Hoha 4
yarooshalam kee museebat
1haay, sonay kee aab-o-taab na rahee, khaalis sona bhee maand pad gaya hai. maqdis kay javaahir tamaam galiyon men bikhray paday hain.
2pahelay to siyyoon kay giraanqdar farzand khaalis sonay jaisay qeemtee thay, lekin ab vah goya mittee kay bartan samjhay jaatay hain jo aam kumhaar nay banaaay hain.
3go geedad bhee apnay bachchon ko doodh pilaatay hain, lekin meree qaum registaan men rahenay vaalay uqaabee ulloo jaisee zaalim ho gaee hai.
4sheerakhwaar bachchay kee zabaan piyaas kay maaray taaloo say chipak gaee hai. chhotay bachchay bhook kay maaray rotee maangtay hain, lekin khilaanay vaala koee naheen hai.
5jo pahelay lazeez khaana khaatay thay vah ab galiyon men tabaah ho rahay hain. jo pahelay arghvaanee rang kay shaandaar kapday pahentay thay vah ab kooday-karkat men lot-pot ho rahay hain.
6meree qaum say sadoom kee nisbat kaheen ziyaada sangeen gunaah sarzad hua hai. aur sadoom ka qusoor itna sangeen tha ki vah ek hee lamhay men tabaah hua. kisee nay bhee mudaakhalat na kee.
7siyyoon kay raees kitnay shaandaar thay! jild barf jaisee nikhree, doodh jaisee safed thee. rukhsaar moongay kee tarah gulaabee, shakl-o-soorat sang-ay-laajvard [a] lapis lazuli jaisee chamakdaar thee.
8lekin ab vah koilay jaisay kaalay nazar aatay hain. jab galiyon men ghoomtay hain to unhen pahechaana naheen jaata. un kee haddiyon par kee jild sukad kar lakdee kee tarah sookhee huee hai.
9jo talvaar say halaak huay un ka haal un say behatar tha jo bhookon mar gaay. kyoonki kheton say khuraak na milnay par vah ghul ghul kar mar gaay.
10jab meree qaum tabaah huee to itna sakht kaal pad gaya ki narmdil maaon nay bhee apnay bachchon ko paka kar kha liya.
11rabb nay apna poora ghazab siyyoon par naazil kiya, usay apnay shadeed qaher ka nishaana banaaya. us nay yarooshalam men itnee zabardast aag lagaaee ki vah bunyaadon tak bhasm ho gaya.
12ab dushman yarooshalam kay darvaazon men daakhil huay hain, haalaanki duniya kay tamaam baadshaah balki sab log samajhtay thay ki yah mumkin hee naheen.
13lekin yah sab kuchh us kay nabiyon aur imaamon kay sabab say hua jinhon nay shaher hee men raastbaazon kee khoonrezee kee.
14ab yahee log andhon kee tarah galiyon men tatol tatol kar phirtay hain. vah khoon say itnay aalooda hain ki sab log un kay kapdon say lagnay say gurez kartay hain.
15unhen dekh kar log garajtay hain, “hato, tum naapaak ho! bhaag jaao, dafa ho jaao, hamen haath mat lagaana!” phir jab vah deegar aqvaam men ja kar idhar udhar phirnay lagtay hain to vahaan kay log bhee kahetay hain ki yah mazeed yahaan na thaheren.
16rabb nay khud unhen muntashir kar diya, ab say vah un ka khayaal naheen karega. ab na imaamon kee izzat hotee hai, na buzurgon par meharbaanee kee jaatee hai.
17ham chaaron taraf aankh daudaatay rahay, lekin befaaida, koee madad na milee. dekhtay dekhtay hamaaree nazar dhundala gaee. kyoonki ham apnay burjon par khaday ek aisee qaum kay intizaar men rahay jo hamaaree madad kar hee naheen saktee thee.
18ham apnay chaukon men ja na sakay, kyoonki vahaan dushman hamaaree taak men baitha tha. hamaara khaatma qareeb aaya, hamaara muqarrara vaqt ikhtitaampazeer hua, hamaara anjaam a pahuncha.
19jis tarah aasmaan par mandalaanay vaala uqaab ek dam shikaar par jhapat padta hai usee tarah hamaara taaqqub karnay vaalay ham par toot paday, aur vah bhee kaheen ziyaada tezee say. vah pahaadon par hamaaray peechhay peechhay bhaagay aur registaan men hamaaree ghaat men rahay.
20hamaara baadshaah bhee un kay gadhon men phans gaya. jo hamaaree jaan tha aur jisay rabb nay masah karkay chun liya tha usay bhee pakad liya gaya, go ham nay socha tha ki us kay saay men bas kar aqvaam kay darmiyaan mahfooz rahengay.
21ai adom betee, beshak shaadiyaana baja! beshak mulk-ay-ooz men rah kar khushee mana! lekin khabardaar, allaah kay ghazab ka piyaala tujhay bhee pilaaya jaaega. tab too usay pee pee kar mast ho jaaegee aur nashay men apnay kapday utaar kar barahena phiregee.
22ai siyyoon betee, teree saza ka vaqt poora ho gaya hai. ab say rabb tujhay qaidee bana kar jilaavatan naheen karega. lekin ai adom betee, vah tujhay teray qusoor ka poora ajr dega, vah teray gunaahon par say parda utha lega.