahaaray beton kee meeraas men a jaaen aur vahee hamesha tumhaaray ghulaam rahen. lekin apnay hamvatan bhaaiyon par sakht hukmraanee na karna.
47agar teray mulk men rahenay vaala koee pardesee ya ghairshaheree ameer ho jaaay jabki tera koee hamvatan bhaaee ghareeb ho kar apnay aap ko us pardesee ya ghairshaheree ya us kay khaandaan kay kisee fard ko bech daale 48to bik jaanay kay baad usay aazaadee khareednay ka haq haasil hai. koee bhaaee, 49chacha, taaya, chacha ya taaya ka beta ya koee aur qareebee rishtedaar usay vaapas khareed sakta hai. vah khud bhee apnee aazaadee khareed sakta hai agar us kay paas paisay kaafee hon. 50is soorat men vah apnay maalik say mil kar vah saal ginay jo us kay khareednay say lay kar aglay bahaalee kay saal tak baaqee hain. us kee aazaadee kay paisay us qeemat par mabnee hon jo mazdoor ko itnay saalon kay liyay diay jaatay hain. 51-52 jitnay saal baaqee rah gaay hain un kay mutaabiq us kee bik jaanay kee qeemat men say paisay vaapas kar diay jaaen. 53us kay saath saal-ba-saal mazdoor ka sa sulook kiya jaaay. us ka maalik us par sakht hukmraanee na karay. 54agar vah is tarah kay kisee tareeqay say aazaad na ho jaaay to usay aur us kay bachchon ko har haalat men aglay bahaalee kay saal men aazaad kar dena hai, 55kyoonki israaeelee meray hee khaadim hain. vah meray hee khaadim hain jinhen main misr say nikaal laaya. main rabb tumhaara khuda hoon.