Ahabaar 23
1rabb nay moosa say kaha, 2“israaeeliyon ko bataana ki yah meree, rabb kee eeden hain jin par tumhen logon ko muqaddas ijtima kay liyay jama karna hai.
sabat ka din
3haftay men chhah din kaam karna, lekin saatvaan din har tarah say aaraam ka din hai. us din muqaddas ijtima ho. jahaan bhee tum rahetay ho vahaan kaam na karna. yah din rabb kay liyay makhsoos sabat hai.
fasah kee eed aur bekhameeree rotee kee eed
4yah rabb kee eeden hain jin par tumhen logon ko muqaddas ijtima kay liyay jama karna hai.
5fasah kee eed pahelay maheenay kay chaudhven din shuroo hotee hai. us din sooraj kay ghuroob honay par rabb kee khushee manaaee jaaay. 6aglay din rabb kee yaad men bekhameeree rotee kee eed shuroo hotee hai. saat din tak tumhaaree rotee men khameer na ho. 7in saat dinon kay pahelay din muqaddas ijtima ho aur log apna har kaam chhoden. 8in saat dinon men rozaana rabb ko jalnay vaalee qurbaanee pesh karo. saatven din bhee muqaddas ijtima ho aur log apna har kaam chhoden.”
pahelay poolay kee eed
9rabb nay moosa say kaha, 10“israaeeliyon ko bataana ki jab tum us mulk men daakhil hogay jo main tumhen doonga aur vahaan anaaj kee fasal kaatogay to tumhen imaam ko pahela poola dena hai. 11itwaar ko imaam yah poola rabb kay saamnay hilaaay taaki tum manzoor ho jaao. 12us din bhed ka ek yaksaala beaib bachcha bhee rabb ko pesh karna. usay qurbaangaah par bhasm honay vaalee qurbaanee kay taur par chadhaana. 13saath hee ghalla kee nazar kay liyay tel say milaaya gaya 3 kilograam behtareen maida bhee pesh karna. jalnay vaalee yah qurbaanee rabb ko pasand hai. is kay ilaava mai kee nazar kay liyay ek litar mai bhee pesh karna. 14pahelay yah sab kuchh karo, phir hee tumhen naee fasal kay anaaj say khaanay kee ijaazat hogee, khwaah vah bhuna hua ho, khwaah kachcha ya rotee kee soorat men pakaaya gaya ho. jahaan bhee tum rahetay ho vahaan aisa hee karna hai. yah usool abad tak qaaim rahay.
hafton kee eed yaanee pantikust
15jis din tum nay anaaj ka poola pesh kiya us din say pooray saat haftay gino. 16pachaasaven din yaanee saatven itwaar ko rabb ko naay anaaj kee qurbaanee chadhaana. 17har gharaanay kee taraf say rabb ko hilaanay vaalee qurbaanee kay taur par do rotiyaan pesh kee jaaen. har rotee kay liyay 3 kilograam behtareen maida istemaal kiya jaaay. un men khameer daal kar pakaana hai. yah fasal kee pahelee paidaavaar kee qurbaanee hain. 18in rotiyon kay saath ek javaan bail, do mendhay aur bhed kay saat beaib aur yaksaala bachchay pesh karo. unhen rabb kay huzoor bhasm honay vaalee qurbaanee kay taur par chadhaana. is kay ilaava ghalla kee nazar aur mai kee nazar bhee pesh karnee hai. jalnay vaalee is qurbaanee kee khushboo rabb ko pasand hai. 19phir gunaah kee qurbaanee kay liyay ek bakra aur salaamatee kee qurbaanee kay liyay do yaksaala bhed kay bachchay chadhaao. 20imaam bhed kay yah do bachchay mazkoora rotiyon samet hilaanay vaalee qurbaanee kay taur par rabb kay saamnay hilaaay. yah rabb kay liyay makhsoos-o-muqaddas hain aur qurbaaniyon men say imaam ka hissa hain. 21usee din logon ko muqaddas ijtima kay liyay jama karo. koee bhee kaam na karna. yah usool abad tak qaaim rahay, aur isay har jagah maanna hai.
