Hoha 1

veeraan-o-sunsaan

¹haay, afsos! yarooshalam betee kitnee tanha baithee hai, go us men pahelay itnee raunaq thee. jo pahelay aqvaam men avval darja rakhtee thee vah beva ban gaee hai, jo pahelay mamaalik kee raanee thee vah ghulaamee men a gaee hai.

²raat ko vah ro ro kar guzaartee hai, us kay gaal aansooon say tar rahetay hain. aashiqon men say koee naheen raha jo usay tasallee day. dost sab kay sab bevafa ho kar us kay dushman ban gaay hain.

³pahelay bhee yahoodaah betee badee museebat men phansee huee thee, pahelay bhee usay sakht mazdooree karnee padee. lekin ab vah jilaavatan ho kar deegar aqvaam kay beech men rahetee hai, ab usay kaheen bhee aisee jagah naheen miltee jahaan sukoon say rah sakay. kyoonki jab vah badee takleef men mubtala thee to dushman nay us ka taaqqub karkay usay gher liya.

⁴siyyoon kee raahen maatamzada hain, kyoonki koee eed manaanay kay liyay naheen aata. shaher kay tamaam darvaazay veeraan-o-sunsaan hain. us kay imaam aahen bhar rahay, us kee kunvaariyaan gham kha rahee hain aur usay khud shadeed talkhee mahsoos ho rahee hai.

⁵us kay mukhaalif maalik ban gaay, us kay dushman sukoon say rah rahay hain. kyoonki rabb nay shaher ko us kay mut’addid gunaahon ka ajr day kar usay dukh pahunchaaya hai. us kay farzand dushman kay aagay aagay chal kar jilaavatan ho gaay hain.

⁶siyyoon betee kee tamaam shaan-o-shaukat jaatee rahee hai. us kay buzurg charaagaah na paanay vaalay hiran hain jo thaktay thaktay shikaariyon kay aagay aagay bhaagtay hain.

⁷ab jab yarooshalam museebatzada aur bevatan hai to usay vah qeemtee cheezen yaad aatee hain jo usay qadeem zamaanay say hee haasil theen. kyoonki jab us kee qaum dushman kay haath men aaee to koee naheen tha jo us kee madad karta balki us kay mukhaalif tamaasha dekhnay dauday aaay, vah us kee tabaahee say khush ho kar hans paday.

⁸yarooshalam betee say sangeen gunaah sarzad hua hai, isee liyay vah laan-taan ka nishaana ban gaee hai. jo pahelay us kee izzat kartay thay vah sab usay haqeer jaantay hain, kyoonki unhon nay us kee barahenagee dekhee hai. ab vah aahen bhar bhar kar apna munh doosree taraf pher letee hai.

⁹go us kay daaman men bahut gandgee thee, to bhee us nay apnay anjaam ka khayaal tak na kiya. ab vah dhadaam say gir gaee hai, aur koee naheen hai jo usay tasallee day. “ai rabb, meree museebat ka lihaaz kar! kyoonki dushman shekhee maar raha hai.”

¹⁰jo kuchh bhee yarooshalam ko piyaara tha us par dushman nay haath daala hai. hatta ki usay dekhna pada ki ghair’aqvaam us kay maqdis men daakhil ho rahay hain, go too nay aisay logon ko apnee jamaaat men shareek honay say mana kiya tha.

¹¹tamaam baashinday aahen bhar bhar kar rotee kee talaash men rahetay hain. har ek khaanay ka koee na koee tukda paanay kay liyay apnee beshaqeemat cheezen bech raha hai. zahen men ek hee khayaal hai ki apnee jaan ko kisee na kisee tarah bachaaay. “ai rabb, mujh par nazar daal kar dhyaan day ki meree kitnee tazleel huee hai.

¹²ai yahaan say guzarnay vaalo, kya yah sab kuchh tumhaaray nazdeek bemaanee hai? ghaur say soch lo, jo eeza mujhay bardaasht karnee padtee hai kya vah kaheen aur paaee jaatee hai? hargiz naheen! yah rabb kee taraf say hai, usee ka sakht ghazab mujh par naazil hua hai.

¹³bulandiyon say us nay meree haddiyon par aag naazil karkay unhen kuchal diya. us nay meray paaon kay saamnay jaal bichha kar mujhay peechhay hata diya. usee nay mujhay veeraan-o-sunsaan karkay hamesha kay liyay beemaar kar diya.

¹⁴meray jaraaim ka jooa bhaaree hai. rabb kay haath nay unhen ek doosray kay saath jod kar meree gardan par rakh diya. ab meree taaqat khatm hai, rabb nay mujhay un hee kay havaalay kar diya jin ka muqaabla main kar hee naheen sakta.

¹⁵rabb nay meray darmiyaan kay tamaam soormaaon ko radd kar diya, us nay meray khilaaf juloos nikalvaaya jo meray javaanon ko paash paash karay. haan, rabb nay kunvaaree yahoodaah betee ko angoor ka ras nikaalnay kay hauz men phaink kar kuchal daala.

¹⁶is liyay main ro rahee hoon, meree aankhon say aansoo tapaktay rahetay hain. kyoonki qareeb koee naheen hai jo mujhay tasallee day kar meree jaan ko tar-o-taaza karay. meray bachchay tabaah hain, kyoonki dushman ghaalib a gaya hai.”

¹⁷siyyoon betee apnay haath phailaatee hai, lekin koee naheen hai jo usay tasallee day. rabb kay hukm par yaaqoob kay padosee us kay dushman ban gaay hain. yarooshalam un kay darmiyaan ghinaunee cheez ban gaee hai.

¹⁸“rabb haq-ba-jaanib hai, kyoonki main us kay kalaam say sarkash huee. ai tamaam aqvaam, suno! meree eeza par ghaur karo! meray naujavaan aur kunvaariyaan jilaavatan ho gaay hain.

¹⁹main nay apnay aashiqon ko bulaaya, lekin unhon nay bevafa ho kar mujhay tark kar diya. ab meray imaam aur buzurg apnee jaan bachaanay kay liyay khuraak dhoondtay dhoondtay shaher men halaak ho gaay hain.

²⁰ai rabb, meree tangadastee par dhyaan day! baatin men main tadap rahee hoon, mera dil tezee say dhadak raha hai, is liyay ki main itnee ziyaada sarkash rahee hoon. baahar galee men talvaar nay mujhay bachchon say maheroom kar diya, ghar kay andar maut meray peechhay padee hai.

²¹meree aahen to logon tak pahunchtee hain, lekin koee mujhay tasallee denay kay liyay naheen aata. is kay bajaay meray tamaam dushman meree museebat kay baaray men sun kar baghlen baja rahay hain. vah khush hain ki too nay meray saath aisa sulook kiya hai. ai rabb, vah din aanay day jis ka elaan too nay kiya hai taaki vah bhee meree tarah kee museebat men phans jaaen.

²²un kee tamaam buree harkaten teray saamnay aaen. un say yoon nipat lay jis tarah too nay meray gunaahon kay javaab men mujh say nipat liya hai. kyoonki aahen bhartay bhartay mera dil nidhaal ho gaya hai.”