Hoha 2
rabb ka ghazab yarooshalam par naazil hua hai
1haay, rabb ka qaher kaalay baadlon kee tarah siyyoon betee par chha gaya hai! israaeel kee jo shaan-o-shaukat pahelay aasmaan kee tarah buland thee usay allaah nay khaak men mila diya hai. jab us ka ghazab naazil hua to us nay apnay ghar ka bhee khayaal na kiya, go vah us kay paaon kee chaukee hai.
2rabb nay berahemee say yaaqoob kee aabaadiyon ko mita daala, qaher men yahoodaah betee kay qilaon ko dha diya. us nay yahoodaah kee saltanat aur buzurgon ko khaak men mila kar un kee behuramtee kee hai.
3ghazabnaak ho kar us nay israaeel kee pooree taaqat khatm kar dee. phir jab dushman qareeb aaya to us nay apnay dahenay haath ko israaeel kee madad karnay say rok liya. na sirf yah balki vah sholaazan aag ban gaya jis nay yaaqoob men chaaron taraf phail kar sab kuchh bhasm kar diya.
4apnee kamaan ko taan kar vah apnay dahenay haath say teer chalaanay kay liyay utha. dushman kee tarah us nay sab kuchh jo manamohan tha maut kay ghaat utaara. siyyoon betee ka khaima us kay qaher kay bhadaktay koilon say bhar gaya.
5rabb nay israaeel ka dushman sa ban kar mulk ko us kay mahelon aur qilaon samet tabaah kar diya hai. usee kay haathon yahoodaah betee kee aah-o-zaaree men izaafa hota gaya.
6us nay apnee sukoonatgaah ko baagh kee jhompdee kee tarah gira diya, usee maqaam ko barbaad kar diya jahaan qaum us say milnay kay liyay jama hotee thee. rabb kay haathon yoon hua ki ab siyyoon kee eedon aur sabton kee yaad hee naheen rahee. us kay shadeed qaher nay baadshaah aur imaam donon ko radd kar diya hai.
7apnee qurbaangaah aur maqdis ko mustarad karkay rabb nay yarooshalam kay mahelon kee deevaaren dushman kay havaalay kar deen. tab rabb kay ghar men bhee eed kay din ka sa shor mach gaya.
8rabb nay faisla kiya ki siyyoon betee kee faseel ko gira diya jaaay. us nay feetay say deevaaron ko naap naap kar apnay haath ko na roka jab tak sab kuchh tabaah na ho gaya. tab qil’aabandee kay pushtay aur faseel maatam kartay kartay zaaay ho gaay.
9shaher kay darvaazay zameen men dhans gaay, un kay kunday toot kar bekaar ho gaay. yarooshalam kay baadshaah aur raahanuma deegar aqvaam men jilaavatan ho gaay hain. ab na shareeat rahee, na siyyoon kay nabiyon ko rabb kee roya miltee hai.
10siyyoon betee kay buzurg khaamoshee say zameen par baith gaay hain. taat kay libaas odh kar unhon nay apnay saron par khaak daal lee hai. yarooshalam kee kunvaariyaan bhee apnay saron ko jhukaaay baithee hain.
11meree aankhen ro ro kar thak gaee hain, shadeed dard nay meray dil ko behaal kar diya hai. kyoonki meree qaum nest ho gaee hai. shaher kay chaukon men bachchay pajhmurda haalat men phir rahay hain, sheerakhwaar bachchay ghash kha rahay hain. yah dekh kar mera kaleja phat raha hai.
12apnee maan say vah poochhtay hain, “rotee aur mai kahaan hai?” lekin befaaida. vah maut kay ghaat utarnay vaalay zakhmee aadmiyon kee tarah chaukon men bhookon mar rahay hain, un kee jaan maan kee god men hee nikal rahee hai.
13ai yarooshalam betee, main kis say tera muvaazna karkay teree hausalaaafzaaee karoon? ai kunvaaree siyyoon betee, main kis say tera muqaabla karkay tujhay tasallee doon? kyoonki tujhay samundar jaisa vasee nuqsaan pahuncha hai. kaun tujhay shifa day sakta hai?
14teray nabiyon nay tujhay jhootee aur bekaar royaaen pesh keen. unhon nay tera qusoor tujh par zaahir na kiya, haalaanki unhen karna chaahiay tha taaki too is saza say bach jaatee. is kay bajaay unhon nay tujhay jhoot aur farebdih paighaamaat sunaaay.
15ab teray paas say guzarnay vaalay taalee baja kar aavaazay kastay hain. yarooshalam betee ko dekh kar vah sar hilaatay huay tauba tauba kahetay hain, “kya yah vah shaher hai jo ‘takmeel-ay-husn’ aur ‘tamaam duniya kee khushee’ kahelaata tha?”
16teray tamaam dushman munh pasaar kar teray khilaaf baaten kartay hain. vah aavaazay kastay aur daant peestay huay kahetay hain, “ham nay usay hadap kar liya hai. lo, vah din a gaya hai jis kay intizaar men ham rahay. aakhirkaar vah pahunch gaya, aakhirkaar ham nay apnee aankhon say usay dekh liya hai.”
17ab rabb nay apnee marzee pooree kee hai. ab us nay sab kuchh poora kiya hai jo badee der say farmaata aaya hai. berahemee say us nay tujhay khaak men mila diya. usee nay honay diya ki dushman tujh par shaadiyaana bajaata, ki teray mukhaalifon kee taaqat tujh par ghaalib a gaee hai.
18logon kay dil rabb ko pukaartay hain. ai siyyoon betee kee faseel, teray aansoo din raat bahetay bahetay nadee ban jaaen. na is say baaz a, na apnee aankhon ko ronay say ruknay day!
19uth, raat kay har paher kee ibtida men aah-o-zaaree kar! apnay dil kee har baat paanee kee tarah rabb kay huzoor undel day. apnay haathon ko us kee taraf utha kar apnay bachchon kee jaanon kay liyay iltija kar jo is vaqt galee galee men bhookon mar rahay hain.
20ai rabb, dhyaan say dekh ki too nay kis say aisa sulook kiya hai. kya yah aurten apnay pet ka phal, apnay laadlay bachchon ko khaaen? kya rabb kay maqdis men hee imaam aur nabee ko maar daala jaaay?
21ladkon aur buzurgon kee laashen mil kar galiyon men padee hain. meray javaan ladkay-ladkiyaan talvaar kee zad men a kar gir gaay hain. jab tera ghazab naazil hua to too nay unhen maar daala, berahemee say unhen maut kay ghaat utaar diya.
22jin say main dahshat khaata tha unhen too nay bulaaya. jis tarah badee eedon kay mauqay par hujoom shaher men jama hotay hain usee tarah dushman chaaron taraf say mujh par toot paday. jab rabb ka ghazab naazil hua to na koee bacha, na koee baaqee rah gaya. jinhen main nay paala aur jo meray zer-ay-nigraanee parvaan chadhay unhen dushman nay halaak kar diya.