22kataaee kay vaqt apnee fasal pooray taur par na kaatna balki khet kay kinaaron par kuchh chhod dena. is tarah jo kuchh kataaee kartay vaqt khet men bach jaaay usay chhodna. bacha hua anaaj ghareebon aur pardesiyon kay liyay chhod dena. main rabb tumhaara khuda hoon.”
naay saal kee eed
23rabb nay moosa say kaha, 24“israaeeliyon ko bataana ki saatven maheenay ka pahela din aaraam ka din hai. us din muqaddas ijtima ho jis par yaad dilaanay kay liyay narsinga phoonka jaaay. 25koee bhee kaam na karna. rabb ko jalnay vaalee qurbaanee pesh karna.”
kaffaara ka din
26rabb nay moosa say kaha, 27“saatven maheenay ka dasvaan din kaffaara ka din hai. us din muqaddas ijtima ho. apnee jaan ko dukh dena aur rabb ko jalnay vaalee qurbaanee pesh karna. 28us din kaam na karna, kyoonki yah kaffaara ka din hai, jab rabb tumhaaray khuda kay saamnay tumhaara kaffaara diya jaata hai. 29jo us din apnee jaan ko dukh naheen deta usay us kee qaum men say mitaaya jaaay. 30jo us din kaam karta hai usay main us kee qaum men say nikaal kar halaak karoonga. 31koee bhee kaam na karna. yah usool abad tak qaaim rahay, aur isay har jagah maanna hai. 32yah din aaraam ka khaas din hai jis men tumhen apnee jaan ko dukh dena hai. isay maheenay kay navven din kee shaam say lay kar aglee shaam tak manaana.”
jhompadiyon kee eed
33rabb nay moosa say kaha, 34“israaeeliyon ko bataana ki saatven maheenay kay pandraheven din jhompadiyon kee eed shuroo hotee hai. is ka dauraaniya saat din hai. 35pahelay din muqaddas ijtima ho. is din koee kaam na karna. 36in saat dinon kay dauraan rabb ko jalnay vaalee qurbaaniyaan pesh karna. aathven din muqaddas ijtima ho. rabb ko jalnay vaalee qurbaanee pesh karo. is khaas ijtima kay din bhee kaam naheen karna hai.
37yah rabb kee eeden hain jin par tumhen muqaddas ijtima karna hai taaki rabb ko rozmarra kee matlooba jalnay vaalee qurbaaniyaan aur mai kee nazren pesh kee jaaen yaanee bhasm honay vaalee qurbaaniyaan, ghalla kee nazren, zabah kee qurbaaniyaan aur mai kee nazren. 38yah qurbaaniyaan un qurbaaniyon kay ilaava hain jo sabat kay din chadhaaee jaatee hain aur jo tum nay hadiay kay taur par ya mannat maan kar ya apnee dilee khushee say pesh kee hain.
39chunaanchay saatven maheenay kay pandraheven din fasal kee kataaee kay ikhtitaam par rabb kee yah eed yaanee jhompadiyon kee eed manaao. isay saat din manaana. pahela aur aakhiree din aaraam kay din hain. 40pahelay din apnay liyay darakhton kay behtareen phal, khajoor kee daaliyaan aur ghanay darakhton aur safeda kee shaakhen todna. saat din tak rabb apnay khuda kay saamnay khushee manaao. 41har saal saatven maheenay men rabb kee khushee men yah eed manaana. yah usool abad tak qaaim rahay. 42eed kay haftay kay dauraan jhompadiyon men rahena. tamaam mulk men aabaad israaeelee aisa karen. 43phir tumhaaree aulaad jaanegee ki israaeeliyon ko misr say nikaaltay vaqt main nay unhen jhompadiyon men basaaya. main rabb tumhaara khuda hoon.”
44moosa nay israaeeliyon ko rabb kee eedon kay baaray men yah baaten bataaeen.