Ahabaar 13

jildee beemaariyaan

¹rabb nay moosa aur haaroon say kaha, ²“agar kisee kee jild men soojan ya papdee ya safed daagh ho aur khatra hai ki vabaaee jildee beemaaree ho to usay imaamon yaanee haaroon ya us kay beton kay paas lay aana hai. ³imaam us jagah ka muaaina karay. agar us kay baal safed ho gaay hon aur vah jild men dhansee huee ho to vabaaee beemaaree hai. jab imaam ko yah maaloom ho to vah usay naapaak qaraar day. ⁴lekin ho sakta hai ki jild kee jagah safed to hai lekin jild men dhansee huee naheen hai, na us kay baal safed huay hain. is soorat men imaam us shakhs ko saat din kay liyay alaahidagee men rakhay. ⁵saatven din imaam dubaara us ka muaaina karay. agar vah dekhay ki mut’assira jagah vaisee hee hai aur phailee naheen to vah usay mazeed saat din alaahidagee men rakhay. ⁶saatven din vah ek aur martaba us ka muaaina karay. agar us jagah ka rang dubaara sehatmand jild kay rang kee maanind ho raha ho aur phailee na ho to vah usay paak qaraar day. is ka matlab hai ki yah marz aam papdee say ziyaada naheen hai. mareez apnay kapday dho lay to vah paak ho jaaega. ⁷lekin agar is kay baad mut’assira jagah phailnay lagay to vah dubaara apnay aap ko imaam ko dikhaaay. ⁸imaam us ka muaaina karay. agar jagah vaaqaee phail gaee ho to imaam usay naapaak qaraar day, kyoonki yah vabaaee jildee marz hai.

⁹agar kisee kay jism par vabaaee jildee marz nazar aaay to usay imaam kay paas laaya jaaay. ¹⁰imaam us ka muaaina karay. agar mut’assira jild men safed soojan ho, us kay baal bhee safed ho gaay hon, aur us men kachcha gosht maujood ho ¹¹to is ka matlab hai ki vabaaee jildee beemaaree puraanee hai. imaam us shakhs ko saat din kay liyay alaahidagee men rakh kar intizaar na karay balki usay fauran naapaak qaraar day, kyoonki yah us kee naapaakee ka saboot hai. ¹²lekin agar beemaaree jaldee say phail gaee ho, yahaan tak ki sar say lay kar paaon tak pooree jild mut’assir huee ho ¹³to imaam yah dekh kar mareez ko paak qaraar day. choonki pooree jild safed ho gaee hai is liyay vah paak hai. ¹⁴lekin jab bhee kaheen kachcha gosht nazar aaay us vaqt vah naapaak ho jaata hai. ¹⁵imaam yah dekh kar mareez ko naapaak qaraar day. kachcha gosht har soorat men naapaak hai, kyoonki is ka matlab hai ki vabaaee jildee beemaaree lag gaee hai. ¹⁶agar kachchay gosht ka yah zakhm bhar jaaay aur mut’assira jagah kee jild safed ho jaaay to mareez imaam kay paas jaaay. ¹⁷agar imaam dekhay ki vaaqaee aisa hee hua hai aur mut’assira jild safed ho gaee hai to vah usay paak qaraar day.

¹⁸agar kisee kee jild par phoda ho lekin vah theek ho jaae ¹⁹aur us kee jagah safed soojan ya surkhee-maail safed daagh nazar aaay to mareez apnay aap ko imaam ko dikhaaay. ²⁰agar vah us ka muaaina karkay dekhay ki mut’assira jagah jild kay andar dhansee huee hai aur us kay baal safed ho gaay hain to vah mareez ko naapaak qaraar day. kyoonki is ka matlab hai ki jahaan pahelay phoda tha vahaan vabaaee jildee beemaaree paida ho gaee hai. ²¹lekin agar imaam dekhay ki mut’assira jagah kay baal safed naheen hain, vah jild men dhansee huee nazar naheen aatee aur us ka rang dubaara sehatmand jild kee maanind ho raha hai to vah usay saat din kay liyay alaahidagee men rakhay. ²²agar is dauraan beemaaree mazeed phail jaaay to imaam mareez ko naapaak qaraar day, kyoonki is ka matlab hai ki vabaaee jildee beemaaree lag gaee hai. ²³lekin agar daagh na phailay to is ka matlab hai ki yah sirf us bharay huay zakhm ka nishaan hai jo phoday say paida hua tha. imaam mareez ko paak qaraar day.

