Kuzaat 1

junoobee kan’aan par mukammal qaaboo naheen paaya jaataa

¹yashooa kee maut kay baad israaeeliyon nay rabb say poochha, “kaun sa qabeela pahelay nikal kar kan’aaniyon par hamla karay?” ²rabb nay javaab diya, “yahoodaah ka qabeela shuroo karay. main nay mulk ko un kay qabzay men kar diya hai.”

³tab yahoodaah kay qabeelay nay apnay bhaaiyon shamaaoon kay qabeelay say kaha, “aaen, hamaaray saath niklen taaki ham mil kar kan’aaniyon ko us ilaaqay say nikaal den jo qur’a nay yahoodaah kay qabeelay kay liyay muqarrar kiya hai. is kay badlay ham baad men aap kee madad karengay jab aap apnay ilaaqay par qabza karnay kay liyay nikalengay.” chunaanchay shamaaoon kay mard yahoodaah kay saath niklay. ⁴jab yahoodaah nay dushman par hamla kiya to rabb nay kan’aaniyon aur farizziyon ko us kay qaaboo men kar diya. bazaq kay paas unhon nay unhen shikast dee, go un kay kul 10,000 aadmee thay.

⁵vahaan un ka muqaabla ek baadshaah say hua jis ka naam adoonee-bazaq tha. jab us nay dekha ki kan’aanee aur farizzee haar gaay hain ⁶to vah faraar hua. lekin israaeeliyon nay us ka taaqqub karkay usay pakad liya aur us kay haathon aur pairon kay angoothon ko kaat liya. ⁷tab adoonee-bazaq nay kaha, “main nay khud sattar baadshaahon kay haathon aur pairon kay angoothon ko katvaaya, aur unhen meree mez kay neechay giray huay khaanay kay raddee tukday jama karnay paday. ab allaah mujhay is ka badla day raha hai.” usay yarooshalam laaya gaya jahaan vah mar gaya.

⁸yahoodaah kay mardon nay yarooshalam par bhee hamla kiya. us par fatah pa kar unhon nay us kay baashindon ko talvaar say maar daala aur shaher ko jala diya. ⁹is kay baad vah aagay badh kar un kan’aaniyon say ladnay lagay jo pahaadee ilaaqay, dasht-ay-najab aur maghrib kay nishebee pahaadee ilaaqay men rahetay thay. ¹⁰unhon nay habroon shaher par hamla kiya jo pahelay qiryat-arba kahelaata tha. vahaan unhon nay seesee, akheemaan aur talmee kee faujon ko shikast dee. ¹¹phir vah aagay dabeer kay baashindon say ladnay chalay gaay. dabeer ka puraana naam qiryat-sifar tha.

¹²kaalib nay kaha, “jo qiryat-sifar par fatah pa kar qabza karega us kay saath main apnee betee aksa ka rishta baandhoonga.” ¹³kaalib kay chhotay bhaaee ghutaneeel bin qanaz nay shaher par qabza kar liya. chunaanchay kaalib nay us kay saath apnee betee aksa kee shaadee kar dee. ¹⁴jab aksa ghutaneeel kay haan ja rahee thee to us nay usay ubhaara ki vah kaalib say koee khet paanay kee darakhwaast karay. achaanak vah gadhay say utar gaee. kaalib nay poochha, “kya baat hai?” ¹⁵aksa nay javaab diya, “jahez kay liyay mujhay ek cheez say navaazen. aap nay mujhay dasht-ay-najab men zameen day dee hai. ab mujhay chashmay bhee day deejiay.” chunaanchay kaalib nay usay apnee milkiyat men say oopar aur neechay vaalay chashmay bhee day diay.

¹⁶jab yahoodaah ka qabeela khajooron kay shaher say ravaana hua tha to qeenee bhee un kay saath yahoodaah kay registaan men aaay thay. (qeenee moosa kay susar yitro kee aulaad thay). vahaan vah dasht-ay-najab men araad shaher kay qareeb doosray logon kay darmiyaan hee aabaad huay.

