Ahabaar 24
rabb kay saamnay shamaadaan aur rotiyaan
1rabb nay moosa say kaha, 2“israaeeliyon ko hukm day ki vah teray paas kootay huay zaitoonon ka khaalis tel lay aaen taaki muqaddas kamray kay shamaadaan kay charaagh mutvaatir jaltay rahen. 3haaroon unhen musalsal, shaam say lay kar subah tak rabb kay huzoor sambhaalay yaanee vahaan jahaan vah muqaddastareen kamray kay parday kay saamnay paday hain, us parday kay saamnay jis kay peechhay ahd ka sandooq hai. yah usool abad tak qaaim rahay. 4vah khaalis sonay kay shamaadaan par lagay charaaghon kee dekh-bhaal yoon karay ki yah hamesha rabb kay saamnay jaltay rahen.
5baarah rotiyaan pakaana. har rotee kay liyay 3 kilograam behtareen maida istemaal kiya jaaay. 6unhen do qataaron men rabb kay saamnay khaalis sonay kee mez par rakhna. 7har qataar par khaalis lubaan daalna. yah lubaan rotee kay liyay yaadgaaree kee qurbaanee hai jisay baad men rabb kay liyay jalaana hai. 8har haftay ko rabb kay saamnay taaza rotiyaan isee tarteeb say mez par rakhnee hain. yah israaeeliyon kay liyay abdee ahd kee laazimee shart hai. 9mez kee rotiyaan haaroon aur us kay beton ka hissa hain, aur vah unhen muqaddas jagah par khaaen, kyoonki vah jalnay vaalee qurbaaniyon ka muqaddastareen hissa hain. yah abad tak un ka haq rahega.”
allaah kee tauheen, khoonrezee aur zakhmee karnay kee sazaaen
10-11 khaimaagaah men ek aadmee tha jis ka baap misree aur maan israaeelee thee. maan ka naam saloomeet tha. vah dibree kee betee aur daan kay qabeela kee thee. ek din yah aadmee khaimaagaah men kisee israaeelee say jhagadnay laga. ladtay ladtay us nay rabb kay naam par kufr bak kar us par laanat bhejee. yah sun kar log usay moosa kay paas lay aaay. 12vahaan unhon nay usay paheray men bitha kar rabb kee hidaayat ka intizaar kiya.
13tab rabb nay moosa say kaha, 14“laanat karnay vaalay ko khaimaagaah kay baahar lay jaao. jinhon nay us kee yah baaten sunee hain vah sab apnay haath us kay sar par rakhen. phir pooree jamaaat usay sangasaar karay. 15israaeeliyon say kahena ki jo bhee apnay khuda par laanat bhejay usay apnay qusoor kay nateejay bardaasht karnay padengay. 16jo bhee rabb kay naam par kufr bakay usay saza-ay-maut dee jaaay. pooree jamaaat usay sangasaar karay. jis nay rabb kay naam par kufr baka ho usay zaroor saza-ay-maut denee hai, khwaah desee ho ya pardesee.
17jis nay kisee ko maar daala hai usay saza-ay-maut dee jaaay. 18jis nay kisee kay jaanvar ko maar daala hai vah us ka muaavaza day. jaan kay badlay jaan dee jaaay. 19agar kisee nay kisee ko zakhmee kar diya hai to vahee kuchh us kay saath kiya jaaay jo us nay doosray kay saath kiya hai. 20agar doosray kee koee haddee toot jaaay to us kee vahee haddee todee jaaay. agar doosray kee aankh zaaay ho jaaay to us kee aankh zaaay kar dee jaaay. agar doosray ka daant toot jaaay to us ka vahee daant toda jaaay. jo bhee zakhm us nay doosray ko pahunchaaya vahee zakhm usay pahunchaaya jaaay. 21jis nay kisee jaanvar ko maar daala hai vah us ka muaavaza day, lekin jis nay kisee insaan ko maar diya hai usay saza-ay-maut denee hai. 22desee aur pardesee kay liyay tumhaara ek hee qaanoon ho. main rabb tumhaara khuda hoon.”
23phir moosa nay israaeeliyon say baat kee, aur unhon nay rabb par laanat bhejnay vaalay ko khaimaagaah say baahar lay ja kar usay sangasaar kiya. unhon nay vaisa hee kiya jaisa rabb nay moosa ko hukm diya tha.