Hoha 3
museebat men rabb kee meharbaanee par ummeed
1haay, mujhay kitna dukh uthaana pada! aur yah sab kuchh is liyay ho raha hai ki rabb ka ghazab mujh par naazil hua hai, usee kee laathee mujhay tarbiyat day rahee hai.
2us nay mujhay haank haank kar taareekee men chalnay diya, kaheen bhee raushnee nazar naheen aaee.
3rozaana vah baar baar apna haath meray khilaaf uthaata raheta hai.
4us nay meray jism aur jild ko sadnay diya, meree haddiyon ko tod daala.
5mujhay gher kar us nay zaher aur sakht museebat kee deevaar meray ird-gird khadee kar dee.
6us nay mujhay taareekee men basaaya. ab main un kee maanind hoon jo badee der say qabr men paday hain.
7us nay mujhay peetal kee bhaaree zanjeeron men jakad kar meray ird-gird aisee deevaaren khadee keen jin say main nikal naheen sakta.
8khwaah main madad kay liyay kitnee cheekhen kyoon na maaroon vah meree iltijaaen apnay huzoor pahunchnay naheen deta.
9jahaan bhee main chalna chaahoon vahaan us nay taraashay pattharon kee mazboot deevaar say mujhay rok liya. meray tamaam raastay bhoolabhulayyaan ban gaay hain.
10allaah reechh kee tarah meree ghaat men baith gaya, sherbabar kee tarah meree taak lagaaay chhup gaya.
11us nay mujhay saheeh raastay say bhatka diya, phir mujhay phaad kar besahaara chhod diya.
12apnee kamaan ko taan kar us nay mujhay apnay teeron ka nishaana banaaya.
13us kay teeron nay meray gurdon ko cheer daala.
14main apnee pooree qaum kay liyay mazaaq ka nishaana ban gaya hoon. vah pooray din apnay geeton men mujhay laan-taan kartay hain.
15allaah nay mujhay kadvay zaher say ser kiya, mujhay naagvaar talkhee ka piyaala pilaaya.
16us nay meray daanton ko bajree chabaanay dee, mujhay kuchal kar khaak men mila diya.
17meree jaan say sukoon chheen liya gaya, ab main khushhaalee ka maza bhool hee gaya hoon.
18chunaanchay main bola, “meree shaan aur rabb par say meree ummeed jaatee rahee hai.”
19meree takleefdih aur bevatan haalat ka khayaal kadvay zaher kee maanind hai.
20to bhee meree jaan ko us kee yaad aatee rahetee hai, sochtay sochtay vah meray andar dab jaatee hai.
21lekin mujhay ek baat kee ummeed rahee hai, aur yahee main baar baar zahen men laata hoon,
22rabb kee meharbaanee hai ki ham nest-o-naabood naheen huay. kyoonki us kee shafqat kabhee khatm naheen hotee
23balki har subah az sar-ay-nau ham par chamak uthtee hai. ai meray aaqa, teree vafaadaaree azeem hai.
24meree jaan kahetee hai, “rabb mera mauroosee hissa hai, is liyay main us kay intizaar men rahoongee.”
25kyoonki rabb un par meharbaan hai jo us par ummeed rakh kar us kay taalib rahetay hain.
26chunaanchay achchha hai ki ham khaamoshee say rabb kee najaat kay intizaar men rahen.
27achchha hai ki insaan javaanee men allaah ka jooa uthaaay phiray.
28jab jooa us kee gardan par rakha jaaay to vah chupkay say tanhaaee men baith jaaay.
29vah khaak men aundhay munh ho jaaay, shaayad abhee tak ummeed ho.
30vah maarnay vaalay ko apna gaal pesh karay, chupkay say har tarah kee rusvaaee bardaasht karay.
31kyoonki rabb insaan ko hamesha tak radd naheen karta.
32us kee shafqat itnee azeem hai ki go vah kabhee insaan ko dukh pahunchaaay to bhee vah aakhirkaar us par dubaara rahem karta hai.
