Yashua 8

aee kee shikast

¹phir rabb nay yashooa say kaha, “mat dar aur mat ghabra balki tamaam faujee apnay saath lay kar aee shaher par hamla kar. kyoonki main nay aee kay baadshaah, us kee qaum, us kay shaher aur mulk ko teray haath men kar diya hai. ²laazim hai ki too aee aur us kay baadshaah kay saath vah kuchh karay jo too nay yareehoo aur us kay baadshaah kay saath kiya tha. lekin is martaba tum us ka maal aur maveshee apnay paas rakh saktay ho. hamla kartay vaqt shaher kay peechhay ghaat laga.”

³chunaanchay yashooa pooray lashkar kay saath aee par hamla karnay kay liyay nikla. us nay apnay sab say achchhay faujiyon men say 30,000 ko chun liya aur unhen raat kay vaqt aee kay khilaaf bhej kar ⁴hukm diya, “dhyaan den ki aap shaher kay peechhay ghaat lagaaen. sab kay sab shaher kay qareeb hee tayyaar rahen. ⁵itnay men main baaqee mardon kay saath shaher kay qareeb a jaaoonga. aur jab shaher kay log pahelay kee tarah hamaaray saath ladnay kay liyay nikalengay to ham un kay aagay aagay bhaag jaaengay. ⁶vah hamaaray peechhay pad jaaengay aur yoon ham unhen shaher say door lay jaaengay, kyoonki vah samjhengay ki ham is dafa bhee pahelay kee tarah un say bhaag rahay hain. ⁷phir aap us jagah say niklen jahaan aap ghaat men baithay hongay aur shaher par qabza kar len. rabb aap ka khuda usay aap kay haath men kar dega. ⁸jab shaher aap kay qabzay men hoga to usay jala dena. vahee karen jo rabb nay farmaaya hai. meree in hidaayaat par dhyaan den.”

⁹yah kah kar yashooa nay unhen aee kee taraf bhej diya. vah ravaana ho kar aee kay maghrib men ghaat men baith gaay. yah jagah bait-el aur aee kay darmiyaan thee. lekin yashooa nay yah raat baaqee logon kay saath khaimaagaah men guzaaree. ¹⁰aglay din subah-saveray yashooa nay aadmiyon ko jama karkay un ka jaaiza liya. phir vah israaeel kay buzurgon kay saath un kay aagay aagay aee kee taraf chal diya. ¹¹jo lashkar us kay saath tha vah chaltay chaltay aee kay saamnay pahunch gaya. unhon nay shaher kay shimaal men apnay khaimay lagaaay. un kay aur shaher kay darmiyaan vaadee thee.

¹²jo shaher kay maghrib men aee aur bait-el kay darmiyaan ghaat lagaaay baithay thay vah taqreeban 5,000 mard thay. ¹³yoon shaher kay maghrib aur shimaal men aadmee ladnay kay liyay tayyaar huay. raat kay vaqt yashooa vaadee men pahunch gaya.

¹⁴jab aee kay baadshaah nay shimaal men israaeeliyon ko dekha to us nay jaldee jaldee tayyaariyaan keen. aglay din subah-saveray vah apnay aadmiyon kay saath shaher say nikla taaki israaeeliyon kay saath laday. yah jagah vaadee-ay-yardan kee taraf thee. baadshaah ko maaloom na hua ki israaeelee shaher kay peechhay ghaat men baithay hain. ¹⁵jab aee kay mard niklay to yashooa aur us ka lashkar shikast ka izhaar karkay registaan kee taraf bhaagnay lagay.

¹⁶tab aee kay tamaam mardon ko israaeeliyon ka taaqqub karnay kay liyay bulaaya gaya, aur yashooa kay peechhay bhaagtay bhaagtay vah shaher say door nikal gaay. ¹⁷ek mard bhee aee ya bait-el men na raha balki sab kay sab israaeeliyon kay peechhay pad gaay. na sirf yah balki unhon nay shaher ka darvaaza khula chhod diya.

¹⁸phir rabb nay yashooa say kaha, “jo shamsheer teray haath men hai usay aee kay khilaaf uthaaay rakh, kyoonki main yah shaher teray haath men kar doonga.” yashooa nay aisa hee kiya, ¹⁹aur joon hee us nay apnee shamsheer say aee kee taraf ishaara kiya ghaat men baithay aadmee jaldee say apnee jagah say nikal aaay aur daud daud kar shaher par jhapat paday. unhon nay us par qabza karkay jaldee say usay jala diya.

