Ahabaar 14

vabaaee jildee beemaaree kay mareez kee shifa par qurbaanee

¹rabb nay moosa say kaha, ²“agar koee shakhs jildee beemaaree say shifa paaay aur usay paak-saaf karaana hai to usay imaam kay paas laaya jaae ³jo khaimaagaah kay baahar ja kar us ka muaaina karay. agar vah dekhay ki mareez kee sehat vaaqaee bahaal ho gaee hai ⁴to imaam us kay liyay do zinda aur paak parinday, deodaar kee lakdee, qirmizee rang ka dhaaga aur zoofa mangavaaay. ⁵imaam kay hukm par parindon men say ek ko taaza paanee say bharay huay mittee kay bartan kay oopar zabah kiya jaaay. ⁶imaam zinda parinday ko deodaar kee lakdee, qirmizee rang kay dhaagay aur zoofa kay saath zabah kiay gaay parinday kay us khoon men dubo day jo mittee kay bartan kay paanee men a gaya hai. ⁷vah paanee say milaaya hua khoon saat baar paak honay vaalay shakhs par chhidak kar usay paak qaraar day, phir zinda parinday ko khulay maidaan men chhod day. ⁸jo apnay aap ko paak-saaf kara raha hai vah apnay kapday dhoay, apnay tamaam baal mundavaaay aur naha lay. is kay baad vah paak hai. ab vah khaimaagaah men daakhil ho sakta hai agarchi vah mazeed saat din apnay deray men naheen ja sakta. ⁹saatven din vah dubaara apnay sar kay baal, apnee daadhee, apnay abroo aur baaqee tamaam baal mundavaaay. vah apnay kapday dhoay aur naha lay. tab vah paak hai.

¹⁰aathven din vah do bhed kay nar bachchay aur ek yaksaala bhed chun lay jo beaib hon. saath hee vah ghalla kee nazar kay liyay tel kay saath milaaya gaya saadhay 4 kilograam behtareen maida aur 300 mileelitar tel lay. ¹¹phir jis imaam nay usay paak qaraar diya vah usay in qurbaaniyon samet mulaaqaat kay khaimay kay darvaazay par rabb ko pesh karay. ¹²bhed ka ek nar bachcha aur 300 mileelitar tel qusoor kee qurbaanee kay liyay hai. imaam unhen hilaanay vaalee qurbaanee kay taur par rabb kay saamnay hilaaay. ¹³phir vah bhed kay is bachchay ko khaimay kay darvaazay par zabah karay jahaan gunaah kee qurbaaniyaan aur bhasm honay vaalee qurbaaniyaan zabah kee jaatee hain. gunaah kee qurbaaniyon kee tarah qusoor kee yah qurbaanee imaam ka hissa hai aur nihaayat muqaddas hai. ¹⁴imaam khoon men say kuchh lay kar paak honay vaalay kay dahenay kaan kee lau par aur us kay dahenay haath aur dahenay paaon kay angoothon par lagaaay. ¹⁵ab vah 300 mileelitar tel men say kuchh lay kar apnay baaen haath kee hathelee par daalay. ¹⁶apnay dahenay haath kay angoothay kay saath vaalee unglee is tel men dubo kar vah usay saat baar rabb kay saamnay chhidkay. ¹⁷vah apnee hathelee par kay tel men say kuchh aur lay kar paak honay vaalay kay dahenay kaan kee lau par aur us kay dahenay haath aur dahenay paaon kay angoothon par laga day yaanee un jagahon par jahaan vah qusoor kee qurbaanee ka khoon laga chuka hai. ¹⁸imaam apnee hathelee par ka baaqee tel paak honay vaalay kay sar par daal kar rabb kay saamnay us ka kaffaara day.

¹⁹is kay baad imaam gunaah kee qurbaanee chadha kar paak honay vaalay ka kaffaara day. aakhir men vah bhasm honay vaalee qurbaanee ka jaanvar zabah karay. ²⁰vah usay ghalla kee nazar kay saath qurbaangaah par chadha kar us ka kaffaara day. tab vah paak hai.

