Yashua 9

jibaoonee yashooa ko dhoka detay hain

¹in baaton kee khabar darya-ay-yardan kay maghrib kay tamaam baadshaahon tak pahunchee, khwaah vah pahaadee ilaaqay, maghrib kay nishebee pahaadee ilaaqay ya saahilee ilaaqay men lubnaan tak rahetay thay. un kee yah qaumen theen : hittee, amoree, kan’aanee, farizzee, hivvee aur yaboosee. ²ab yah yashooa aur israaeeliyon say ladnay kay liyay jama huay.

³lekin jab jibaoon shaher kay baashindon ko pata chala ki yashooa nay yareehoo aur aee kay saath kya kiya hai ⁴to unhon nay ek chaal chalee. apnay saath safar kay liyay khaana lay kar vah yashooa kay paas chal paday. un kay gadhon par khastaahaal boriyaan aur mai kee aisee puraanee aur ghisee phatee mashken ladee huee theen jin kee baar baar marammat huee thee. ⁵mardon nay aisay puraanay jootay pahen rakhay thay jin par jagah jagah paivand lagay huay thay. un kay kapday bhee ghisay phatay thay, aur safar kay liyay jo rotee un kay paas thee vah khushk aur tukday tukday ho gaee thee. ⁶aisee haalat men vah yashooa kay paas jiljaal kee khaimaagaah men pahunch gaay. unhon nay us say aur baaqee israaeelee mardon say kaha, “ham ek doordaraaz mulk say aaay hain. aaen, hamaaray saath muaahada karen.”

⁷lekin israaeeliyon nay hivviyon say kaha, “shaayad aap hamaaray ilaaqay kay beech men kaheen bastay hain. agar aisa hai to ham kis tarah aap say muaahada kar saktay hain?”

⁸vah yashooa say bolay, “ham aap kee khidmat kay liyay haazir hain.”

yashooa nay poochha, “aap kaun hain aur kahaan say aaay hain?” ⁹unhon nay javaab diya, “aap kay khaadim aap kay khuda kay naam kay baais ek nihaayat doordaraaz mulk say aaay hain. kyoonki us kee khabar ham tak pahunch gaee hai, aur ham nay vah sab kuchh sun liya hai jo us nay misr men ¹⁰aur darya-ay-yardan kay mashriq men rahenay vaalay do baadshaahon kay saath kiya yaanee hasbon kay baadshaah seehon aur basan kay baadshaah oj kay saath jo astaaraat men raheta tha. ¹¹tab hamaaray buzurgon balki hamaaray mulk kay tamaam baashindon nay ham say kaha, ‘safar kay liyay khaana lay kar un say milnay jaaen. un say baat karen ki ham aap kee khidmat kay liyay haazir hain. aaen, hamaaray saath muaahada karen.’ ¹²hamaaree yah rotee abhee garm thee jab ham isay safar kay liyay apnay saath lay kar aap say milnay kay liyay apnay gharon say ravaana huay. aur ab aap khud dekh saktay hain ki yah khushk aur tukday tukday ho gaee hai. ¹³aur mai kee in mashkon kee ghisee phatee haalat dekhen. bhartay vaqt yah naee aur lachakdaar theen. yahee hamaaray kapdon aur jooton kee haalat bhee hai. safar kartay kartay yah khatm ho gaay hain.”

¹⁴israaeeliyon nay musaafiron ka kuchh khaana liya. afsos, unhon nay rabb say hidaayat na maangee. ¹⁵phir yashooa nay un kay saath sulah ka muaahada kiya aur jamaaat kay raahanumaaon nay qasam kha kar us kee tasdeeq kee. muaahaday men israaeel nay vaada kiya ki jibaooniyon ko jeenay dega.

¹⁶teen din guzray to israaeeliyon ko pata chala ki jibaoonee hamaaray qareeb hee aur hamaaray ilaaqay kay ain beech men rahetay hain. ¹⁷israaeelee ravaana huay aur teesray din un kay shaheron kay paas pahunchay jin kay naam jibaoon, kafeera, bairot aur qiryat-yaareem thay. ¹⁸lekin choonki jamaaat kay raahanumaaon nay rabb israaeel kay khuda kee qasam kha kar un say vaada kiya tha is liyay unhon nay jibaooniyon ko halaak na kiya. pooree jamaaat raahanumaaon par budbudaanay lagee, ¹⁹lekin unhon nay javaab men kaha, “ham nay rabb israaeel kay khuda kee qasam kha kar un say vaada kiya, aur ab ham unhen chhed naheen saktay. ²⁰chunaanchay ham unhen jeenay dengay aur vah qasam na todengay jo ham nay un kay saath khaaee. aisa na ho ki allaah ka ghazab ham par naazil ho jaaay. ²¹unhen jeenay do.” phir faisla yah hua ki jibaoonee lakadahaaray aur paanee bharnay vaalay ban kar pooree jamaaat kee khidmat karen. yoon israaeelee raahanumaaon ka un kay saath vaada qaaim raha.

²²yashooa nay jibaooniyon ko bula kar kaha, “tum nay hamen dhoka day kar kyoon kaha ki ham aap say nihaayat door rahetay hain haalaanki tum hamaaray ilaaqay kay beech men hee rahetay ho? ²³chunaanchay ab tum par laanat ho. tum lakadahaaray aur paanee bharnay vaalay ban kar hamesha kay liyay meray khuda kay ghar kee khidmat karogay.”

²⁴unhon nay javaab diya, “aap kay khaadimon ko saaf bataaya gaya tha ki rabb aap kay khuda nay apnay khaadim moosa ko kya hukm diya tha, ki usay aap ko poora mulk dena aur aap kay aagay aagay tamaam baashindon ko halaak karna hai. yah sun kar ham bahut dar gaay ki hamaaree jaan naheen bachegee. isee liyay ham nay yah sab kuchh kiya. ²⁵ab ham aap kay haath men hain. hamaaray saath vah kuchh karen jo aap ko achchha aur theek lagta hai.”

²⁶chunaanchay yashooa nay unhen israaeeliyon say bachaaya, aur unhon nay jibaooniyon ko halaak na kiya. ²⁷usee din us nay jibaooniyon ko lakadahaaray aur paanee bharnay vaalay bana diya taaki vah jamaaat aur rabb kee us qurbaangaah kee khidmat karen jis ka maqaam rabb ko abhee chunna tha. aur yah log aaj tak yahee kuchh kartay hain.