²⁰jab aee kay aadmiyon nay mud kar nazar daalee to dekha ki shaher say dhuen kay baadal uth rahay hain. lekin ab un kay liyay bhee bachnay ka koee raasta na raha, kyoonki jo israaeelee ab tak un kay aagay aagay registaan kee taraf bhaag rahay thay vah achaanak mud kar taaqqub karnay vaalon par toot paday. ²¹kyoonki jab yashooa aur us kay saath kay aadmiyon nay dekha ki ghaat men baithay israaeeliyon nay shaher par qabza kar liya hai aur ki shaher say dhuaan uth raha hai to unhon nay mud kar aee kay aadmiyon par hamla kar diya. ²²saath saath shaher men daakhil huay israaeelee shaher say nikal kar peechhay say un say ladnay lagay. chunaanchay aee kay aadmee beech men phans gaay. israaeeliyon nay sab ko qatl kar diya, aur na koee bacha, na koee faraar ho saka. ²³sirf aee kay baadshaah ko zinda pakda aur yashooa kay paas laaya gaya.

²⁴aee kay mardon ka taaqqub kartay kartay un sab ko khulay maidaan aur registaan men talvaar say maar denay kay baad israaeeliyon nay aee shaher men vaapas a kar tamaam baashindon ko halaak kar diya. ²⁵us din aee kay tamaam mard aur aurten maaray gaay, kul 12,000 afraad. ²⁶kyoonki yashooa nay us vaqt tak apnee shamsheer uthaaay rakhee jab tak aee kay tamaam baashindon ko halaak na kar diya gaya. ²⁷sirf shaher kay maveshee aur loota hua maal bach gaya, kyoonki is dafa rabb nay hidaayat kee thee ki israaeelee usay lay ja saktay hain.

²⁸yashooa nay aee ko jala kar usay hamesha kay liyay malbay ka dher bana diya. yah maqaam aaj tak veeraan hai. ²⁹aee kay baadshaah kee laash us nay shaam tak darakht say latkaaay rakhee. phir jab sooraj doobnay laga to yashooa nay apnay logon ko hukm diya ki baadshaah kee laash ko darakht say utaar den. tab unhon nay usay shaher kay darvaazay kay paas phaink kar us par patthar ka bada dher laga diya. yah dher aaj tak maujood hai.

aibaal pahaad par ahd kee tajdeed

³⁰us vaqt yashooa nay rabb israaeel kay khuda kee taazeem men aibaal pahaad par qurbaangaah banaaee ³¹jis tarah rabb kay khaadim moosa nay israaeeliyon ko hukm diya tha. us nay usay moosa kee shareeat kee kitaab men darj hidaayaat kay mutaabiq banaaya. qurbaangaah kay patthar taraashay baghair lagaaay gaay, aur un par lohay ka aala na chalaaya gaya. us par unhon nay rabb ko bhasm honay vaalee aur salaamatee kee qurbaaniyaan pesh keen.

³²vahaan yashooa nay israaeeliyon kee maujoodgee men pattharon par moosa kee shareeat dubaara likh dee. ³³phir buzurgon, nigahbaanon aur qaaziyon kay saath mil kar tamaam israaeelee do gurohon men taqseem huay. pardesee bhee un men shaamil thay. ek guroh garizeem pahaad kay saamnay khada hua aur doosra aibaal pahaad kay saamnay. donon guroh ek doosray kay muqaabil khaday rahay jabki laavee kay qabeelay kay imaam un kay darmiyaan khaday huay. unhon nay rabb kay ahd ka sandooq utha rakha tha. sab kuchh un hidaayaat kay ain mutaabiq hua jo rabb kay khaadim moosa nay israaeeliyon ko barkat denay kay liyay dee theen.

³⁴phir yashooa nay shareeat kee tamaam baaton kee tilaavat kee, us kee barkaat bhee aur us kee laanten bhee. sab kuchh us nay vaisa hee padha jaisa ki shareeat kee kitaab men darj tha. ³⁵jo bhee hukm moosa nay diya tha us ka ek bhee lafz na raha jis kee tilaavat yashooa nay tamaam israaeeliyon kee pooree jamaaat kay saamnay na kee ho. aur sab nay yah baaten suneen. is men aurten, bachchay aur un kay darmiyaan rahenay vaalay pardesee sab shaamil thay.