Ahabaar 11
paak aur naapaak jaanvar
1rabb nay moosa aur haaroon say kaha, 2“israaeeliyon ko bataana ki tumhen zameen par rahenay vaalay jaanvaron men say zail kay jaanvaron ko khaanay kee ijaazat hai : 3jin kay khur ya paaon bilkul chiray huay hain aur jo jugaalee kartay hain unhen khaanay kee ijaazat hai. 4-6 oont, bijjoo ya khargosh khaana mana hai. vah aap kay liyay naapaak hain, kyoonki vah jugaalee to kartay hain lekin un kay khur ya paaon chiray huay naheen hain. 7sooar na khaana. vah tumhaaray liyay naapaak hai, kyoonki us kay khur to chiray huay hain lekin vah jugaalee naheen karta. 8na un ka gosht khaana, na un kee laashon ko chhoona. vah tumhaaray liyay naapaak hain.
9samundaree aur daryaaee jaanvar khaanay kay liyay jaaiz hain agar un kay par aur chhilkay hon. 10lekin jin kay par ya chhilkay naheen hain vah sab tumhaaray liyay makrooh hain, khwaah vah badee taadaad men mil kar rahetay hain ya naheen. 11is liyay un ka gosht khaana mana hai, aur un kee laashon say bhee ghin khaana hai. 12paanee men rahenay vaalay tamaam jaanvar jin kay par ya chhilkay na hon tumhaaray liyay makrooh hain.
13zail kay parinday tumhaaray liyay qaabil-ay-ghin hon. inhen khaana mana hai, kyoonki vah makrooh hain : uqaab, dadhiyal giddh, kaala giddh, 14laal cheel, har qism kee kaalee cheel, 15har qism ka kavva, 16uqaabee ulloo, chhotay kaan vaala ulloo, baday kaan vaala ulloo, har qism ka baaz, 17chhota ulloo, qooq, chinghaadanay vaala ulloo, 18safed ulloo, dashtee ulloo, misree giddh, 19laqlaq, har qism ka booteemaar, hudahud aur chamgaadad [a] yaad rahay ki qadeem zamaanay kay in parindon kay aksar naam matrook hain ya un ka matlab badal gaya hai, is liyay un ka mukhtalif tarjuma ho sakta hai. .
20tamaam par rakhnay vaalay keeday jo chaar paaon par chaltay hain tumhaaray liyay makrooh hain, 21siva-ay-un kay jin kee taangon kay do hissay hain aur jo phudaktay hain. un ko tum kha saktay ho. 22is naatay say tum mukhtalif qism kay tidday kha saktay ho. 23baaqee sab par rakhnay vaalay keeday jo chaar paaon par chaltay hain tumhaaray liyay makrooh hain.
24-28 jo bhee zail kay jaanvaron kee laashen chhuay vah shaam tak naapaak rahega : (alif) khur rakhnay vaalay tamaam jaanvar siva-ay-un kay jin kay khur ya paaon pooray taur par chiray huay hain aur jo jugaalee kartay hain, (bay) tamaam jaanvar jo apnay chaar panjon par chaltay hain. yah jaanvar tumhaaray liyay naapaak hain, aur jo bhee un kee laashen uthaaay ya chhuay laazim hai ki vah apnay kapday dho lay. is kay baavujood bhee vah shaam tak naapaak rahega.
29-30 zameen par rengnay vaalay jaanvaron men say chhachhoondar, mukhtalif qism kay choohay aur mukhtalif qism kee chhipakaliyaan tumhaaray liyay naapaak hain. 31jo bhee unhen aur un kee laashen chhoo leta hai vah shaam tak naapaak rahega. 32agar un men say kisee kee laash kisee cheez par gir paday to vah bhee naapaak ho jaaegee. is say koee farq naheen padta ki vah lakdee, kapday, chamday ya taat kee banee ho, na is say koee farq padta hai ki vah kis kaam kay liyay istemaal kee jaatee hai. usay har soorat men paanee men dubona hai. to bhee vah shaam tak naapaak rahegee. 33agar aisee laash mittee kay bartan men gir jaaay to jo kuchh bhee us men hai naapaak ho jaaega aur tumhen us bartan ko todna hai. 34har khaanay vaalee cheez jis par aisay bartan ka paanee daala gaya hai naapaak hai. isee tarah us bartan say niklee huee har peenay vaalee cheez naapaak hai. 35jis par bhee aisee laash gir paday vah naapaak ho jaata hai. agar vah tanoor ya choolhay par gir paday to un ko tod dena hai. vah naapaak hain aur tumhaaray liyay naapaak rahengay. 36lekin jis chashmay ya hauz men aisee laash giray vah paak raheta hai. sirf vah jo laash ko chhoo leta hai naapaak ho jaata hai. 37agar aisee laash beejon par gir paday jin ko abhee bona hai to vah paak rahetay hain. 38lekin agar beejon par paanee daala gaya ho aur phir laash un par gir paday to vah naapaak hain.
39agar aisa jaanvar jisay khaanay kee ijaazat hai mar jaaay to jo bhee us kee laash chhuay shaam tak naapaak rahega. 40jo us men say kuchh khaaay ya usay utha kar lay jaaay usay apnay kapdon ko dhona hai. to bhee vah shaam tak naapaak rahega.
41har jaanvar jo zameen par rengta hai qaabil-ay-ghin hai. usay khaana mana hai, 42chaahay vah apnay pet par chaahay chaar ya is say zaaid paaon par chalta ho. 43in tamaam rengnay vaalon say apnay aap ko ghin ka baais aur naapaak na banaana, 44kyoonki main rabb tumhaara khuda hoon. laazim hai ki tum apnay aap ko makhsoos-o-muqaddas rakho, kyoonki main quddoos hoon. apnay aap ko zameen par rengnay vaalay tamaam jaanvaron say naapaak na banaana. 45main rabb hoon. main tumhen misr say nikaal laaya hoon taaki tumhaara khuda banoon. lihaaza muqaddas raho, kyoonki main quddoos hoon.
46zameen par chalnay vaalay jaanvaron, parindon, aabee jaanvaron aur zameen par rengnay vaalay jaanvaron kay baaray men shar’a yahee hai. 47laazim hai ki tum naapaak aur paak men imtiyaaz karo, aisay jaanvaron men jo khaanay kay liyay jaaiz hain aur aison men jo naajaaiz hain.”