Ahabaar 22

qurbaanee ka gosht khaanay kee hidaayaat

¹rabb nay moosa say kaha, ²“haaroon aur us kay beton ko bataana ki israaeeliyon kee un qurbaaniyon ka ehatiraam karo jo tum nay meray liyay makhsoos-o-muqaddas kee hain, varna tum meray naam ko daagh lagaaogay. main rabb hoon. ³jo imaam naapaak honay kay baavujood un qurbaaniyon kay paas a jaaay jo israaeeliyon nay meray liyay makhsoos-o-muqaddas kee hain usay meray saamnay say mitaana hai. yah usool aanay vaalee naslon kay liyay bhee atal hai. main rabb hoon.

⁴haaroon kee aulaad men say jo koee bhee vabaaee jildee beemaaree ya jaryaan ka mareez ho usay muqaddas qurbaaniyon men say apna hissa khaanay kee ijaazat naheen hai. pahelay vah paak ho jaaay. jo aisee koee bhee cheez chhuay jo laash say naapaak ho gaee ho ya aisay aadmee ko chhuay jis ka nutfa nikla ho vah naapaak ho jaata hai. ⁵vah naapaak rengnay vaalay jaanvar ya naapaak shakhs ko chhoonay say bhee naapaak ho jaata hai, khwaah vah kisee bhee sabab say naapaak kyoon na hua ho. ⁶jo aisee koee bhee cheez chhuay vah shaam tak naapaak rahega. is kay ilaava laazim hai ki vah muqaddas qurbaaniyon men say apna hissa khaanay say pahelay naha lay. ⁷sooraj kay ghuroob honay par vah paak hoga aur muqaddas qurbaaniyon men say apna hissa kha sakega. kyoonki vah us kee rozee hain. ⁸imaam aisay jaanvaron ka gosht na khaaay jo fitree taur par mar gaay ya jinhen janglee jaanvaron nay phaad daala ho, varna vah naapaak ho jaaega. main rabb hoon.

⁹imaam meree hidaayaat kay mutaabiq chalen, varna vah qusoorvaar ban jaaengay aur muqaddas cheezon kee behuramtee karnay kay sabab say mar jaaengay. main rabb hoon jo unhen apnay liyay makhsoos-o-muqaddas karta hoon.

¹⁰sirf imaam kay khaandaan kay afraad muqaddas qurbaaniyon men say kha saktay hain. ghairshaheree ya mazdoor ko ijaazat naheen hai. ¹¹lekin imaam ka ghulaam ya laundee us men say kha saktay hain, chaahay unhen khareeda gaya ho ya vah us kay ghar men paida huay hon. ¹²agar imaam kee betee nay kisee aisay shakhs say shaadee kee hai jo imaam naheen hai to usay muqaddas qurbaaniyon men say khaanay kee ijaazat naheen hai. ¹³lekin ho sakta hai ki vah beva ya talaaqayaafta ho aur us kay bachchay na hon. jab vah apnay baap kay ghar laut kar vahaan aisay rahegee jaisay apnee javaanee men to vah apnay baap kay us khaanay men say kha saktee hai jo qurbaaniyon men say baap ka hissa hai. lekin jo imaam kay khaandaan ka fard naheen hai usay khaanay kee ijaazat naheen hai.

¹⁴jis shakhs nay naadaanista taur par muqaddas qurbaaniyon men say imaam kay hissay say kuchh khaaya hai vah imaam ko sab kuchh vaapas karnay kay ilaava 20 feesad ziyaada day. ¹⁵imaam rabb ko pesh kee huee qurbaaniyon kee muqaddas haalat yoon khatm na karen ¹⁶ki vah doosray israaeeliyon ko yah muqaddas cheezen khaanay den. aisee harkat say vah un ko bada qusoorvaar bana dengay. main rabb hoon jo unhen apnay liyay makhsoos-o-muqaddas karta hoon.”

jaanvaron kee qurbaaniyon kay baaray men hidaayaat

¹⁷rabb nay moosa say kaha, ¹⁸“haaroon, us kay beton aur israaeeliyon ko bataana ki agar tum men say koee israaeelee ya pardesee rabb ko bhasm honay vaalee qurbaanee pesh karna chaahay to tareeq-ay-kaar men koee farq naheen hai, chaahay vah yah mannat maan kar ya vaisay hee dilee khushee say kar raha ho. ¹⁹is kay liyay laazim hai ki tum ek beaib bail, mendha ya bakra pesh karo. phir hee usay qabool kiya jaaega. ²⁰qurbaanee kay liyay kabhee bhee aisa jaanvar pesh na karna jis men nuqs ho, varna tum us kay baais manzoor naheen hogay. ²¹agar koee rabb ko salaamatee kee qurbaanee pesh karna chaahay to tareeq-ay-kaar men koee farq naheen hai, chaahay vah yah mannat maan kar ya vaisay hee dilee khushee say kar raha ho. is kay liyay laazim hai ki vah gaay-bailon ya bhed-bakriyon men say beaib jaanvar chunay. phir usay qabool kiya jaaega. ²²rabb ko aisay jaanvar pesh na karna jo andhay hon, jin kay aaza tootay ya katay huay hon, jin ko rasaulee ho ya jinhen vabaaee jildee beemaaree lag gaee ho. rabb ko unhen jalnay vaalee qurbaanee kay taur par qurbaangaah par pesh na karna. ²³lekin jis gaay-bail ya bhed-bakree kay kisee uzv men kamee beshee ho usay pesh kiya ja sakta hai. shart yah hai ki pesh karnay vaala usay vaisay hee dilee khushee say chadhaaay. agar vah usay apnee mannat maan kar pesh karay to vah qabool naheen kiya jaaega. ²⁴rabb ko aisa jaanvar pesh na karna jis kay khusyay kuchlay, today ya katay huay hon. apnay mulk men jaanvaron ko is tarah khasee na banaana, ²⁵na aisay jaanvar kisee ghairmulkee say khareed kar apnay khuda kee rotee kay taur par pesh karna. tum aisay jaanvaron kay baais manzoor naheen hogay, kyoonki un men kharaabee aur nuqs hai.”

²⁶rabb nay moosa say yah bhee kaha, ²⁷“jab kisee gaay, bhed ya bakree ka bachcha paida hota hai to laazim hai ki vah pahelay saat din apnee maan kay paas rahay. aathven din say pahelay rabb usay jalnay vaalee qurbaanee kay taur par qabool naheen karega. ²⁸kisee gaay, bhed ya bakree kay bachchay ko us kee maan samet ek hee din zabah na karna. ²⁹jab tum rabb ko salaamatee kee koee qurbaanee chadhaana chaahatay ho to usay yoon pesh karna ki tum manzoor ho jaao. ³⁰aglee subah tak kuchh bacha na rahay balki usay usee din khaana hai. main rabb hoon.

³¹meray ahkaam maano aur un par amal karo. main rabb hoon. ³²meray naam ko daagh na lagaana. laazim hai ki mujhay israaeeliyon kay darmiyaan quddoos maana jaaay. main rabb hoon jo tumhen apnay liyay makhsoos-o-muqaddas karta hoon. ³³main tumhen misr say nikaal laaya hoon taaki tumhaara khuda hoon. main rabb hoon.”