¹⁷yahoodaah ka qabeela apnay bhaaiyon shamaaoon kay qabeelay kay saath aagay badha. unhon nay kan’aanee shaher safat par hamla kiya aur usay allaah kay liyay makhsoos karkay mukammal taur par tabaah kar diya. is liyay us ka naam hurma yaanee allaah kay liyay tabaahee pada. ¹⁸phir yahoodaah kay faujiyon nay ghazza, asqaloon aur aqroon kay shaheron par un kay gird-o-navaah kee aabaadiyon samet fatah paaee. ¹⁹rabb un kay saath tha, is liyay vah pahaadee ilaaqay par qabza kar sakay. lekin vah samundar kay saath kay maidaanee ilaaqay men aabaad logon ko nikaal na sakay. vajah yah thee ki in logon kay paas lohay kay rath thay. ²⁰moosa kay vaaday kay mutaabiq kaalib ko habroon shaher mil gaya. us nay us men say anaaq kay teen beton ko un kay gharaanon samet nikaal diya.

²¹lekin binyameen ka qabeela yarooshalam kay rahenay vaalay yaboosiyon ko nikaal na saka. aaj tak yaboosee vahaan binyameeniyon kay saath aabaad hain.

shimaalee kan’aan par mukammal qaaboo naheen paaya jaataa

^22-23 ifraaeem aur manassee kay qabeelay bait-el par qabza karnay kay liyay niklay (bait-el ka puraana naam looz tha). jab unhon nay apnay jaasooson ko shaher kee tafteesh karnay kay liyay bheja to rabb un kay saath tha. ²⁴un kay jaasooson kee mulaaqaat ek aadmee say huee jo shaher say nikal raha tha. unhon nay us say kaha, “hamen shaher men daakhil honay ka raasta dikhaaen to ham aap par rahem karengay.” ²⁵us nay unhen andar jaanay ka raasta dikhaaya, aur unhon nay us men ghus kar tamaam baashindon ko talvaar say maar daala siva-ay-mazkoora aadmee aur us kay khaandaan kay. ²⁶baad men vah hittiyon kay mulk men gaya jahaan us nay ek shaher taameer karkay us ka naam looz rakha. yah naam aaj tak raaij hai.

²⁷lekin manassee nay har shaher kay baashinday na nikaalay. bait-shaan, taanak, dor, ibleeaam, majiddo aur un kay gird-o-navaah kee aabaadiyaan rah gaeen. kan’aanee pooray azam kay saath un men tikay rahay. ²⁸baad men jab israaeel kee taaqat badh gaee to in kan’aaniyon ko begaar men kaam karna pada. lekin israaeeliyon nay us vaqt bhee unhen mulk say na nikaala.

²⁹isee tarah ifraaeem kay qabeelay nay bhee jazar kay baashindon ko na nikaala, aur yah kan’aanee un kay darmiyaan aabaad rahay.

³⁰zabooloon kay qabeelay nay bhee qitron aur nahelaal kay baashindon ko na nikaala balki yah un kay darmiyaan aabaad rahay, alabatta unhen begaar men kaam karna pada.

³¹aashar kay qabeelay nay na akko kay baashindon ko nikaala, na saida, ahelaab, akzeeb, hilba, afeeq ya rahob kay baashindon ko. ³²is vajah say aashar kay log kan’aanee baashindon kay darmiyaan rahenay lagay.

³³naftaalee kay qabeelay nay bait-shams aur bait-anaat kay baashindon ko na nikaala balki vah bhee kan’aaniyon kay darmiyaan rahenay lagay. lekin bait-shams aur bait-anaat kay baashindon ko begaar men kaam karna pada.

³⁴daan kay qabeelay nay maidaanee ilaaqay par qabza karnay kee koshish to kee, lekin amoriyon nay unhen aanay na diya balki pahaadee ilaaqay tak mahdood rakha. ³⁵amoree pooray azam kay saath haris pahaad, ayyaalon aur saalbeem men tikay rahay. lekin jab ifraaeem aur manassee kee taaqat badh gaee to amoriyon ko begaar men kaam karna pada.

³⁶amoriyon kee sarhadd darra-ay-aqrabbeem say lay kar sila say paray tak thee.