²⁴agar kisee kee jild par jalnay ka zakhm lag jaaay aur mut’assira jagah par surkhee-maail safed daagh ya safed daagh paida ho jaae ²⁵to imaam mut’assira jagah ka muaaina karay. agar maaloom ho jaaay ki mut’assira jagah kay baal safed ho gaay hain aur vah jild men dhansee huee hai to is ka matlab hai ki chot kee jagah par vabaaee jildee marz lag gaya hai. imaam usay naapaak qaraar day, kyoonki vabaaee jildee beemaaree lag gaee hai. ²⁶lekin agar imaam nay maaloom kiya hai ki daagh men baal safed naheen hain, vah jild men dhansa hua nazar naheen aata aur us ka rang sehatmand jild kee maanind ho raha hai to vah mareez ko saat din tak alaahidagee men rakhay. ²⁷agar vah saatven din maaloom karay ki mut’assira jagah phail gaee hai to vah usay naapaak qaraar day. kyoonki is ka matlab hai ki vabaaee jildee beemaaree lag gaee hai. ²⁸lekin agar daagh phaila hua nazar naheen aata aur mut’assira jild ka rang sehatmand jild kay rang kee maanind ho gaya hai to is ka matlab hai ki yah sirf us bharay huay zakhm ka nishaan hai jo jalnay say paida hua tha. imaam mareez ko paak qaraar day.

²⁹agar kisee kay sar ya daadhee kee jild men nishaan nazar aae ³⁰to imaam mut’assira jagah ka muaaina karay. agar vah dhansee huee nazar aaay aur us kay baal rang kay lihaaz say chamaktay huay sonay kee maanind aur baareek hon to imaam mareez ko naapaak qaraar day. is ka matlab hai ki aisee vabaaee jildee beemaaree sar ya daadhee kee jild par lag gaee hai jo khaarish paida kartee hai. ³¹lekin agar imaam nay maaloom kiya ki mut’assira jagah jild men dhansee huee nazar naheen aatee agarchi us kay baalon ka rang badal gaya hai to vah usay saat din kay liyay alaahidagee men rakhay. ³²saatven din imaam jild kee mut’assira jagah ka muaaina karay. agar vah phailee huee nazar naheen aatee aur us kay baalon ka rang chamakdaar sonay kee maanind naheen hai, saath hee vah jagah jild men dhansee huee bhee dikhaaee naheen detee, ³³to mareez apnay baal mundavaaay. sirf vah baal rah jaaen jo mut’assira jagah say nikaltay hain. imaam mareez ko mazeed saat din alaahidagee men rakhay. ³⁴saatven din vah us ka muaaina karay. agar mut’assira jagah naheen phailee aur vah jild men dhansee huee nazar naheen aatee to imaam usay paak qaraar day. vah apnay kapday dho lay to vah paak ho jaaega. ³⁵lekin agar is kay baad jild kee mut’assira jagah phailna shuroo ho jaae ³⁶to imaam dubaara us ka muaaina karay. agar vah jagah vaaqaee phailee huee nazar aaay to mareez naapaak hai, chaahay mut’assira jagah kay baalon ka rang chamaktay sonay kee maanind ho ya na ho. ³⁷lekin agar us kay khayaal men mut’assira jagah phailee huee nazar naheen aatee balki us men say kaalay rang kay baal nikal rahay hain to is ka matlab hai ki mareez kee sehat bahaal ho gaee hai. imaam usay paak qaraar day.

