Ahabaar 16
yaum-ay-kaffaaraa
1jab haaroon kay do betay rabb kay qareeb a kar halaak huay to is kay baad rabb moosa say hamkalaam hua. 2us nay kaha,
“apnay bhaaee haaroon ko bataana ki vah sirf muqarrara vaqt par parday kay peechhay muqaddastareen kamray men daakhil ho kar ahd kay sandooq kay dhaknay kay saamnay khada ho jaaay, varna vah mar jaaega. kyoonki main khud us dhaknay kay oopar baadal kee soorat men zaahir hota hoon. 3aur jab bhee vah daakhil ho to gunaah kee qurbaanee kay liyay ek javaan bail aur bhasm honay vaalee qurbaanee kay liyay ek mendha pesh karay. 4pahelay vah naha kar imaam kay kataan kay muqaddas kapday pahen lay yaanee zerjaama, us kay neechay paajaama, phir kamarband aur pagdee. 5israaeel kee jamaaat haaroon ko gunaah kee qurbaanee kay liyay do bakray aur bhasm honay vaalee qurbaanee kay liyay ek mendha day.
6pahelay haaroon apnay aur apnay gharaanay kay liyay javaan bail ko gunaah kee qurbaanee kay taur par chadhaaay. 7phir vah donon bakron ko mulaaqaat kay khaimay kay darvaazay par rabb kay saamnay lay aaay. 8vahaan vah qur’a daal kar ek ko rabb kay liyay chunay aur doosray ko azaazel kay liyay. 9jo bakra rabb kay liyay hai usay vah gunaah kee qurbaanee kay taur par pesh karay. 10doosra bakra jo quraay kay zareeay azaazel kay liyay chuna gaya usay zinda haalat men rabb kay saamnay khada kiya jaaay taaki vah jamaaat ka kaffaara day. vahaan say usay registaan men azaazel kay paas bheja jaaay.
11lekin pahelay haaroon javaan bail ko gunaah kee qurbaanee kay taur par chadha kar apna aur apnay gharaanay ka kaffaara day. usay zabah karnay kay baad 12vah bakhoor kee qurbaangaah say jaltay huay koilon say bhara hua bartan lay kar apnee donon mutthiyaan baareek khushboodaar bakhoor say bhar lay aur muqaddastareen kamray men daakhil ho jaaay. 13vahaan vah rabb kay huzoor bakhoor ko jaltay huay koilon par daal day. is say paida honay vaala dhuaan ahd kay sandooq ka dhakna chhupa dega taaki haaroon mar na jaaay. 14ab vah javaan bail kay khoon men say kuchh lay kar apnee unglee say dhaknay kay saamnay vaalay hissay par chhidkay, phir kuchh apnee unglee say saat baar us kay saamnay zameen par chhidkay. 15is kay baad vah us bakray ko zabah karay jo qaum kay liyay gunaah kee qurbaanee hai. vah us ka khoon muqaddastareen kamray men lay aaay aur usay bail kay khoon kee tarah ahd kay sandooq kay dhaknay par aur saat baar us kay saamnay zameen par chhidkay. 16yoon vah muqaddastareen kamray ka kaffaara dega jo israaeeliyon kee naapaakiyon aur tamaam gunaahon say mut’assir hota raheta hai. is say vah mulaaqaat kay pooray khaimay ka bhee kaffaara dega jo khaimaagaah kay darmiyaan honay kay baais israaeeliyon kee naapaakiyon say mut’assir hota raheta hai.
17jitna vaqt haaroon apna, apnay gharaanay ka aur israaeel kee pooree jamaaat ka kaffaara denay kay liyay muqaddastareen kamray men rahega is dauraan kisee doosray ko mulaaqaat kay khaimay men thahernay kee ijaazat naheen hai. 18phir vah muqaddastareen kamray say nikal kar khaimay men rabb kay saamnay padee qurbaangaah ka kaffaara day. vah bail aur bakray kay khoon men say kuchh lay kar usay qurbaangaah kay chaaron seengon par lagaaay. 19kuchh khoon vah apnee unglee say saat baar us par chhidak day. yoon vah usay israaeeliyon kee naapaakiyon say paak karkay makhsoos-o-muqaddas karega.
20muqaddastareen kamray, mulaaqaat kay khaimay aur qurbaangaah ka kaffaara denay kay baad haaroon zinda bakray ko saamnay laaay. 21vah apnay donon haath us kay sar par rakhay aur israaeeliyon kay tamaam qusoor yaanee un kay tamaam jaraaim aur gunaahon ka iqraar karkay unhen bakray kay sar par daal day. phir vah usay registaan men bhej day. is kay liyay vah bakray ko ek aadmee kay sapurd karay jisay yah zimmaadaaree dee gaee hai. 22bakra apnay aap par un ka tamaam qusoor utha kar kisee veeraan jagah men lay jaaega. vahaan saath vaala aadmee usay chhod aaay.
23is kay baad haaroon mulaaqaat kay khaimay men jaaay aur kataan kay vah kapday jo us nay muqaddastareen kamray men daakhil honay say peshtar pahen liyay thay utaar kar vaheen chhod day. 24vah muqaddas jagah par naha kar apnee khidmat kay aam kapday pahen lay. phir vah baahar a kar apnay aur apnee qaum kay liyay bhasm honay vaalee qurbaanee pesh karay taaki apna aur apnee qaum ka kaffaara day. 25is kay ilaava vah gunaah kee qurbaanee kee charbee qurbaangaah par jala day.
26jo aadmee azaazel kay liyay bakray ko registaan men chhod aaya hai vah apnay kapday dho kar naha lay. is kay baad vah khaimaagaah men a sakta hai.
27jis bail aur bakray ko gunaah kee qurbaanee kay liyay pesh kiya gaya aur jin ka khoon kaffaara denay kay liyay muqaddastareen kamray men laaya gaya, laazim hai ki un kee khaalen, gosht aur gobar khaimaagaah kay baahar jala diya jaaay. 28yah cheezen jalaanay vaala baad men apnay kapday dho kar naha lay. phir vah khaimaagaah men a sakta hai.
29laazim hai ki saatven maheenay kay dasven din israaeelee aur un kay darmiyaan rahenay vaalay pardesee apnee jaan ko dukh den aur kaam na karen. yah usool tumhaaray liyay abad tak qaaim rahay. 30is din tumhaara kaffaara diya jaaega taaki tumhen paak kiya jaaay. tab tum rabb kay saamnay apnay tamaam gunaahon say paak thaherogay. 31poora din aaraam karo aur apnee jaan ko dukh do. yah usool abad tak qaaim rahay.
32is din imaam-ay-aazam tumhaara kaffaara day, vah imaam jisay us kay baap kee jagah masah kiya gaya aur ikhtiyaar diya gaya hai. vah kataan kay muqaddas kapday pahen kar 33muqaddastareen kamray, mulaaqaat kay khaimay, qurbaangaah, imaamon aur jamaaat kay tamaam logon ka kaffaara day. 34laazim hai ki saal men ek dafa israaeeliyon kay tamaam gunaahon ka kaffaara diya jaaay. yah usool tumhaaray liyay abad tak qaaim rahay.”
sab kuchh vaisay hee kiya gaya jaisa rabb nay moosa ko hukm diya tha.