Ahabaar 18
naajaaiz jinsee taalluqaat
1rabb nay moosa say kaha, 2“israaeeliyon ko bataana ki main rabb tumhaara khuda hoon. 3misriyon kee tarah zindagee na guzaarna jin men tum rahetay thay. mulk-ay-kan’aan kay logon kee tarah bhee zindagee na guzaarna jin kay paas main tumhen lay ja raha hoon. un kay rasm-o-rivaaj na apnaana. 4meray hee ahkaam par amal karo aur meree hidaayaat kay mutaabiq chalo. main rabb tumhaara khuda hoon. 5meree hidaayaat aur ahkaam kay mutaabiq chalna, kyoonki jo yoon karega vah jeeta rahega. main rabb hoon.
6tum men say koee bhee apnee qareebee rishtedaar say hambistar na ho. main rabb hoon.
7apnee maan say hambistar na hona, varna teray baap kee behuramtee ho jaaegee. vah teree maan hai, is liyay us say hambistar na hona.
8apnay baap kee kisee bhee beevee say hambistar na hona, varna teray baap kee behuramtee ho jaaegee.
9apnee bahen say hambistar na hona, chaahay vah teray baap ya teree maan kee betee ho, chaahay vah teray hee ghar men ya kaheen aur paida huee ho.
10apnee potee ya navaasee say hambistar na hona, varna teree apnee behuramtee ho jaaegee.
11apnay baap kee beevee kee betee say hambistar na hona. vah teree bahen hai.
12apnee phoophee say hambistar na hona. vah teray baap kee qareebee rishtedaar hai.
13apnee khaala say hambistar na hona. vah teree maan kee qareebee rishtedaar hai.
14apnay baap kay bhaaee kee beevee say hambistar na hona, varna teray baap kay bhaaee kee behuramtee ho jaaegee. us kee beevee teree chachee hai.
15apnee bahoo say hambistar na hona. vah teray betay kee beevee hai.
16apnee bhaabee say hambistar na hona, varna teray bhaaee kee behuramtee ho jaaegee.
17agar tera jinsee taalluq kisee aurat say ho to us kee betee, potee ya navaasee say hambistar hona mana hai, kyoonki vah us kee qareebee rishtedaar hain. aisa karna badee sharmanaak harkat hai.
18apnee beevee kay jeetay jee us kee bahen say shaadee na karna.
19kisee aurat say us kee maahavaaree kay dinon men hambistar na hona. is dauraan vah naapaak hai.
20kisee doosray mard kee beevee say hambistar na hona, varna too apnay aap ko naapaak karega.
21apnay kisee bhee bachchay ko malik devta ko qurbaanee kay taur par pesh karkay jala dena mana hai. aisee harkat say too apnay khuda kay naam ko daagh lagaaega. main rabb hoon.
22mard doosray mard kay saath jinsee taalluqaat na rakhay. aisee harkat qaabil-ay-ghin hai.
23kisee jaanvar say jinsee taalluqaat na rakhna, varna too naapaak ho jaaega. aurton kay liyay bhee aisa karna mana hai. yah badee sharmanaak harkat hai.
24aisee harkaton say apnay aap ko naapaak na karna. kyoonki jo qaumen main tumhaaray aagay mulk say nikaaloonga vah isee tarah naapaak hotee raheen. 25mulk khud bhee naapaak hua. is liyay main nay usay us kay qusoor kay sabab say saza dee, aur nateejay men us nay apnay baashindon ko ugal diya. 26lekin tum meree hidaayaat aur ahkaam kay mutaabiq chalo. na desee aur na pardesee aisee koee ghinaunee harkat karen. 27kyoonki yah tamaam qaabil-ay-ghin baaten un say hueen jo tum say pahelay is mulk men rahetay thay. yoon mulk naapaak hua. 28lihaaza agar tum bhee mulk ko naapaak karogay to vah tumhen isee tarah ugal dega jis tarah us nay tum say pahelay maujood qaumon ko ugal diya. 29jo bhee mazkoora ghinaunee harkaton men say ek karay usay us kee qaum men say mitaaya jaaay. 30meray ahkaam kay mutaabiq chaltay raho aur aisay qaabil-ay-ghin rasm-o-rivaaj na apnaana jo tumhaaray aanay say pahelay raaij thay. in say apnay aap ko naapaak na karna. main rabb tumhaara khuda hoon.”