Ahabaar 1

bhasm honay vaalee qurbaanee

¹rabb nay mulaaqaat kay khaimay men say moosa ko bula kar kahaa ²ki israaeeliyon ko ittila day,

“agar tum men say koee rabb ko qurbaanee pesh karna chaahay to vah apnay gaay-bailon ya bhed-bakriyon men say jaanvar chun lay.

³agar vah apnay gaay-bailon men say bhasm honay vaalee qurbaanee chadhaana chaahay to vah beaib bail chun kar usay mulaaqaat kay khaimay kay darvaazay par pesh karay taaki rabb usay qabool karay. ⁴qurbaanee pesh karnay vaala apna haath jaanvar kay sar par rakhay to yah qurbaanee maqbool ho kar us ka kaffaara degee. ⁵qurbaanee pesh karnay vaala bail ko vahaan rabb kay saamnay zabah karay. phir haaroon kay betay jo imaam hain us ka khoon rabb ko pesh karkay usay darvaazay par kee qurbaangaah kay chaar pahelooon par chhidken. ⁶is kay baad qurbaanee pesh karnay vaala khaal utaar kar jaanvar kay tukday tukday karay. ⁷imaam qurbaangaah par aag laga kar us par tarteeb say lakdiyaan chunen. ⁸us par vah jaanvar kay tukday sar aur charbee samet rakhen. ⁹laazim hai ki qurbaanee pesh karnay vaala pahelay jaanvar kee antadiyaan aur pindaliyaan dhoay, phir imaam pooray jaanvar ko qurbaangaah par jala day. is jalnay vaalee qurbaanee kee khushboo rabb ko pasand hai.

¹⁰agar bhasm honay vaalee qurbaanee bhed-bakriyon men say chunee jaaay to vah beaib nar ho. ¹¹pesh karnay vaala usay rabb kay saamnay qurbaangaah kee shimaalee simt men zabah karay. phir haaroon kay betay jo imaam hain us ka khoon qurbaangaah kay chaar pahelooon par chhidken. ¹²is kay baad pesh karnay vaala jaanvar kay tukday tukday karay aur imaam yah tukday sar aur charbee samet qurbaangaah kee jaltee huee lakdiyon par tarteeb say rakhay. ¹³laazim hai ki qurbaanee pesh karnay vaala pahelay jaanvar kee antadiyaan aur pindaliyaan dhoay, phir imaam pooray jaanvar ko rabb ko pesh karkay qurbaangaah par jala day. is jalnay vaalee qurbaanee kee khushboo rabb ko pasand hai.

¹⁴agar bhasm honay vaalee qurbaanee parinda ho to vah qumree ya javaan kabootar ho. ¹⁵imaam usay qurbaangaah kay paas lay aaay aur us ka sar marod kar qurbaangaah par jala day. vah us ka khoon yoon nikalnay day ki vah qurbaangaah kee ek taraf say neechay tapkay. ¹⁶vah us ka pota aur jo us men hai door karkay qurbaangaah kee mashriqee simt men phaink day, vahaan jahaan raakh phainkee jaatee hai. ¹⁷usay pesh kartay vaqt imaam us kay par pakad kar parinday ko phaad daalay, lekin yoon ki vah bilkul tukday tukday na ho jaaay. phir imaam usay qurbaangaah par jaltee huee lakdiyon par jala day. is jalnay vaalee qurbaanee kee khushboo rabb ko pasand hai.