Hoha 5

¹ai rabb, yaad kar ki hamaaray saath kya kuchh hua! ghaur kar ki hamaaree kaisee rusvaaee huee hai.

²hamaaree mauroosee milkiyat pardesiyon kay havaalay kee gaee, hamaaray ghar ajnabiyon kay haath men a gaay hain.

³ham vaalidon say maheroom ho kar yateem ho gaay hain, hamaaree maaen bevaaon kee tarah ghairmahfooz hain.

⁴khwaah peenay ka paanee ho ya lakdee, har cheez kee pooree qeemat ada karnee padtee hai, haalaanki yah hamaaree apnee hee cheezen theen.

⁵hamaara taaqqub karnay vaalay hamaaray sar par chadh aaay hain, aur ham thak gaay hain. kaheen bhee sukoon naheen milta.

⁶ham nay apnay aap ko misr aur asoor kay havaalay kar diya taaki rotee mil jaaay aur bhookon na maren.

⁷hamaaray baapdaada nay gunaah kiya, lekin vah kooch kar gaay hain. ab ham hee un kee saza bhugat rahay hain.

⁸ghulaam ham par hukoomat kartay hain, aur koee naheen hai jo hamen un kay haath say bachaaay.

⁹ham apnee jaan ko khatray men daal kar rozee kamaatay hain, kyoonki biyaabaan men talvaar hamaaree taak men baithee rahetee hai.

¹⁰bhook kay maaray hamaaree jild tanoor jaisee garm ho kar churmur ho gaee hai.

¹¹siyyoon men aurton kee ismatdaree, yahoodaah kay shaheron men kunvaariyon kee behuramtee huee hai.

¹²dushman nay raeeson ko phaansee day kar buzurgon kee beizzatee kee hai.

¹³naujvaanon ko chakkee ka paat uthaaay phirna hai, ladkay lakdee kay bojh talay dagamga kar gir jaatay hain.

¹⁴ab buzurg shaher kay darvaazay say aur javaan apnay saazon say baaz rahetay hain.

¹⁵khushee hamaaray dilon say jaatee rahee hai, hamaara loknaach aah-o-zaaree men badal gaya hai.

¹⁶taaj hamaaray sar par say gir gaya hai. ham par afsos, ham say gunaah sarzad hua hai.

¹⁷isee liyay hamaara dil nidhaal ho gaya, hamaaree nazar dhundala gaee hai.

¹⁸kyoonki koh-ay-siyyoon tabaah hua hai, lomdiyaan us kee galiyon men phirtee hain.

¹⁹ai rabb, tera raaj abdee hai, tera takht pusht-dar-pusht qaaim raheta hai.

²⁰too hamen hamesha tak kyoon bhoolna chaahata hai? too nay hamen itnee der tak kyoon tark kiay rakha hai?

²¹ai rabb, hamen apnay paas vaapas la taaki ham vaapas a saken. hamen bahaal kar taaki hamaara haal pahelay kee tarah ho.

²²ya kya too nay hamen hatmee taur par mustarad kar diya hai? kya tera ham par ghussa hadd say ziyaada badh gaya hai?.