³⁸agar kisee mard ya aurat kee jild par safed daagh paida ho jaaen ³⁹to imaam un ka muaaina karay. agar un ka safed rang halka sa ho to yah sirf bezarar papdee hai. mareez paak hai.

^40-41 agar kisee mard ka sar maathay kee taraf ya peechhay kee taraf ganja hai to vah paak hai. ⁴²lekin agar us jagah jahaan vah ganja hai surkhee-maail safed daagh ho to is ka matlab hai ki vahaan vabaaee jildee beemaaree lag gaee hai. ⁴³imaam us ka muaaina karay. agar ganjee jagah par surkhee-maail safed soojan ho jo vabaaee jildee beemaaree kee maanind nazar aae ⁴⁴to mareez ko vabaaee jildee beemaaree lag gaee hai. imaam usay naapaak qaraar day.

naapaak mareez ka sulook

⁴⁵vabaaee jildee beemaaree ka mareez phatay kapday pahenay. us kay baal bikhray rahen. vah apnee moonchhon ko kisee kapday say chhupaaay aur pukaarta rahay, ‘naapaak, naapaak.’ ⁴⁶jis vaqt tak vabaaee jildee beemaaree lagee rahay vah naapaak hai. vah is dauraan khaimaagaah kay baahar ja kar tanhaaee men rahay.

phaphoondee say nipatnay ka tareeqaa

⁴⁷ho sakta hai ki oon ya kataan kay kisee libaas par phaphoondee lag gaee hai, ⁴⁸ya ki phaphoondee oon ya kataan kay kisee kapday kay tukday ya kisee chamday ya chamday kee kisee cheez par lag gaee hai. ⁴⁹agar phaphoondee ka rang hara ya laal sa ho to vah phailnay vaalee phaphoondee hai, aur laazim hai ki usay imaam ko dikhaaya jaaay. ⁵⁰imaam us ka muaaina karkay usay saat din kay liyay alaahidagee men rakhay. ⁵¹saatven din vah dubaara us ka muaaina karay. agar phaphoondee phail gaee ho to is ka matlab hai ki vah nuqsaandih hai. mut’assira cheez naapaak hai. ⁵²imaam usay jala day, kyoonki yah phaphoondee nuqsaandih hai. laazim hai ki usay jala diya jaaay. ⁵³lekin agar in saat dinon kay baad phaphoondee phailee huee nazar naheen aatee ⁵⁴to imaam hukm day ki mut’assira cheez ko dhulvaaya jaaay. phir vah usay mazeed saat din kay liyay alaahidagee men rakhay. ⁵⁵is kay baad vah dubaara us ka muaaina karay. agar vah maaloom karay ki phaphoondee to phailee huee nazar naheen aatee lekin us ka rang vaisay ka vaisa hai to vah naapaak hai. usay jala dena, chaahay phaphoondee mut’assira cheez kay saamnay vaalay hissay ya pichhlay hissay men lagee ho. ⁵⁶lekin agar maaloom ho jaaay ki phaphoondee ka rang maand pad gaya hai to imaam kapday ya chamday men say mut’assira jagah phaad kar nikaal day. ⁵⁷to bhee ho sakta hai ki phaphoondee dubaara usee kapday ya chamday par nazar aaay. is ka matlab hai ki vah phail rahee hai aur usay jala dena laazim hai. ⁵⁸lekin agar phaphoondee dhonay kay baad ghaaib ho jaaay to usay ek aur dafa dhona hai. phir mut’assira cheez paak hogee.

⁵⁹yoon hee phaphoondee say nipatna hai, chaahay vah oon ya kataan kay kisee libaas ko lag gaee ho, chaahay oon ya kataan kay kisee tukday ya chamday kee kisee cheez ko lag gaee ho. in hee usoolon kay tahet faisla karna hai ki mut’assira cheez paak hai ya naapaak.”