Ahabaar 15
mardon kee naapaakee
1rabb nay moosa aur haaroon say kaha, 2“israaeeliyon ko bataana ki agar kisee mard ko jaryaan ka marz ho to vah khaarij honay vaalay maaay kay sabab say naapaak hai, 3chaahay maaay baheta raheta ho ya ruk gaya ho. 4jis cheez par bhee mareez letta ya baithta hai vah naapaak hai. 5-6 jo koee bhee us kay letnay kee jagah ko chhuay ya us kay baithnay kee jagah par baith jaaay vah apnay kapday dho kar naha lay. vah shaam tak naapaak rahega. 7isee tarah jo koee bhee aisay mareez ko chhuay vah apnay kapday dho kar naha lay. vah shaam tak naapaak rahega. 8agar mareez kisee paak shakhs par thookay to yahee kuchh karna hai aur vah shakhs shaam tak naapaak rahega. 9jab aisa mareez kisee jaanvar par savaar hota hai to har cheez jis par vah baith jaata hai naapaak hai. 10jo koee bhee aisee cheez chhuay ya usay utha kar lay jaaay vah apnay kapday dho kar naha lay. vah shaam tak naapaak rahega. 11jis kisee ko bhee mareez apnay haath dhoay baghair chhuay vah apnay kapday dho kar naha lay. vah shaam tak naapaak rahega. 12mittee ka jo bartan aisa mareez chhuay usay tod diya jaaay. lakdee ka jo bartan vah chhuay usay khoob dhoya jaaay.
13jisay is marz say shifa milee hai vah saat din intizaar karay. is kay baad vah taaza paanee say apnay kapday dho kar naha lay. phir vah paak ho jaaega. 14aathven din vah do qumriyaan ya do javaan kabootar lay kar mulaaqaat kay khaimay kay darvaazay par rabb kay saamnay imaam ko day. 15imaam un men say ek ko gunaah kee qurbaanee kay taur par aur doosray ko bhasm honay vaalee qurbaanee kay taur par chadhaaay. yoon vah rabb kay saamnay us ka kaffaara dega.
16agar kisee mard ka nutfa khaarij ho jaaay to vah apnay pooray jism ko dho lay. vah shaam tak naapaak rahega. 17har kapda ya chamda jis say nutfa lag gaya ho usay dhona hai. vah bhee shaam tak naapaak rahega. 18agar mard aur aurat kay hambistar honay par nutfa khaarij ho jaaay to laazim hai ki donon naha len. vah shaam tak naapaak rahengay.
aurton kee naapaakee
19maahavaaree kay vaqt aurat saat din tak naapaak hai. jo koee bhee usay chhuay vah shaam tak naapaak rahega. 20is dauraan jis cheez par bhee vah lettee ya baithtee hai vah naapaak hai. 21-23 jo koee bhee us kay letnay kee jagah ko chhuay ya us kay baithnay kee jagah par baith jaaay vah apnay kapday dho kar naha lay. vah shaam tak naapaak rahega. 24agar mard aurat say hambistar ho aur usee vaqt maahavaaree kay din shuroo ho jaaen to mard khoon lagnay kay baais saat din tak naapaak rahega. jis cheez par bhee vah letta hai vah naapaak ho jaaegee.
25agar kisee aurat ko maahavaaree kay din chhod kar kisee aur vaqt kaee dinon tak khoon aaay ya khoon maahavaaree kay dinon kay baad bhee jaaree rahay to vah maahavaaree kay dinon kee tarah us vaqt tak naapaak rahegee jab tak khoon ruk na jaaay. 26jis cheez par bhee vah lettee ya baithtee hai vah naapaak hai. 27jo koee bhee aisee cheez ko chhuay vah apnay kapday dho kar naha lay. vah shaam tak naapaak rahega. 28khoon kay ruk jaanay par aurat mazeed saat din intizaar karay. phir vah paak hogee. 29aathven din vah do qumriyaan ya do javaan kabootar lay kar mulaaqaat kay khaimay kay darvaazay par imaam kay paas aaay. 30imaam un men say ek ko gunaah kee qurbaanee kay liyay aur doosray ko bhasm honay vaalee qurbaanee kay liyay chadhaaay. yoon vah rabb kay saamnay us kee naapaakee ka kaffaara dega.
31laazim hai ki israaeeliyon ko aisee cheezon say door rakha jaaay jin say vah naapaak ho jaaen. varna mera vah maqdis jo un kay darmiyaan hai un say naapaak ho jaaega aur vah halaak ho jaaengay.
32laazim hai ki is qism kay muaamlon say aisay nipto jaisay bayaan kiya gaya hai. is men vah mard shaamil hai jo jaryaan ka mareez hai aur vah jo nutfa khaarij honay kay baais naapaak hai. 33is men vah aurat bhee shaamil hai jis kay maahavaaree kay ayyaam hain aur vah mard jo naapaak aurat say hambistar ho jaata hai.”