Yashua 7

akan ka gunaah

¹lekin jahaan tak rabb kay liyay makhsoos cheezon ka taalluq tha israaeeliyon nay bevafaaee kee. yahoodaah kay qabeelay kay ek aadmee nay un men say kuchh apnay liyay lay liya. us ka naam akan bin karmee bin zabdee bin zaarah tha. tab rabb ka ghazab israaeeliyon par naazil hua.

²yah yoon zaahir hua ki yashooa nay kuchh aadmiyon ko yareehoo say aee shaher ko bhej diya jo bait-el kay mashriq men bait-aavan kay qareeb hai. us nay un say kaha, “us ilaaqay men ja kar us kee jaasoosee karen.” chunaanchay vah ja kar aisa hee karnay lagay. ³jab vaapas aaay to unhon nay yashooa say kaha, “is kee zaroorat naheen ki tamaam log aee par hamla karen. usay shikast denay kay liyay do ya teen hazaar mard kaafee hain. baaqee logon ko na bhejen varna vah khwaah-m-khwaah thak jaaengay, kyoonki dushman kay log kam hain.” ⁴chunaanchay taqreeban teen hazaar aadmee aee say ladnay gaay. lekin vah aee kay mardon say shikast kha kar faraar huay, ⁵aur un kay 36 afraad shaheed huay. aee kay aadmiyon nay shaher kay darvaazay say lay kar shabreem tak un ka taaqqub karkay vahaan kee dhalaan par unhen maar daala. tab israaeelee sakht ghabra gaay, aur un kee himmat javaab day gaee.

⁶yashooa nay ranjish ka izhaar karkay apnay kapdon ko phaad diya aur rabb kay sandooq kay saamnay munh kay bal gir gaya. vahaan vah shaam tak pada raha. israaeel kay buzurgon nay bhee aisa hee kiya aur apnay sar par khaak daal lee. ⁷yashooa nay kaha, “haay, ai rabb qaadir-ay-mutlaq! too nay is qaum ko darya-ay-yardan men say guzarnay kyoon diya agar tera maqsad sirf yah tha ki hamen amoriyon kay havaalay karkay halaak karay? kaash ham darya kay mashriqee kinaaray par rahenay kay liyay tayyaar hotay! ⁸ai rabb, ab main kya kahoon jab israaeel apnay dushmanon kay saamnay say bhaag aaya hai? ⁹kan’aanee aur mulk kee baaqee qaumen yah sun kar hamen gher lengee aur hamaara naam-o-nishaan mita dengee. agar aisa hoga to phir too khud apna azeem naam qaaim rakhnay kay liyay kya karega?”

¹⁰javaab men rabb nay yashooa say kaha, “uth kar khada ho ja! too kyoon munh kay bal pada hai? ¹¹israaeel nay gunaah kiya hai. unhon nay meray ahd kee khilaafvarzee kee hai jo main nay un kay saath baandha tha. unhon nay makhsoosashuda cheezon men say kuchh lay liya hai, aur choree karkay chupkay say apnay saamaan men mila liya hai. ¹²isee liyay israaeelee apnay dushmanon kay saamnay qaaim naheen rah saktay balki peeth pher kar bhaag rahay hain. kyoonki is harkat say israaeel nay apnay aap ko bhee halaakat kay liyay makhsoos kar liya hai. jab tak tum apnay darmiyaan say vah kuchh nikaal kar tabaah na kar lo jo tabaahee kay liyay makhsoos hai us vaqt tak main tumhaaray saath naheen hoonga. ¹³ab uth aur logon ko meray liyay makhsoos-o-muqaddas kar. unhen bata dena, ‘apnay aap ko kal kay liyay makhsoos-o-muqaddas karna, kyoonki rabb jo israaeel ka khuda hai farmaata hai ki ai israaeel, teray darmiyaan aisa maal hai jo meray liyay makhsoos hai. jab tak tum usay apnay darmiyaan say nikaal na do apnay dushmanon kay saamnay qaaim naheen rah sakogay.’

¹⁴kal subah ko har ek qabeela apnay aap ko pesh karay. rabb zaahir karega ki qusoorvaar shakhs kaun say qabeelay ka hai. phir us qabeelay kay kumbay baaree baaree saamnay aaen. jis kumbay ko rabb qusoorvaar thaheraaega us kay mukhtalif khaandaan saamnay aaen. aur jis khaandaan ko rabb qusoorvaar tharaaega us kay mukhtalif afraad saamnay aaen. ¹⁵jo rabb kay liyay makhsoos maal kay saath pakda jaaega usay us kee milkiyat samet jala dena hai, kyoonki us nay rabb kay ahd kee khilaafvarzee karkay israaeel men sharmanaak kaam kiya hai.”

¹⁶aglay din subah-saveray yashooa nay qabeelon ko baaree baaree apnay paas aanay diya. jab yahoodaah kay qabeelay kee baaree aaee to rabb nay usay qusoorvaar thaheraaya. ¹⁷jab us qabeelay kay mukhtalif kumbay saamnay aaay to rabb nay zaarah kay kumbay ko qusoorvaar thaheraaya. jab zaarah kay mukhtalif khaandaan saamnay aaay to rabb nay zabdee ka khaandaan qusoorvaar thaheraaya. ¹⁸aakhirkaar yashooa nay us khaandaan ko fardan fardan apnay paas aanay diya, aur akan bin karmee bin zabdee bin zaarah pakda gaya. ¹⁹yashooa nay us say kaha, “beta, rabb israaeel kay khuda ko jalaal do aur us kee sitaaish karo. mujhay bata do ki tum nay kya kiya. koee bhee baat mujh say mat chhupaana.”

²⁰akan nay javaab diya, “vaaqaee main nay rabb israaeel kay khuda ka gunaah kiya hai. ²¹main nay lootay huay maal men say baabal ka ek shaandaar chogha, taqreeban sava do kilograam chaandee aur aadhay kilograam say zaaid sonay kee eent lay lee thee. yah cheezen dekh kar main nay un ka laalach kiya aur unhen lay liya. ab vah meray khaimay kee zameen men dabee huee hain. chaandee ko main nay baaqee cheezon kay neechay chhupa diya.”

²²yah sun kar yashooa nay apnay bandon ko akan kay khaimay kay paas bhej diya. vah daud kar vahaan pahunchay to dekha ki yah maal vaaqaee khaimay kee zameen men chhupaaya hua hai aur ki chaandee doosree cheezon kay neechay padee hai. ²³vah yah sab kuchh khaimay say nikaal kar yashooa aur tamaam israaeeliyon kay paas lay aaay aur rabb kay saamnay rakh diya. ²⁴phir yashooa aur tamaam israaeelee akan bin zaarah ko pakad kar vaadee-ay-akoor men lay gaay. unhon nay chaandee, libaas, sonay kee eent, akan kay betay-betiyon, gaay-bailon, gadhon, bhed-bakriyon aur us kay khaimay gharaz us kee pooree milkiyat ko us vaadee men pahuncha diya.

²⁵yashooa nay kaha, “tum yah aafat ham par kyoon laaay ho? aaj rabb tum par hee aafat laaega.” phir pooray israaeel nay akan ko us kay ghar vaalon samet sangasaar karkay jala diya. ²⁶akan kay oopar unhon nay pattharon ka bada dher laga diya jo aaj tak vahaan maujood hai. yahee vajah hai ki aaj tak us ka naam vaadee-ay-akoor yaanee aafat kee vaadee raha hai.

is kay baad rabb ka sakht ghazab thanda ho gaya.