Ahabaar 10

nadab aur abeehoo ka gunaah

¹haaroon kay betay nadab aur abeehoo nay apnay apnay bakhooradaan lay kar un men jaltay huay koilay daalay. un par bakhoor daal kar vah rabb kay saamnay aaay taaki usay pesh karen. lekin yah aag naajaaiz thee. rabb nay yah pesh karnay ka hukm naheen diya tha. ²achaanak rabb kay huzoor say aag niklee jis nay unhen bhasm kar diya. vaheen rabb kay saamnay vah mar gaay.

³moosa nay haaroon say kaha, “ab vahee hua hai jo rabb nay farmaaya tha ki jo meray qareeb hain un say main apnee quddoosiyat zaahir karoonga, main tamaam qaum kay saamnay hee apnay jalaal ka izhaar karoonga.”

haaroon khaamosh raha. ⁴moosa nay haaroon kay chacha uzzeeel kay beton meesaael aur ilsafan ko bula kar kaha, “idhar aao aur apnay rishtedaaron ko maqdis kay saamnay say utha kar khaimaagaah kay baahar lay jaao.” ⁵vah aaay aur moosa kay hukm kay ain mutaabiq unhen un kay zerjaamon samet utha kar khaimaagaah kay baahar lay gaay.

⁶moosa nay haaroon aur us kay deegar beton ileeazar aur itmar say kaha, “maatam ka izhaar na karo. na apnay baal bikharnay do, na apnay kapday phaado. varna tum mar jaaogay aur rabb pooree jamaaat say naaraaz ho jaaega. lekin tumhaaray rishtedaar aur baaqee tamaam israaeelee zaroor in ka maatam karen jin ko rabb nay aag say halaak kar diya hai. ⁷mulaaqaat kay khaimay kay darvaazay kay baahar na niklo varna tum mar jaaogay, kyoonki tumhen rabb kay tel say masah kiya gaya hai.” chunaanchay unhon nay aisa hee kiya.

imaamon kay liyay hidaayaat

⁸rabb nay haaroon say kaha, ⁹“jab bhee tujhay ya teray beton ko mulaaqaat kay khaimay men daakhil hona hai to mai ya koee aur nashaaaavar cheez peena mana hai, varna tum mar jaaogay. yah usool aanay vaalee naslon kay liyay bhee abad tak anmit hai. ¹⁰yah bhee laazim hai ki tum muqaddas aur ghairmuqaddas cheezon men, paak aur naapaak cheezon men imtiyaaz karo. ¹¹tumhen israaeeliyon ko tamaam paabandiyaan sikhaanee hain jo main nay tumhen moosa kee maarifat bataaee hain.”

¹²moosa nay haaroon aur us kay bachay huay beton ileeazar aur itmar say kaha, “ghalla kee nazar ka jo hissa rabb kay saamnay jalaaya naheen jaata usay apnay liyay lay kar bekhameeree rotee pakaana aur qurbaangaah kay paas hee khaana. kyoonki vah nihaayat muqaddas hai. ¹³usay muqaddas jagah par khaana, kyoonki vah rabb kee jalnay vaalee qurbaaniyon men say tumhaaray aur tumhaaray beton ka hissa hai. kyoonki mujhay is ka hukm diya gaya hai. ¹⁴jo seena hilaanay vaalee qurbaanee aur dahenee raan uthaanay vaalee qurbaanee kay taur par pesh kee gaee hai, vah tum aur tumhaaray betay-betiyaan kha saktay hain. unhen muqaddas jagah par khaana hai. israaeeliyon kee salaamatee kee qurbaaniyon men say yah tukday tumhaara hissa hain. ¹⁵lekin pahelay imaam raan aur seenay ko jalnay vaalee qurbaaniyon kee charbee kay saath pesh karen. vah unhen hilaanay vaalee qurbaanee kay taur par rabb kay saamnay hilaaen. rabb farmaata hai ki yah tukday abad tak tumhaaray aur tumhaaray beton ka hissa hain.”

¹⁶moosa nay darayaaft kiya ki us bakray kay gosht ka kya hua jo gunaah kee qurbaanee kay taur par chadhaaya gaya tha. usay pata chala ki vah bhee jal gaya tha. yah sun kar usay haaroon kay beton ileeazar aur itmar par ghussa aaya. us nay poochha, ¹⁷“tum nay gunaah kee qurbaanee ka gosht kyoon naheen khaaya? tumhen usay muqaddas jagah par khaana tha. yah ek nihaayat muqaddas hissa hai jo rabb nay tumhen diya taaki tum jamaaat ka qusoor door karkay rabb kay saamnay logon ka kaffaara do. ¹⁸choonki is bakray ka khoon maqdis men na laaya gaya is liyay tumhen us ka gosht maqdis men khaana tha jis tarah main nay tumhen hukm diya tha.”

¹⁹haaroon nay moosa ko javaab day kar kaha, “dekhen, aaj logon nay apnay liyay gunaah kee qurbaanee aur bhasm honay vaalee qurbaanee rabb ko pesh kee hai jabki mujh par yah aafat guzree hai. agar main aaj gunaah kee qurbaanee say khaata to kya yah rabb ko achchha lagta?” ²⁰yah baat moosa ko achchhee lagee.