Ahabaar 19
muqaddas qaum kay liyay hidaayaat
1rabb nay moosa say kaha, 2“israaeeliyon kee pooree jamaaat ko bataana ki muqaddas raho, kyoonki main rabb tumhaara khuda quddoos hoon.
3tum men say har ek apnay maan-baap kee izzat karay. haftay kay din kaam na karna. main rabb tumhaara khuda hoon. 4na buton kee taraf rujoo karna, na apnay liyay devta dhaalna. main hee rabb tumhaara khuda hoon.
5jab tum rabb ko salaamatee kee qurbaanee pesh kartay ho to usay yoon chadhaao ki tum manzoor ho jaao. 6us ka gosht usee din ya aglay din khaaya jaaay. jo bhee teesray din tak bach jaata hai usay jalaana hai. 7agar koee usay teesray din khaaay to usay ilm hona chaahiay ki yah qurbaanee naapaak hai aur rabb ko pasand naheen hai. 8aisay shakhs ko apnay qusoor kee saza uthaanee padegee, kyoonki us nay us cheez kee muqaddas haalat khatm kee hai jo rabb kay liyay makhsoos kee gaee thee. usay us kee qaum men say mitaaya jaaay.
9kataaee kay vaqt apnee fasal pooray taur par na kaatna balki khet kay kinaaron par kuchh chhod dena. is tarah jo kuchh kataaee kartay vaqt khet men bach jaaay usay chhodna. 10angoor kay baaghon men bhee jo kuchh angoor todtay vaqt bach jaaay usay chhod dena. jo angoor zameen par gir jaaen unhen utha kar na lay jaana. unhen ghareebon aur pardesiyon kay liyay chhod dena. main rabb tumhaara khuda hoon.
11choree na karna, jhoot na bolna, ek doosray ko dhoka na dena.
12meray naam kee qasam kha kar dhoka na dena, varna tum meray naam ko daagh lagaaogay. main rabb hoon.
13ek doosray ko na dabaana aur na lootna. kisee kee mazdooree usee din kee shaam tak day dena aur usay aglee subah tak rokay na rakhna.
14baheray ko na kosna, na andhay kay raastay men koee cheez rakhna jis say vah thokar khaaay. is men bhee apnay khuda ka khauf maanna. main rabb hoon.
15adaalat men kisee kee haqatalfee na karna. faisla kartay vaqt kisee kee bhee jaanibdaaree na karna, chaahay vah ghareeb ya asar-o-rasookh vaala ho. insaaf say apnay padosee kee adaalat kar.
16apnee qaum men idhar udhar phirtay huay kisee par buhtaan na lagaana. koee bhee aisa kaam na karna jis say kisee kee jaan khatray men pad jaaay. main rabb hoon.
17dil men apnay bhaaee say nafrat na karna. agar kisee kee sarzanish karnee hai to roo-ba-roo karna, varna too us kay sabab say qusoorvaar thaherega.
18intiqaam na lena. apnee qaum kay kisee shakhs par der tak tera ghussa na rahay balki apnay padosee say vaisee muhabbat rakhna jaisee too apnay aap say rakhta hai. main rabb hoon.
19meree hidaayaat par amal karo. do mukhtalif qism kay jaanvaron ko milaap na karnay dena. apnay khet men do qism kay beej na bona. aisa kapda na pahenna jo do mukhtalif qism kay dhaagon ka buna hua ho.
20agar koee aadmee kisee laundee say jis kee mangnee kisee aur say ho chukee ho hambistar ho jaaay aur laundee ko ab tak na paison say na vaisay hee aazaad kiya gaya ho to munaasib saza dee jaaay. lekin unhen saza-ay-maut na dee jaaay, kyoonki usay ab tak aazaad naheen kiya gaya. 21qusoorvaar aadmee mulaaqaat kay khaimay kay darvaazay par ek mendha lay aaay taaki vah rabb ko qusoor kee qurbaanee kay taur par pesh kiya jaaay. 22imaam is qurbaanee say rabb kay saamnay us kay gunaah ka kaffaara day. yoon us ka gunaah muaaf kiya jaaega. 23jab mulk-ay-kan’aan men daakhil honay kay baad tum phaldaar darakht lagaaogay to pahelay teen saal un ka phal na khaana balki usay mamnoo [a] lafzee tarjuma : naamakhtoon. samajhna. 24chauthay saal un ka tamaam phal khushee kay muqaddas nazraanay kay taur par rabb kay liyay makhsoos kiya jaaay. 25paanchven saal tum un ka phal kha saktay ho. yoon tumhaaree fasal badhaaee jaaegee. main rabb tumhaara khuda hoon.
26aisa gosht na khaana jis men khoon ho. faal ya shugoon na nikaalna.
27apnay sar kay baal gol shakl men na katvaana, na apnee daadhee ko taraashna. 28apnay aap ko murdon kay sabab say kaat kar zakhmee na karna, na apnee jild par nuqoosh gudvaana. main rabb hoon.
29apnee betee ko kasbee na banaana, varna us kee muqaddas haalat jaatee rahegee aur mulk zinaakaaree kay baais haraamkaaree say bhar jaaega.
30haftay kay din aaraam karna aur meray maqdis ka ehatiraam karna. main rabb hoon.
31aisay logon kay paas na jaana jo murdon say raabita kartay hain, na ghaibdaanon kee taraf rujoo karna, varna tum un say naapaak ho jaaogay. main rabb tumhaara khuda hoon.
32boodhay logon kay saamnay uth kar khada ho jaana, buzurgon kee izzat karna aur apnay khuda ka ehatiraam karna. main rabb hoon.
33jo pardesee tumhaaray mulk men tumhaaray darmiyaan raheta hai usay na dabaana. 34us kay saath aisa sulook kar jaisa apnay hamvatanon kay saath karta hai. jis tarah too apnay aap say muhabbat rakhta hai usee tarah us say bhee muhabbat rakhna. yaad rahay ki tum khud misr men pardesee thay. main rabb tumhaara khuda hoon.
35naainsaafee na karna. na adaalat men, na lambaaee naaptay vaqt, na toltay vaqt aur na kisee cheez kee miqdaar naaptay vaqt. 36saheeh taraazoo, saheeh baat aur saheeh paimaana istemaal karna. main rabb tumhaara khuda hoon jo tumhen misr say nikaal laaya hoon.
37meree tamaam hidaayaat aur tamaam ahkaam maano aur un par amal karo. main rabb hoon.”