Ahabaar 17

qurbaanee chadhaanay ka maqaam

¹rabb nay moosa say kaha, ²“haaroon, us kay beton aur tamaam israaeeliyon ko hidaayat denaa ^3-4 ki jo bhee israaeelee apnee gaay ya bhed-bakree mulaaqaat kay khaimay kay darvaazay par rabb ko qurbaanee kay taur par pesh na karay balki khaimaagaah kay andar ya baahar kisee aur jagah par zabah karay vah khoon bahaanay ka qusoorvaar thaherega. us nay khoon bahaaya hai, aur laazim hai ki usay us kee qaum men say mitaaya jaaay. ⁵is hidaayat ka maqsad yah hai ki israaeelee ab say apnee qurbaaniyaan khulay maidaan men zabah na karen balki rabb ko pesh karen. vah apnay jaanvaron ko mulaaqaat kay khaimay kay darvaazay par imaam kay paas la kar unhen rabb ko salaamatee kee qurbaanee kay taur par pesh karen. ⁶imaam un ka khoon mulaaqaat kay khaimay kay darvaazay par kee qurbaangaah par chhidkay aur un kee charbee us par jala day. aisee qurbaanee kee khushboo rabb ko pasand hai. ⁷ab say israaeelee apnee qurbaaniyaan un bakron kay devtaaon ko pesh na karen jin kee pairvee karkay unhon nay zina kiya hai. yah un kay liyay aur un kay baad aanay vaalee naslon kay liyay ek daaimee usool hai.

⁸laazim hai ki har israaeelee aur tumhaaray darmiyaan rahenay vaala pardesee apnee bhasm honay vaalee qurbaanee ya koee aur qurbaanee ⁹mulaaqaat kay khaimay kay darvaazay par la kar rabb ko pesh karay. varna usay us kee qaum men say mitaaya jaaega.

khoon khaana mana hai

¹⁰khoon khaana bilkul mana hai. jo bhee israaeelee ya tumhaaray darmiyaan rahenay vaala pardesee khoon khaaay main us kay khilaaf ho jaaoonga aur usay us kee qaum men say mita daaloonga. ¹¹kyoonki har makhlooq kay khoon men us kee jaan hai. main nay usay tumhen day diya hai taaki vah qurbaangaah par tumhaara kaffaara day. kyoonki khoon hee us jaan kay zareeay jo us men hai tumhaara kaffaara deta hai. ¹²is liyay main kaheta hoon ki na koee israaeelee na koee pardesee khoon khaaay.

¹³agar koee bhee israaeelee ya pardesee kisee jaanvar ya parinday ka shikaar karkay pakday jisay khaanay kee ijaazat hai to vah usay zabah karnay kay baad us ka poora khoon zameen par bahenay day aur khoon par mittee daalay. ¹⁴kyoonki har makhlooq ka khoon us kee jaan hai. is liyay main nay israaeeliyon ko kaha hai ki kisee bhee makhlooq ka khoon na khaao. har makhlooq ka khoon us kee jaan hai, aur jo bhee usay khaaay usay qaum men say mita dena hai.

¹⁵agar koee bhee israaeelee ya pardesee aisay jaanvar ka gosht khaaay jo fitree taur par mar gaya ya jisay janglee jaanvaron nay phaad daala ho to vah apnay kapday dho kar naha lay. vah shaam tak naapaak rahega. ¹⁶jo aisa naheen karta usay apnay qusoor kee saza bhugatnee padegee.”