Ahabaar 12
bachchay kee paidaaish kay baad maan par paabandiyaan
1rabb nay moosa say kaha, 2“israaeeliyon ko bata ki jab kisee aurat kay ladka paida ho to vah maahavaaree kay ayyaam kee tarah saat din tak naapaak rahegee. 3aathven din ladkay ka khatna karvaana hai. 4phir maan mazeed 33 din intizaar karay. is kay baad us kee vah naapaakee door ho jaaegee jo khoon bahenay say paida huee hai. is dauraan vah koee makhsoos aur muqaddas cheez na chhuay, na maqdis kay paas jaaay.
5agar us kay ladkee paida ho jaaay to vah maahavaaree kay ayyaam kee tarah naapaak hai. yah naapaakee 14 din tak rahegee. phir vah mazeed 66 din intizaar karay. is kay baad us kee vah naapaakee door ho jaaegee jo khoon bahenay say paida huee hai.
6jab ladkay ya ladkee kay silsilay men yah din guzar jaaen to vah mulaaqaat kay khaimay kay darvaazay par imaam ko zail kee cheezen day : bhasm honay vaalee qurbaanee kay liyay ek yaksaala bhed ka bachcha aur gunaah kee qurbaanee kay liyay ek javaan kabootar ya qumree. 7imaam yah jaanvar rabb ko pesh karkay us ka kaffaara day. phir khoon bahenay kay baais paida honay vaalee naapaakee door ho jaaegee. usool ek hee hai, chaahay ladka ho ya ladkee.
8agar vah ghurbat kay baais bhed ka bachcha na day sakay to phir vah do qumriyaan ya do javaan kabootar lay aaay, ek bhasm honay vaalee qurbaanee kay liyay aur doosra gunaah kee qurbaanee kay liyay. yoon imaam us ka kaffaara day aur vah paak ho jaaegee.”