33kyoonki vah insaan ko dabaanay aur gham pahunchaanay men khushee mahsoos naheen karta.
34mulk men tamaam qaidiyon ko paaon talay kuchla ja raha hai.
35allaah t’aala kay dekhtay dekhtay insaan kee haqatalfee kee ja rahee hai,
36adaalat men logon ka haq maara ja raha hai. lekin rabb ko yah sab kuchh nazar aata hai.
37kaun kuchh karva sakta hai agar rabb nay is ka hukm na diya ho?
38aaften aur achchhee cheezen donon allaah t’aala kay farmaan par vujood men aatee hain.
39to phir insaanon men say kaun apnay gunaahon kee saza paanay par shikaayat karay?
40aao, ham apnay chaal-chalan ka jaaiza len, usay achchhee tarah jaanch kar rabb kay paas vaapas aaen.
41ham apnay dil ko haathon samet aasmaan kee taraf maail karen jahaan allaah hai.
42ham iqraar karen, “ham bevafa ho kar sarkash ho gaay hain, aur too nay hamen muaaf naheen kiya.
43too apnay qaher kay parday kay peechhay chhup kar hamaara taaqqub karnay laga, berahemee say hamen maarta gaya.
44too baadal men yoon chhup gaya hai ki koee bhee dua tujh tak naheen pahunch saktee.
45too nay hamen aqvaam kay darmiyaan kooda-karkat bana diya.
46hamaaray tamaam dushman hamen taanay detay hain.
47dahshat aur gadhay hamaaray naseeb men hain, ham dhadaam say gir kar tabaah ho gaay hain.”
48aansoo meree aankhon say tapak tapak kar nadiyaan ban gaay hain, main is liyay ro raha hoon ki meree qaum tabaah ho gaee hai.
49meray aansoo ruk naheen saktay balki us vaqt tak jaaree rahenge
50jab tak rabb aasmaan say jhaank kar mujh par dhyaan na day.
51apnay shaher kee aurton say dushman ka sulook dekh kar mera dil chhalnee ho raha hai.
52jo bilaavajah meray dushman hain unhon nay parinday kee tarah mera shikaar kiya.
53unhon nay mujhay jaan say maarnay kay liyay gadhay men daal kar mujh par patthar phaink diay.
54sailaab mujh par aaya, aur mera sar paanee men doob gaya. main bola, “meree zindagee ka dhaaga kat gaya hai.”
55ai rabb, jab main gadhay kee gaheraaiyon men tha to main nay teray naam ko pukaara.
56main nay iltija kee, “apna kaan band na rakh balki meree aahen aur cheekhen sun!” aur too nay meree sunee.
57jab main nay tujhay pukaara to too nay qareeb a kar farmaaya, “khauf na kha.”
58ai rabb, too adaalat men meray haq men muqaddma lada, balki too nay meree jaan ka ivzaana bhee diya.
59ai rabb, jo zulm mujh par hua vah tujhay saaf nazar aata hai. ab mera insaaf kar!
60too nay un kee tamaam keenaaparvaree par tavajjuh dee hai. jitnee bhee saazishen unhon nay meray khilaaf kee hain un say too vaaqif hai.
61ai rabb, un kee laan-taan, un kay meray khilaaf tamaam mansoobay teray kaan tak pahunch gaay hain.
62jo kuchh meray mukhaalif poora din meray khilaaf phusaphusaatay aur budabudaatay hain us say too khoob aashna hai.
63dekh ki yah kya kartay hain! khwaah baithay ya khaday hon, har vaqt vah apnay geeton men mujhay apnay mazaaq ka nishaana banaatay hain.
64ai rabb, unhen un kee harkaton ka munaasib ajr day!
65un kay zahenon ko kund kar, teree laanat un par a paday!
66un par apna poora ghazab naazil kar! jab tak vah teray aasmaan kay neechay say ghaaib na ho jaaen un ka taaqqub karta rah