Yahoodaah 1

¹yah khat eesa maseeh kay khaadim aur yaaqoob kay bhaaee yahoodaah kee taraf say hai.

main unhen likh raha hoon jinhen bulaaya gaya hai, jo khuda baap men piyaaray hain aur eesa maseeh kay liyay mahfooz rakhay gaay hain.

²allaah aap ko rahem, salaamatee aur muhabbat kasrat say ata karay.

jhootay ustaad

³azeezo, go main aap ko us najaat kay baaray men likhnay ka bada shauq rakhta hoon jis men ham sab shareek hain, lekin ab main aap ko ek aur baat kay baaray men likhna chaahata hoon. main is men aap ko naseehat karnay kee zaroorat mahsoos karta hoon ki aap us eemaan kee khaatir jidd-o-jahd karen jo ek hee baar sada kay liyay muqaddaseen kay sapurd kar diya gaya hai. ⁴kyoonki kuchh log aap kay darmiyaan ghus aaay hain jinhen bahut arsa pahelay mujrim thaheraaya ja chuka hai. un kay baaray men yah likha gaya hai ki vah bedeen hain jo hamaaray khuda kay fazl ko tod-marod kar ayyaashee ka baais bana detay hain aur hamaaray vaahid aaqa aur khudaavand eesa maseeh ka inkaar kartay hain.

⁵go aap yah sab kuchh jaantay hain, phir bhee main aap ko is kee yaad dilaana chaahata hoon ki agarchi khudaavand nay apnee qaum ko misr say nikaal kar bacha liya tha to bhee us nay baad men unhen halaak kar diya jo eemaan naheen rakhtay thay. ⁶un farishton ko yaad karen jo us daaira-ay-ikhtiyaar kay andar na rahay jo allaah nay un kay liyay muqarrar kiya tha balki jinhon nay apnee rihaaishgaah ko tark kar diya. unhen us nay taareekee men mahfooz rakha hai jahaan vah abdee zanjeeron men jakday huay roz-ay-azeem kee adaalat ka intizaar kar rahay hain. ⁷sadoom, amoora aur un kay ird-gird kay shaheron ko bhee mat bhoolna, jin kay baashinday in farishton kee tarah zinaakaaree aur ghairfitree sohbat kay peechhay paday rahay. yah log abdee aag kee saza bhugattay huay sab kay liyay ek ibratanaak misaal hain.

⁸to bhee in logon nay un ka sa ravayya apna liya hai. apnay khwaabon kee bina par vah apnay badnon ko aalooda kar letay, khudaavand ka ikhtiyaar radd kartay aur jalaalee hastiyon par kufr baktay hain. ⁹in kay muqaablay men sardaar farishtay meekaael kay ravayyay par ghaur karen. jab vah iblees say jhagadtay vaqt moosa kee laash kay baaray men bahs-mubaahasa kar raha tha to us nay iblees par kufr baknay ka faisla karnay kee jur’at na kee balki sirf itna hee kaha, “rabb aap ko daantay!” ¹⁰lekin yah log har aisee baat kay baaray men kufr baktay hain jo un kee samajh men naheen aatee. aur jo kuchh vah fitree taur par besamajh jaanvaron kee tarah samajhtay hain vahee unhen tabaah kar deta hai. ¹¹un par afsos! unhon nay qaabeel kee raah ikhtiyaar kee hai. paison kay laalach men unhon nay apnay aap ko pooray taur par us ghaltee kay havaalay kar diya hai jo bal’aam nay kee. vah qorah kee tarah baaghee ho kar halaak huay hain. ¹²jab yah log khudaavand kee muhabbat ko yaad karnay vaalay rifaaqtee khaanon men shareek hotay hain to rifaaqat kay liyay dhabbay ban jaatay hain. yah daray baghair khaana kha kha kar us say mahezooz hotay hain. yah aisay charvaahay hain jo sirf apnee gallaabaanee kartay hain. yah aisay baadal hain jo havaaon kay zor say chaltay to hain lekin barastay naheen. yah sardiyon kay mausam men aisay darakhton kee maanind hain jo do lihaaz say murda hain. vah phal naheen laatay aur jad say ukhday huay hain. ¹³yah samundar kee bekaaboo laheron kee maanind hain jo apnee sharmanaak harkaton kee jhaag uchhaaltee hain. yah aavaara sitaaray hain jin kay liyay allaah nay sab say gaheree taareekee men ek daaimee jagah makhsoos kee hai.

¹⁴aadam kay baad saatven aadmee hanook nay in logon kay baaray men yah peshgoee kee, “dekho, khudaavand apnay beshumaar muqaddas farishton kay saath ¹⁵sab kee adaalat karnay aaega. vah unhen un tamaam bedeen harkaton kay sabab say mujrim thaheraaega jo un say sarzad huee hain aur un tamaam sakht baaton kee vajah say jo bedeen gunaahgaaron nay us kay khilaaf kee hain.”

¹⁶yah log budabudaatay aur shikaayat kartay rahetay hain. yah sirf apnee zaatee khwaahishaat pooree karnay kay liyay zindagee guzaartay hain. yah apnay baaray men shekhee maartay aur apnay faaiday kay liyay doosron kee khushaamad kartay hain.

aagaahee aur hidaayaat

¹⁷lekin aap meray azeezo, vah kuchh yaad rakhen jis kee peshgoee hamaaray khudaavand eesa maseeh kay rasoolon nay kee thee. ¹⁸unhon nay aap say kaha tha, “aakhiree dinon men mazaaq udaanay vaalay hongay jo apnee bedeen khwaahishaat pooree karnay kay liyay hee zindagee guzaarengay.” ¹⁹yah vah hain jo paarteebaazee kartay, jo duniyaavee soch rakhtay hain aur jin kay paas rooh-ul-quds naheen hai. ²⁰lekin aap meray azeezo, apnay aap ko apnay muqaddastareen eemaan kee bunyaad par taameer karen aur rooh-ul-quds men dua karen. ²¹apnay aap ko allaah kee muhabbat men qaaim rakhen aur is intizaar men rahen ki hamaaray khudaavand eesa maseeh ka rahem aap ko abdee zindagee tak pahunchaaay.

²²un par rahem karen jo shak men paday hain. ²³baaz ko aag men say chheen kar bachaaen aur baaz par rahem karen, lekin khauf kay saath. balki us shakhs kay libaas say bhee nafrat karen jo apnee harkaton say gunaah say aalooda ho gaya hai.

sitaaish kee duaa

²⁴us kee tamjeed ho jo aap ko thokar khaanay say mahfooz rakh sakta hai aur aap ko apnay jalaal kay saamnay bedaagh aur badee khushee say maamoor karkay khada kar sakta hai. ²⁵us vaahid khuda yaanee hamaaray najaatadihanda ka jalaal ho. haan, hamaaray khudaavand eesa maseeh kay vaseelay say usay jalaal, azmat, qudrat aur ikhtiyaar azal say ab bhee ho aur abad tak rahay. aameen.