Ahabaar 20
jaraaim kee sazaaen
1rabb nay moosa say kaha, 2“israaeeliyon ko bataana ki tum men say jo bhee apnay bachchay ko malik devta ko qurbaanee kay taur par pesh karay usay saza-ay-maut denee hai. is men koee farq naheen ki vah israaeelee hai ya pardesee. jamaaat kay log usay sangasaar karen. 3main khud aisay shakhs kay khilaaf ho jaaoonga aur usay us kee qaum men say mita daaloonga. kyoonki apnay bachchon ko malik ko pesh karnay say us nay meray maqdis ko naapaak kiya aur meray naam ko daagh lagaaya hai. 4agar jamaaat kay log apnee aankhen band karkay aisay shakhs kee harkaten nazar’andaaz karen aur usay saza-ay-maut na den 5to phir main khud aisay shakhs aur us kay gharaanay kay khilaaf khada ho jaaoonga. main usay aur un tamaam logon ko qaum men say mita daaloonga jinhon nay us kay peechhay lag kar malik devta ko sijda karnay say zina kiya hai.
6jo shakhs murdon say raabita karnay aur ghaibdaanee karnay vaalon kee taraf rujoo karta hai main us kay khilaaf ho jaaoonga. un kee pairvee karnay say vah zina karta hai. main usay us kee qaum men say mita daaloonga. 7apnay aap ko meray liyay makhsoos-o-muqaddas rakho, kyoonki main rabb tumhaara khuda hoon. 8meree hidaayaat maano aur un par amal karo. main rabb hoon jo tumhen makhsoos-o-muqaddas karta hoon.
9jis nay bhee apnay baap ya maan par laanat bhejee hai usay saza-ay-maut dee jaaay. is harkat say vah apnee maut ka khud zimmaadaar hai.
10agar kisee mard nay kisee kee beevee kay saath zina kiya hai to donon ko saza-ay-maut denee hai.
11jo mard apnay baap kee beevee say hambistar hua hai us nay apnay baap kee behuramtee kee hai. donon ko saza-ay-maut denee hai. vah apnee maut kay khud zimmaadaar hain.
12agar koee mard apnee bahoo say hambistar hua hai to donon ko saza-ay-maut denee hai. jo kuchh unhon nay kiya hai vah nihaayat sharmanaak hai. vah apnee maut kay khud zimmaadaar hain.
13agar koee mard kisee doosray mard say jinsee taalluqaat rakhay to donon ko is ghinaunee harkat kay baais saza-ay-maut denee hai. vah apnee maut kay khud zimmaadaar hain.
14agar koee aadmee apnee beevee kay ilaava us kee maan say bhee shaadee karay to yah ek nihaayat sharmanaak baat hai. donon ko jala dena hai taaki tumhaaray darmiyaan koee aisee khabees baat na rahay.
15jo mard kisee jaanvar say jinsee taalluqaat rakhay usay saza-ay-maut dena hai. us jaanvar ko bhee maar diya jaaay. 16jo aurat kisee jaanvar say jinsee taalluqaat rakhay usay saza-ay-maut denee hai. us jaanvar ko bhee maar diya jaaay. vah apnee maut kay khud zimmaadaar hain.
17jis mard nay apnee bahen say shaadee kee hai us nay sharmanaak harkat kee hai, chaahay vah baap kee betee ho ya maan kee. unhen israaeelee qaum kee nazron say mitaaya jaaay. aisay shakhs nay apnee bahen kee behuramtee kee hai. is liyay usay khud apnay qusoor kay nateejay bardaasht karnay padengay.
18agar koee mard maahavaaree kay ayyaam men kisee aurat say hambistar hua hai to donon ko un kee qaum men say mitaana hai. kyoonki donon nay aurat kay khoon kay mamba say parda uthaaya hai.
19apnee khaala ya phoophee say hambistar na hona. kyoonki jo aisa karta hai vah apnee qareebee rishtedaar kee behuramtee karta hai. donon ko apnay qusoor kay nateejay bardaasht karnay padengay.
20jo apnee chachee ya taaee say hambistar hua hai us nay apnay chacha ya taaya kee behuramtee kee hai. donon ko apnay qusoor kay nateejay bardaasht karnay padengay. vah beaulaad marengay.
21jis nay apnee bhaabee say shaadee kee hai us nay ek najis harkat kee hai. us nay apnay bhaaee kee behuramtee kee hai. vah beaulaad rahengay.
22meree tamaam hidaayaat aur ahkaam ko maano aur un par amal karo. varna jis mulk men main tumhen lay ja raha hoon vah tumhen ugal dega. 23un qaumon kay rasm-o-rivaaj kay mutaabiq zindagee na guzaarna jinhen main tumhaaray aagay say nikaal doonga. mujhay is sabab say un say ghin aanay lagee ki vah yah sab kuchh kartay thay. 24lekin tum say main nay kaha, ‘tum hee un kee zameen par qabza karogay. main hee usay tumhen day doonga, aisa mulk jis men kasrat ka doodh aur shahed hai.’ main rabb tumhaara khuda hoon, jis nay tum ko deegar qaumon men say chun kar alag kar diya hai. 25is liyay laazim hai ki tum zameen par chalnay vaalay jaanvaron aur parindon men paak aur naapaak ka imtiyaaz karo. apnay aap ko naapaak jaanvar khaanay say qaabil-ay-ghin na banaana, chaahay vah zameen par chaltay ya rengtay hain, chaahay hava men udtay hain. main hee nay unhen tumhaaray liyay naapaak qaraar diya hai. 26tumhen meray liyay makhsoos-o-muqaddas hona hai, kyoonki main quddoos hoon, aur main nay tumhen deegar qaumon men say chun kar apnay liyay alag kar liya hai.
27tum men say jo murdon say raabita ya ghaibdaanee karta hai usay saza-ay-maut denee hai, khwaah aurat ho ya mard. unhen sangasaar karna. vah apnee maut kay khud zimmaadaar hain.”