Ahabaar 21

imaamon kay liyay hidaayaat

¹rabb nay moosa say kaha, “haaroon kay beton ko jo imaam hain bata dena ki imaam apnay aap ko kisee israaeelee kee laash kay qareeb jaanay say naapaak na kare ²siva-ay-apnay qareebee rishtedaaron kay yaanee maan, baap, beta, betee, bhaaee ³aur jo ghairshaadeeshuda bahen us kay ghar men rahetee hai. ⁴vah apnee qaum men kisee aur kay baais apnay aap ko naapaak na karay, varna us kee muqaddas haalat jaatee rahegee.

⁵imaam apnay sar ko na mundavaaen. vah na apnee daadhee ko taraashen aur na kaatnay say apnay aap ko zakhmee karen.

⁶vah apnay khuda kay liyay makhsoos-o-muqaddas rahen aur apnay khuda kay naam ko daagh na lagaaen. choonki vah rabb ko jalnay vaalee qurbaaniyaan yaanee apnay khuda kee rotee pesh kartay hain is liyay laazim hai ki vah muqaddas rahen. ⁷imaam zinaakaar aurat, mandir kee kasbee ya talaaqayaafta aurat say shaadee na karen, kyoonki vah apnay rabb kay liyay makhsoos-o-muqaddas hain. ⁸imaam ko muqaddas samajhna, kyoonki vah teray khuda kee rotee ko qurbaangaah par chadhaata hai. vah teray liyay muqaddas thaheray kyoonki main rabb quddoos hoon. main hee tumhen muqaddas karta hoon.

⁹kisee imaam kee jo betee zinaakaaree say apnee muqaddas haalat ko khatm kar detee hai vah apnay baap kee muqaddas haalat ko bhee khatm kar detee hai. usay jala diya jaaay.

¹⁰imaam-ay-aazam kay sar par masah ka tel undela gaya hai aur usay imaam-ay-aazam kay muqaddas kapday pahennay ka ikhtiyaar diya gaya hai. is liyay vah ranj kay aalam men apnay baalon ko bikharnay na day, na kabhee apnay kapdon ko phaaday. ¹¹vah kisee laash kay qareeb na jaaay, chaahay vah us kay baap ya maan kee laash kyoon na ho, varna vah naapaak ho jaaega. ¹²jab tak koee laash us kay ghar men padee rahay vah maqdis ko chhod kar apnay ghar na jaaay, varna vah maqdis ko naapaak karega. kyoonki usay us kay khuda kay tel say makhsoos kiya gaya hai. main rabb hoon. ¹³imaam-ay-aazam ko sirf kunvaaree say shaadee kee ijaazat hai. ¹⁴vah beva, talaaqayaafta aurat, mandir kee kasbee ya zinaakaar aurat say shaadee na karay balki sirf apnay qabeelay kee kunvaaree say, ¹⁵varna us kee aulaad makhsoos-o-muqaddas naheen hogee. kyoonki main rabb hoon jo usay apnay liyay makhsoos-o-muqaddas karta hoon.”

¹⁶rabb nay moosa say yah bhee kaha, ¹⁷“haaroon ko bataana ki teree aulaad men say koee bhee jis kay jism men nuqs ho meray huzoor a kar apnay khuda kee rotee na chadhaaay. yah usool aanay vaalee naslon kay liyay bhee atal hai. ¹⁸kyoonki koee bhee maazoor meray huzoor na aaay, na andha, na langda, na vah jis kee naak chiree huee ho ya jis kay kisee uzv men kamee beshee ho, ¹⁹na vah jis ka paaon ya haath toota hua ho, ²⁰na kubda, na bauna, na vah jis kee aankh men nuqs ho ya jisay vabaaee jildee beemaaree ho ya jis kay khusyay kuchlay huay hon. ²¹haaroon imaam kee koee bhee aulaad jis kay jism men nuqs ho meray huzoor a kar rabb ko jalnay vaalee qurbaaniyaan pesh na karay. choonki us men nuqs hai is liyay vah meray huzoor a kar apnay khuda kee rotee na chadhaaay. ²²usay allaah kee muqaddas balki muqaddastareen qurbaaniyon men say bhee imaamon ka hissa khaanay kee ijaazat hai. ²³lekin choonki us men nuqs hai is liyay vah muqaddastareen kamray kay darvaazay kay parday kay qareeb na jaaay, na qurbaangaah kay paas aaay. varna vah meree muqaddas cheezon ko naapaak karega. kyoonki main rabb hoon jo unhen apnay liyay makhsoos-o-muqaddas karta hoon.”

²⁴moosa nay yah hidaayaat haaroon, us kay beton aur tamaam israaeeliyon ko deen.