²¹agar shifaayaab shakhs ghurbat kay baais yah qurbaaniyaan naheen chadha sakta to phir vah qusoor kee qurbaanee kay liyay bhed ka sirf ek nar bachcha lay aaay. kaafee hai ki kaffaara denay kay liyay yahee rabb kay saamnay hilaaya jaaay. saath saath ghalla kee nazar kay liyay dedh kilograam behtareen maida tel kay saath mila kar pesh kiya jaaay aur 300 mileelitar tel. ²²is kay ilaava vah do qumriyaan ya do javaan kabootar pesh karay, ek ko gunaah kee qurbaanee kay liyay aur doosray ko bhasm honay vaalee qurbaanee kay liyay. ²³aathven din vah unhen mulaaqaat kay khaimay kay darvaazay par imaam kay paas aur rabb kay saamnay lay aaay taaki vah paak-saaf ho jaaay. ²⁴imaam bhed kay bachchay ko 300 mileelitar tel samet lay kar hilaanay vaalee qurbaanee kay taur par rabb kay saamnay hilaaay. ²⁵vah qusoor kee qurbaanee kay liyay bhed kay bachchay ko zabah karay aur us kay khoon men say kuchh lay kar paak honay vaalay kay dahenay kaan kee lau par aur us kay dahenay haath aur dahenay paaon kay angoothon par lagaaay. ²⁶ab vah 300 mileelitar tel men say kuchh apnay baaen haath kee hathelee par daale ²⁷aur apnay dahenay haath kay angoothay kay saath vaalee unglee is tel men dubo kar usay saat baar rabb kay saamnay chhidak day. ²⁸vah apnee hathelee par kay tel men say kuchh aur lay kar paak honay vaalay kay dahenay kaan kee lau par aur us kay dahenay haath aur dahenay paaon kay angoothon par laga day yaanee un jagahon par jahaan vah qusoor kee qurbaanee ka khoon laga chuka hai. ²⁹apnee hathelee par ka baaqee tel vah paak honay vaalay kay sar par daal day taaki rabb kay saamnay us ka kaffaara day. ³⁰is kay baad vah shifaayaab shakhs kee gunjaaish kay mutaabiq do qumriyaan ya do javaan kabootar chadhaaay, ³¹ek ko gunaah kee qurbaanee kay liyay aur doosray ko bhasm honay vaalee qurbaanee kay liyay. saath hee vah ghalla kee nazar pesh karay. yoon imaam rabb kay saamnay us ka kaffaara deta hai. ³²yah usool aisay shakhs kay liyay hai jo vabaaee jildee beemaaree say shifa pa gaya hai lekin apnee ghurbat kay baais paak ho jaanay kay liyay pooree qurbaanee pesh naheen kar sakta.”

gharon men phaphoondee

³³rabb nay moosa aur haaroon say kaha, ³⁴“jab tum mulk-ay-kan’aan men daakhil hogay jo main tumhen doonga to vahaan aisay makaan hongay jin men main nay phaphoondee phailnay dee hai. ³⁵aisay ghar ka maalik ja kar imaam ko bataaay ki main nay apnay ghar men phaphoondee jaisee koee cheez dekhee hai. ³⁶tab imaam hukm day ki ghar ka muaaina karnay say pahelay ghar ka poora saamaan nikaala jaaay. varna agar ghar ko naapaak qaraar diya jaaay to saamaan ko bhee naapaak qaraar diya jaaega. is kay baad imaam andar ja kar makaan ka muaaina karay. ³⁷vah deevaaron kay saath lagee huee phaphoondee ka muaaina karay. agar mut’assira jagahen haree ya laal see hon aur deevaar kay andar dhansee huee nazar aaen ³⁸to phir imaam ghar say nikal kar saat din kay liyay taala lagaaay. ³⁹saatven din vah vaapas a kar makaan ka muaaina karay. agar phaphoondee phailee huee nazar aae ⁴⁰to vah hukm day ki mut’assira pattharon ko nikaal kar aabaadee kay baahar kisee naapaak jagah par phainka jaaay. ⁴¹neez vah hukm day ki andar kee deevaaron ko kureda jaaay aur kuredee huee mittee ko aabaadee kay baahar kisee naapaak jagah par phainka jaaay. ⁴²phir log naay patthar laga kar ghar ko naay gaaray say palastar karen. ⁴³lekin agar is kay baavujood phaphoondee dubaara paida ho jaae ⁴⁴to imaam a kar dubaara us ka muaaina karay. agar vah dekhay ki phaphoondee ghar men phail gaee hai to is ka matlab hai ki phaphoondee nuqsaandih hai, is liyay ghar naapaak hai. ⁴⁵laazim hai ki usay pooray taur par dha diya jaaay aur sab kuchh yaanee us kay patthar, lakdee aur palastar ko aabaadee kay baahar kisee naapaak jagah par phainka jaaay.

⁴⁶agar imaam nay kisee ghar ka muaaina karkay taala laga diya hai aur phir bhee koee us ghar men daakhil ho jaaay to vah shaam tak naapaak rahega. ⁴⁷jo aisay ghar men soay ya khaana khaaay laazim hai ki vah apnay kapday dho lay. ⁴⁸lekin agar ghar ko naay siray say palastar karnay kay baad imaam a kar us ka dubaara muaaina karay aur dekhay ki phaphoondee dubaara naheen niklee to is ka matlab hai ki phaphoondee khatm ho gaee hai. vah usay paak qaraar day. ⁴⁹usay gunaah say paak-saaf karaanay kay liyay vah do parinday, deodaar kee lakdee, qirmizee rang ka dhaaga aur zoofa lay lay. ⁵⁰vah parindon men say ek ko taaza paanee say bharay huay mittee kay bartan kay oopar zabah karay. ⁵¹is kay baad vah deodaar kee lakdee, zoofa, qirmizee rang ka dhaaga aur zinda parinda lay kar us taaza paanee men dubo day jis kay saath zabah kiay huay parinday ka khoon milaaya gaya hai aur is paanee ko saat baar ghar par chhidak day. ⁵²in cheezon say vah ghar ko gunaah say paak-saaf karta hai. ⁵³aakhir men vah zinda parinday ko aabaadee kay baahar khulay maidaan men chhod day. yoon vah ghar ka kaffaara dega, aur vah paak-saaf ho jaaega.

^54-56 laazim hai ki har qism kee vabaaee beemaaree say aisay nipto jaisay bayaan kiya gaya hai, chaahay vah vabaaee jildee beemaariyaan hon (maslan khaarish, soojan, papdee ya safed daagh), chaahay kapdon ya gharon men phaphoondee ho. ⁵⁷in usoolon kay tahet faisla karna hai ki koee shakhs ya cheez paak hai ya naapaak.”